Ombelewa youndjolowele moshitopolwahoololo shaTjozondjupa oya lopota ovanhu ve li 22 va monika ocholera omangha ve li 96 navo tava feekelwa kutya ove na oudu ou ashike inau kolekwa natango.
Oshinima eshi okwa li sha kolekwa komukulunhuwiliki woundjolowele, Gerbhado Timotheus, oshivike sha dja ko.
“Omunhu wotete okwa li a monika oudu ou momafiku 19 Novemba odula ya dja ko, ndee momafiku 25 Novemba, ovanhu okwa li va ninga vahapu,” osho a ti ngaho.
Omukifi ou owa monika tete molukanda ledina Kap n Bou, olo kwa li lihe na omeva pefimbo opo nokulivatelela poluheela okwa li oshinima sha keshe efiku, osho a weda opo ngaho.
Kap n Bou olukanda kwa li a totwa momudo 2017, li li eekilomita di li lwopunhano koumbuwanhu waGroofontein.
Fiyo opapa kapu na nande omunhu a lopotwa a xulifa koudu ou nokapu na nande ondokotola, omupangi, omuxungimwenyo ile omuwapaleki a kwatwa koudu ou, Thimotheus osho a ti ngaho.
Ondokotola yakula yopaunamiti koGrootfontein Martinus Shaninga okwa ti ocholera omukifi woshimela hau tandavele diva, hau etwa komeva a kaka.
Fiyo opapa, ocholera oya kwata omalukanda ahapu, mwa kwatelwa ofaalama yepangelo yedina Juliana, i li eekilomita 70 konooli yaGrootfontein.
“Ohatu shi pondola shaashi ovanhu ava kwa li va monika oudu ou ova pangwa nokulekelwa.
Etine, ovanaudu ashike vavali kwa li ve li moshipangelo ashike okwa li ve li monghalo i li xwepo,” Shaninga osho a ti ngaho.
Okwa weda po kutya oikonga yomahongo kombinga yomukifi ou otai twikile, nolukanda loKap n Bou paife oli na oupomba vomeva vatatu notenga yomeva yeelita di li 10 000 hai tulwa omeva kepangelo.
Moshipangelo namo otamu ka tulwa onhele imwe yokupangela ovanhu ava oshivike eshi, osho a ti ngaho.
Omukalimo womolukanda loKap n Bou Paulus Shipikita okwa indila muni opo a twale omeva okunwa ahapu kolukanda oko nokukwata mo oingulu, oikombo, eendoongi neengobe odo de lihanena olukanda ta ti oimuna ohai umbata omikifi.
Mayola waGootfontein Moris Geingob okwa ti omukifi owa nyika oshiponga newiliko olo opo la hoololwa paife oli li kOvenduka tali kongo oshimaliwa.
“Ewilikongudu okwa li ashike li na oshimaliwa shi fike poN$100 000 neudo, ashike natango ocholera otai twikile nokuhepeka eemwenyo. Lipula ashike, ofikola tai tameke mOmaandaxa, oshike tashi ningwa po,” osho a ti ngaho. -NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
