‘Otwa kala tushi wete’

Aashiinda naakwanezimo yomulumentu ngoka taku hokololwa a dhipaga ohondakadhona ye, Selestine Shilongo, mOmaandaha goshiwike sha zi ko molukanda lwoombashu lwaHavana mOvenduka, oya popi kutya oya kala yeshi wete.

“Oya kala haya kondjo konyala kehe esiku nonda kala omushiinda gwawo uule woomvula omugoyi ngashingeyi, notwa ndhindhilike kutya aluhe oya kala haya kondjo, unene tuu ngele ye li kohi yondhungo,” osho Rosalia Ephraim a popi ngaaka.

Oshiningwanima shoka shedhipago osha kolekwa komupopiliko gwopolisi moshitopolwa shaKhomas, Silas Shipandeni, ngoka a popi kutya omufekelwa gwomimvo 41 otaku hokololwa a tsu nombele ohondakadhona ye lwiikando itatu kombunda.

Shipandeni okwa popi kutya Shilongo okwa kanitha omwenyo gwe omolwiilalo mbyoka yombele nokwa hulithile nokuli pehala lyoshiningwanima.

Okwa koleke kutya ekwatathano lyopaihole lyaaholathani mboka olya kala noontamanana.
Ephraim okwa popi kutya okwa li kiilonga sho oshiningwanima shoka sha ningwa.

Okwa popi kutya nonande onkundana ndjoka otayi uvitha nayi noonkondo, onkene aashiinda ya kala yeshi kutya aluhe aaholathani mboka oya kala haya kondjo nolwanima ohaya dhiminathanapo.

“Sho nda zimbuka, onda tseyithilwa kutya omufekelwa okwa tsu ohondakadhona ye nombele,” osho a popi ngaaka.
“Omathimbo gamwe oya kala haya ipatele megumbo opo kaapu yiwe komuntu pokati kawo [uuna taya kondjo], ashike nando ongaaka otwa kala hatu ya uvu,” osho Ephraim a hokolola ngaaka.

Olugodhi pokati kaahokanathani mboka olwa kala halu lopotwa olundji kopolisi naShikongo olundji okwa kala ha tidhwa mo megumbo komufekelwa “ashike lwanima ohaya ishunine owala nokukala ishewe ye li pamwe,” osho a popi ngaaka.

Ephriam okwa popi kutya oku uvithwa nayi noonkondo koshiningwanima shoka nokwa popi kutya ando okwa li tashi vulika ando okwe ya pa omayele opo kaashi hulile mekanitho lyomwenyo.

“Omathimbo gamwe onda kala nda hala oku ya pa omayele ashike ngame omushona kuyo, kanda li ndi na oonkondo nomukumo gwoku shi ninga,” osho a popi ngaaka.

Pauyelele wa zi komukwanezimo gwomufekelwa, ngoka a tindi edhina lye li tumbulwe, okwa popi kutya aaholathani mboka oya kala mekwatathano lyopaihole lya piyagana.

Okwa popi kutya oya kala haya kondjo konyala kombinga ya kehe okanima okashona ka holoka pokati kawo. “Otwa kala olundji hatu popi nanakusa osho wo omufekelwa kombinga yonkalo yawo yomalugodhi, opo ye shi hulithepo, ashike osha hulile mokwena kwa thita. Oya kala haya kondjo nokiinima ya nathangwa ashike nande ongaaka onkene ngaa esiku lya landula to ya mono ya landulathana. Oshe tu uvitha nayi noonkondo, nosha thiga omwaka momitima dhetu. Otandi dhiladhila kutya onda okwa li tashi vulika ando onda kwathele ngaa opo ndi shilipaleke kutya eso ndyoka olya keelelwa,” osho a popi ngaaka.

Omunawino miipambele yopamadhiladhilo, Shaun Whittaker okwa popi kutya omakwatathano gopaihole oge na okukala ando ge na egameno, ashike ngele ekwatathano ndyoka olya kala nomalugodhi nena woashi kala sha nika oshiponga.

“Aantu olundji ohaya dhini omalugodhi momakwatathano gopaihole naashoka omathimbo gamwe ohashi talelwa meitaalo kutya omulumentu oye omutse gwegumbo naakiintu oye na okwiiyutha kuyo. Aakiintu olundji ohaya kala ye wetike ya fala eliko lyomulumentu, naashoka ohashi eta aalumentu ya kale ye wete ye na uuthemba, naashoka olundji ohashi eta nee omalugodhi,” osho a popi ngaaka.

Whittaker okwa popi kutya omalugodhi ngoka haga holoka olundji, ohaga vulu okuninga onkalondjigilile onkene onkalo ohayi kala ya pumbwa okuyapukilwa.

“Ihashi kwatha sha okukala mekwatathano lyopaihole lya vundakana, onkene omuntu na ze mo opo i ihupithe,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.