“PAIFE OTWE lilongekida okuninga oinima iwa oyo twa hala!”
Oshinima eshi omukokoli presidente Sam Nujoma okwe shi popya konima yokuhoolola momahoololo otete epangelo laye la longekida mokuulika kutya Namibia okwa li a manguluka moshili nota dulu okukwatela komesho oipambele yaye mwene.
Opa pita eedula di dule po30 paife eshi Nujoma kwa li a popya oshitumbula eshi shohokwe ndee yee novalanduli vaye otava monika va fa osho lela va hala okuninga – kutya otava dulu okuninga keshe shimwe va hala – kutya nee otashi pula shike.
Presidente Netumbo Nandi-Ndaitwah okwe litula mo, tau daneke okutula omaudeneko oSwapo moilonga oo a ningwa pefimbo lomahoololo “kutya nee otashi pula shike”, ashike okwa weda mo yo oinima imwe i yolifa ngaashi okutunga onhele yokudinda omahooli, ehongo loshali nokwaalula Air Namibia.
Eedjodi odi na oilonga yado. Odi na oshilonga shokuwilika ovanhu va ninge oinima iwa, va lalakanene oinima yakula.
Ashike okupeduka konima yondjodi iwa ndee to kala u wete u li nale nawa osha fa ngaa engwangwano kashona.
Ovanapolitika nookaume kavo ve li mo nawa otashi dulika shi kale osho etomeno Namibia e na eengunga dihapu odo tadi futwa kovafuti voishoshela, ashike kapu na nee eshi tashi ya po kutya nee omeliko ile omoiyemo yopashimaliwa.
Ngee opu na oshinima shimwe shi nyanyaleka tashi ulikwa kokaulikifo koluhepo efano li nyanyalifa: Ovanambia ve li vahamano vomovanhu omulongo kave shi kutya openi tava ka hanga oikulya yavo oshikando tashi landula, etata lOvanamibia kali na olusheno neepelesenda ashike dihe fike nopomulongo dounona va tameka ondodo yotete da dula okufika kondodo 11 no12.
Ndee natango oshilongo otashi tilile ashike eebiliyona meeproyeka ngaashi oyo yokutuvikila omahooli komukunghulofuta yongushu yeebiliyona N$7.5, oko ehangano lomahooli opashiwana la kala nokupitika oumbudi womahooli puhe na okuyandja omahandukilo.
Eebiliyona dihapu oda kala nokulongifwa mokutunga eembelewa depangelo dondilo puhe na nande eyambukepo mokuyandja omayakulo, nondama yaNeckartal okwa li ya longwa koshimaliwa shi fike peebiliyona N$5.5 – ndee konima yeedula omulongo ondunge yokutekela oikunino kai na apa ya ya.
Eebiliyona dihapu oda kala nokulongifwa eendjila dondilo ashike kapu na okuyambula po eemumbwe dopaliko doyeendifo noshiwana shaNamibia shihapu.
Pauxupi, exumokomesho laNamibia ola tala shike mokutunga omatungo noinima shama ashike i li opo nande kai na eshi tai longifwa.
Nujoma okwa li a pula ku tungwe olutenda okudja moTsumeb okuya kOshikango kongushu yoshimaliwa shi fike peebiliyona N$3 pefimbo loshikako shaye.
Fiyo onena, omalutenda kee na eshi taa eta po okwa fya filufilu.
Oinima idjuu oya kala nokufininikwa yeende keepate daNambia, osho tashi eta ku longifwe oshimaliwa shihapu mokuwapaleka eendjila shaashi omaloli akula nomashina otaa teya po eendjila dondilo odo opo da tungwa.
Noinima ashike ya nafangwa ngaashi outomeno, epangelo otali dopa ashike oku va kwatela komesho.
Otava fininike onguduwiliki yaMeatco i ulikulule omukulunhuwiliki ou ngaa pefimbo laye kwa li kwa longifwa oshimaliwa shovafuti voisheshela shi fike lwopobiliyona imwe kukulilwe mo ehangono lepangelo lokutoma, olo la dopa okufuta ovalongi, mwa kwatelwa novanafaalama.
Otashi shiva ngaa okutula oimaliwa meeproyeka dondilo manga taku ekelwashi okulonga oikulya yawana ngaashi ounafaalama wokulonga ashike oikulya?
Ngee Nandi-Ndaitwah okwa shikula meemhadi davakwao nena Ovanamibia nave lipule kutya ovaleli vetu va hoololwa ihave lihongele oshilongwa koinima yeedula 35 demanguluko.
Katu na apa hatu dulu okuya ngee ohatu nyengwa ashike nokoinima yanafangwa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
