Omulumenhu (58) wokomukunda wedina Omaalala moshitopolwahoololo shaShana okwa li a holoka momamhangu yamagestrata Omaandaxa eshi vati ta ningile ounona voumati vofikola omahepeko noku va udanekela oimaliwa noku va heka noikulya noumbashikela.
Gabriel Alfonso okwa li a mangwa po molwomahepeko nokuningila okamati kofikola keedula 13 omahepeko opamilele kOmaalala.
Odjo oyo oukwatya wayo itau hololwa oya lombwela omukulunhu wopolifi yaNamibia komufalandjai Joseph Shikongo, koshoongalele shoshiwana osho sha li puAdolf momafiku 02 Mei kutya omulumenhu ou okwa kala nokushiva ounona voumati keumbo laye nokwa kala noku va heka nomaano peemhito da yooloka.
“Ounona vetu voumati kave na vali eameno momukunda omu. Ounona ava ohava ongala meumbo lomufeekelwa keshe efiku konima yofikola te va udanekele oikulya nuungeima.
Ohe va shivi keumbo laye ndee te va ningile omahepeko opamilele.
Oumati vamwe ova popya, ashike vamwe ova tila okweehamekwa ngee ove shi popi.
Omulumenhu ou oha dulu yoo okukaleka ounona meumbo laye omafiku onhumba ndee nomafimbo amwe ohava dopa nokuya keetundi nokuli,” Odjo osho ya ti ngaho.
Odjo oya lombwela Shikongo kutya ova kendabala okutulila mo omufeekelwa oshibofa peemhito dihapu koshitaashi shopolifi kOngwediva ashike kapu na eshi sha ningwa po, ta ti okwa li va shunifwa ko kovanambelewa vopolifi ovo ve va pula ngee okwa li ngaa ve na ouyelele kutya opu na oshimbuluma sha ningwa.
“Otu na oumbada ndee katu shi kutya olyelye te tu vatele. Eshi kwa li twa ya kopolifi yaShakati, okwa li twa lombwelwa kutya omukunda wetu ou li koshi yoshitaashi shopolifi shaNgwediva, onghee nee itatu dulu okupatulula oshibofa oko,” Osho a ti ngaho.
Shikongo okwa holola onghumwe kombinga yoshiningwanima, ndee ta lombwele opolifi opo i mone kutya olyelye omunambelewa omulumenhu oo a shunifa ko oshiwana opo a taalele oilanduli yaasho a ninga.
Okwa lombwela vali opolifi opo i landule oshingwanima eshi ndee tai vatele oshiwana shi tulile mo omufeekelwa oshibofa.
Alfonso okwa li a mangwa po konima omudali wanakuningwa oshihakanwa umwe a lopota oshibofa kopolifi.
Olopota yoimbuluma yopolifi oya ti, otaku tiwa vati pokati komudo 2022 naOktoba 2024, omufeekelwa okwa kala ha ifana nakuningwa oshihakanwa keumbo laye, te mu telekele onyama ndee tava shingi okambashikela pamwe.
Konguloshi, nakuningwa oshihakanwa vati oha nangala kombete imwe naAlfonso, oo ha lombwele okaana ka kufe mo oikutu shaashi meumbo omu na oshilulu. Konima yaashi, omufeekelwa vati oha ningile okaana omahepeko opamilele.
Alfonso okwa li a pewa obooloha yoshimaliwa shi fike poN$1 500 noshibofa shaye osha undulilwa komafiku 21 Juli 2025.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
