Otwa alula oshimaliwa shi fikepobiliyona imwe – omuhona woRedForce

…. ovakwashiwana vomOvenduka noMbaye inava hala

Omukulunhuwiliki wehangano lokwoongela eengunga ledina RedForce Debt Management, Julius Nyamazana, okwa ti ehangano laye ole shi pondolo okwaalula oshimaliwa shi fike pobiliyona imwe okudja momalelo eedoolopa omulongo okudja momudo 2014 ashike ovakalimo vomOvenduka noMbaye inava hala va longelekumwe.

Ehangano ola kala tali lundilwa kutya otali liumbata nai pefimbo lokwoongela eengunga.
Ehangano eli otali lihanene meedoolopa daNamibia.

Pefimbo lomapulaapulo noDesert Radio Etivali, omuhona wehangano eli okwa ti ehangano laye ohali longo pamikalo diwa ndee ta pula ovo va handuka ile va ningwa nai opo va kwatafane nombelewa yaye.

Nyamazana okwa ti ehangano laye ohali longifa omilandu odo di li po nale dokwoongela eengunga meedolopa.
Okwa ti ola alula oshimaliwa shi fike pobiliyona imwe fiyo opapa okudja meedoolopa di li omulongo.

“Ngee hatu longo nomalelo eedoolopa, ohatu longifa omilandu davo deengunga, omo omadina amwe e li koshi yeengunga, ngaashi okukala ino futa konima yomafiku 30 ile 60, omulandu weengunga otau ti omayakulo oye ee na okutetwa mo.

“Ongehangano, ohatu longifa ashike omilandu edi ndee hatu tete mo omayakulo oye, oshinima shokufuta ohashi ke ya mo konima,” Osho a ti ngaho.

Ewiliko lehangano eli ola mona ovakalimo vamwe vomoVenduka ovo inava hala la longela kumwe nelelo lodoolopa yaVenduka. Nyamazana okwa ti ehangano laye ola alula oshimaliwa shelelo lodoolopa yaVenduka osho sha li meendjo shi fike peemiliyona N$300, ashike eengunga delelo lodoolopa oda ya pombada momudo 2022 fiyo opobiliyona oshinghwanyumbali N$1,2.

“RedForce oku na ondjokonona iwa nomalelo eedolopa, unene ngaa elelo lodoolopa yaVenduka. Ohatu longo tu li koshi yoveta. Katu shi ovanhu ovo have ya komaumbo eni tava longifa eenghono ndee tava teya po omivelo domaumbo eni. Ohatu longo nelandulafano,” Nyamazana osho a ti ngaho.

Okwa ti ehangano oli na elandulafano nola tambula ko keshe oo eudite nai opo a ye keembelewa dalo opo va ninge omalongekido okufuta eengunga davo.

Okwa ti ngee edina ola twalwa keembelewa davo, ehangano ohali lombwele kashitoma kombinga yoshinima eshi, ndee tava kendabala opo va konge ondunge nghee e na okufuta eengunga odo, ashike ovakalimo vamwe inava hala okulandula ihave ya ko keembelewa detu.

“Omuleli wokomitiye yovakalimo vaKatutura ne uye ndee ta popi nafye. Omivelo detu oda yeuluka. Nave uye ndee tava popi oupyakadi wavo,” Nyamazana osho a ti ngaho. Okwa ti ovanhu ove na okukala va handuka alushe, ashike ne, elalakano lotete lehangano okutula moilonga omilandu dokwoongela eengunga odo di li po nale. “Kashi pu okukala u na eengunga domunhu ndee nokombinga yetu kashi pu alushe okupula eengunga.

Fye ongehangano ohatu tu ovanhu omukumo opo va ninge ominyanyo ngee opu na oshinima shihe li mondjila,” Nyamazana osho a ti ngaho.

Okwa ti osha fimana opo ovakwashiwana va kale va fimaneka okufuta omayakulo avo omalelo eedolopa, shaashi otashi vatele omalelo eedoolopa opo a yambule po omidingonoko nokuyandja omayakulo a pumbiwa.

“Ngee inatu ongela eengunga edi, omalelo eedolopa otaa i keengolo. Okwoongela eengunga ohaku vatele opo moikefa yomalelo eedoolopa muha pwe.

“Ngee kapu na omunhu ta ningi ngaha, epangelo lomoshilongo otali teka po,” Osho a ti ngaho.

Omupopiliko wokomitiye yovakalimo vaKatutura, Shaun Gariseb, okwa ti omalelo eedolopa inaa pumbwa okukala a tala momahangano okondje okwoongela eengunga ngaashi oRedForce.

“RedForce oupyakadi wa kula. Omayakulo inaa futwa ee na okutwikila kweeta oupyakadi, shaashi elelo lodoolopa yaVendula olaanya okutala kutya oshike tashi eta ovanhu opo va kale itava dulu okufuta,” Osho a ti ngaho oshivike sha dja ko.