Otava pula opo Venaani natangoa ninge pelesidente wongudu

… Muharukua okwa ti ke na noupelesidente wongudu

Ovaleli vamwe vongudu youPopular Democratic Movement (PDM) vati otava pula opo omuleli wongudu McHenry Venaani natango a kale oye pelesidente wongudu inaku ningwa omahoololo koshoongalele shokuninga omahoololo oupelesidente wongudu osho sha teelelwa shi ka ningwe.

Oshoongalele eshi okwa li sha teelelwa shi ka ningwe muJuni.

Oshilyo shopaliamente songudu Vipuakuje Muharukua, oo kwa li a tali kutya oye ta dulu okuninga pelesidente wongudu ngee Venaani a di ko, oshivike sha dja ko okwa lombwela oThe Namibian kutya yee ke na nomhito youpelesidente.

“Inandi hala okupopya sha kombinga yoshoongalele shongudu ile ngee omhito youpelesidente otai ka kondjelwa ile itai ka kondjelwa, kashi na oshilongo kwaame osho,” Osho a ti ngaho.

Venaani oshivike sha dja ko okwa koleka kutya ota ka ya momahoololo oupelesidente wongudu koshoongalele shongudu osho tashi ka ningwa neudo. Oilyo imwe yongudu oya ti ovanhu vamwe otava pula opo kuha ningwe omahoololo oupelesidente wongudu kukondjifwe Venaani.

“Omhito youpelesidente wongudu itai ka ningilwa nande omafiyafanepo. Eshi osha hala kutya oo eli pelesidente wongudu paife oye ashike ta kala pelesidente,” Odjo osho ya ti ngaho oshivike sha dja ko.

Ngee okwa hoolululwa koshoongalele osho tashi ka ningwa, otashi ka kala oshikako shaxuuninwa shaVenaani shoupelesidente wongudu yoPDM, shaashi ekotamhango longudu otali ti omunhu ota dulu ashike okukala pelesidente wongudu oikako itatu.

Ashike nee, Venaani okwa fa ehe udite ko nawa oshinima osho.

“Ovanhu vahapu ova ngwangwaneka oupelesidente woshilongo noupelesidente weengudu dopolotika, oyo inai lifa. Oikako youpelesidente oya nuninwa ashike omutwe woshilongo opo u dje mo mombelewa, omanga ovaleli veengudu dopolotika va pumbwa okupewa omhito opo va lwile okulela oshilongo,” Osho a ti ngaho.

Venaani okwa ti ongomunaveta ita kendabala nande a wedele oshikako shaye ngaashi ekotamhango loPDM tali ti.

Okwa yandja oshihopaenenwa shovaleli va kulu veengudu domilameno, Hakainde Hichilema, Akuffo Addo wokoZambia,

Malawi naGhana, ovo ta ti ovalela eengudu davo oule weedula 20 no15 omanga inava ninga oopelesidente voilongo yavo.

Presidente waMalawi Lazarus Chakwera okwa li omuleli wongudu yomilameno oule weedula 15 omanga ina hoolululwa.

“Akkufo Addo waGhana okwa lela eedula 15 omanga ina ya mombelewa, onghee nee momudo 2017 otwa kendabala tu ningulule oshinima eshi opo tu yandje omhito tu kendabale okulwila ouleli,” Venaani osho a ti ngaho.

Okwa li a hoololwa opo a ninge pelesidente woPDM tete momudo 2014 ndee ta hoolululwa momudo 2019.

Ngee okwa hoolululwa neudo, oshikako shaye oshititatu, osho natango tashi kala shaxuuninwa, otashi ke ya pexulilo momudo 2029.

OSHIHOLEKWA
Hamushangandjai wongudu, Manuel Ngaringobe, okwa koleka ehalo laye opo ku ka ningwe omahoololo, ashike ina popya kutya otaa ka ningwa naini.

“Ngee efimbo la fiki, ohandi ka ninga eshiivifo. Otashi ka ningwa diva. Ohatu ke shi shiivifa ngaashi ekotamhango longudu yetu tali ti. Oikundaneki aishe oi na okushishiiva,” Osho a ti ngaho oshivike sha dja ko.

Odjo imwe yomongudu oya holola kutya ongudumutima otai ongala tete opo i ninge etokolo lefiku olo oshoongalele tashi ka ningwa, osho shi na okushiivifwa ku na omafiku o60 opo shi ka ningwe.

Odjo imwe oya pula opo oo a li nale oshilyo shopaliamente shongudu Johannes Martin a ka kondjife Ngaringobe, nande Martin yeemwe eshi okwe shi anya oshivike sha djako anya, ta ti: Oshinima shoshoongalele kandi shishi.”

Omuleli mu ku wevava lovanyasha Benson Katjirijova okwa ti yee okuna ohokwe opo a kufe ombinga momafiyafanepo oupedu hamaushangandjai wongudu, oo paife u li kwaao a li nale kamusela wodoolopa yaShakati, Linus Tobias.

Omafiyafano oupedu pelesidente otaa monika taa ka kala a kindja, Elma Dienda naye okwa hala okukufa ombinga.

Ota ka taalela efiyafano lidjuu kwaao e li mombelwa nale Jennifer van den Heever naEsmeralda !Abes.

Ashike nee, Dienda oshinima eshi okwe shi anya eshi a dengelwa Etine loshivike sha dja ko.

“Penge ashike edina lomunhu ou e ku lombwela oipupulu ei. Inandi lombwela nande omunhu kutya ondi na ohokwe yokukufa ombinga momafiyafano asha koshoongalele osho tashi ka ningwa.

“Pula odjo yoye opo i ku ombwele kutya oshinima osho onde shi lombwela lyelye. Kashi shi shoshili. Inandi shi dilaadila nokuli,” Osho a ti ngaho.

Van den Heever okwa koleka kutya natango okwa hala opo a hoolululwe a ninge omupedu pelesidente wongudu.
“Eheno ohandi ka kufa ombinga,” Osho a ti ngaho.

Nico Smit, oo e li ha unganunga noimaliwa yongudu paife, natango ina popya ehalo laye.

“Otashi dulika ndi shi tambule ko,” Osho a ti ngaho.

Smit otashi dulika a ka kondjifwe koshilyo shimwe shongudu, Pieter Mostert.

Mostert okwa lombwela oThe Namibian Etine loshivike sha dja ko kutya ovanhu vahapu mongudu yoPDM ove mu pula opo a ye pomhito oyo, ashike okwe shi anya.

“Nghee ashike nda dile mopaliamente, onda tokola opo ndi kale kokule kashona nopolotika. Inandi hala okukufa ombinga monghatu yasha paife,” Osho a ti ngaho.

Omunashipundi wongudu Diederik Vries ota ka kondjifa Godfred Mwilima ponghatu opo e li paife.

Mwilima okwa ti ngee okuna ohokwe yokukondjela onghatu oyo kashi shi oilonga yoikundaneki.

“Odiva unene kwaame opo ndi tye ko sha, ashike kandi na nande ohokwe yasha monghatu yasha yongudu,” Osho a ti ngaho.