Osikola yaShuulagulwa ya pewa uulamba wolusheno

OSIKOLA Oshuulagulwa mOngandjera moshikandjohogololo Okahao mOmusati ya ninga yimwe yomoosikola oonelago sho ya pewa uulamba wolusheno lwoketango, sha ningwa mEtine lyoshiwike sha zi ko, mu2 Juli 2015.

Oolamba ndhika odha pewa omukuluntusikola meme Lahja Alweendo komukalelipo gwehangano lyaSheya shUushona, tate Kaleb Sebedeus, ngoka a li a ende pamwe niilyo yewilikongundu lyaSheya shUushona; omuunganeki gwokuti kwa gamenwa kwaSheya shUushona meme Hilda Namwenyo Nathinge, omusita tatekulu Matti Amadhila, tatekulu Filippus Kanana tatekulu Vaino Iipinge Kelimwe, amushanga gwaSheya shUushona Wellem Amutenya niilyo yilwe, nosho wo omusita Fillemon Nampadhi.

Omupongololi gwaSheya shUushona, meme Nathinge okwa hokololele oshifo shika kutya omagano guulamba, Sheya shUushona okwe ga pewa kehangano lyedhina Oliphant Energy, naSheya shUushona okwa tokola nee e ga pe osikola yaShuulagulwa.

Pethimbo ta gandja omagano ngaka, tate Sebedeus okwa ti iilyo yetonatelo lyaSheya shUushona pamwe newilikongundu oyu uvite uunambano sho taya gandja omagano kosikola opo aanona yi ilonge ye na uuyelele shi vulithe pethimbo ndika sho hayi ilongo taya minikile niikuni.

“Otatu yolele ketayego pamwe nomahangano gokugandja omagano nomayambidhidho ge na sha nehumokomeho moshilongo shomapendafule. Omahangano ngashi NDT, WWF ngoka tage tu kwatakanitha kumwe nuuyuni wopondje ngashi Elephant Energy US Board of Trustees, otatu ga pandula noonkondo.

“Iyaloo omahewa getu gopiikuni nomeya,” tate Sebedeus ta ti ngawo nokugwedha po ta ti Sheya shUushona oku na oshinakugwanithwa oshinene shokutopolelathana omauwanawa naakwashigwana ye.

Ta ti ope na omauwanawa ngono to ga mono nomeho nenge to ga kwata noonyala, po ope na wo ngono ihaga monika, ashike iiyimati yomauwanawa gopaali, notatu vulu oku yi tyapula atuheni pehulilo lyesiku.

Tate Sebedeus ta gwedha ko ta ti moshilongo shaKale kaAmadhila ehumokomeho otali nyangwaanyangwa. Omeya ga yela nomalusheno oge li koohandimwe. Oosikola dhimwe, omalukanda noondingosho odho dhi na omeya nomalusheno, ihe momikunda momagumbo omu na omilema nomeya gomaupa.

Nande ongawo, tate Sebedeus okwa ti yimwe yopahumokomeho oye yi li ngaa hwepo. Ta ti aanasikola ngele ya piti mo mootundi, ehumokomeho ohaye li thigi moongulu dhosikola shoka tashi eta eilongo niinyangadhalwa yokomagumbo yi kale inayi ihwapo, shashi komagumbo komikunda hoka kaku na iikwaniipangitho.

Tate Sebedeus ta ti komagumbo aanasikola ohaya lesha niikuni yomililo, shoka aluhe hashi eta omambo gawo ga pye nenge ga gagale komidhilo dhomulilo gwiikuni.

Yamwe otaya lesha nuulehite mboka hashi vulika wu ete uupyakadhi kaalongwa, sho omulongwa ngoka tashi vulika a thige okalehite ka tema sho ta kotha ee taka fike okalili ke, mpoka tashi vulika naye a pile mo nokuli.

“Yayee oluhepo! Otwe shi konekeni tuu?” Tate Sebedeus ta ti nokupula, nokugwedha po ta ti aaholimbili osho ya tondoka onkugo.

“Okungo yepongo okalunga he yi tondoka. Aaholimbili, aasamaritana aanamutimahenda oye tu peni omagano goolamba dhopaunongononi okuzilila moonte dhetango,” tate Sebedeus ta lombwele omukuluntusikola, aalongi naanona yoposikola yaShuulagulwa ngawo nokugwedha po ta yelitha kutya uulamba mbuka kau na oshilanduli ngashi okalehita nenge omulilo gwiikuni, gwomapumba nogwiihenguti.

Ta ti mbuno uuyelele wa huma, wa yela nawa noku na okulandulwa omilandu nomalandulathano ga tulwa po opo shi ende nawa.

“Aanona etango otu li sheni nawa nkene hali tu minikileni omutenya. Ano, paunongononi otali vulu wo okugandja oonkondo noonte dhalyo kosola ndele omuntu to vulu okuminikila wo uusiku,” tate Sebedeus ta ti nokugwedha ko ta ti okugandja omagano okutsilika, noto tsilike opo ngula shi galuke.

Sheya shUushona okwa hala uulamba mbuka wu longithwe nawa opo kehe omulongwa ngoka ta longitha okalamba haka, ngele oha piti nooperesenda kwali dhi li pooperesenda omilongontano, ngashiingeyi, sho ta longitha okalamba haka, a gwedhe ko ooperesenda omilongontano opo a kale ta piti nooperesenda ethele.

“Otwe mu halela oonkondo nuupenda mokukalongitha uulamba mbuka. Onkee ano, pehala lyaSheya shUushona nopehala yandje mwene, otandi gandja uulamba mbuka kosikola yopevi yaShuulagulwa pambelewa.

Kwathathaneni, longeleni kumwe, niiyimati nayi monike,” Sebedeus a ti.

Omukuluntusikola, meme Alweendo nosho wo meme Ester Kambungu, omunashipundi gwelelonongelo, oya pandula noonkondo Sheya shUushona newiliko lye sho ye ya ningila oshinima oshinene shoku ya pa uulamba mboka. Taya ti oya kala taya nana nondatu lela ngele tashi ya komalusheno, noye wete kutya uulamba mbuka, wu na onkalamwenyo yomimvo ntano lwaampoka, otau ke ya thikitha kelago lyokumona omalusheno gogene. Taya ti kutya otaye ke wu longitha naanaa ngashi wa nuninwa.

Omukuluntusikola okwa ti osikola yawo oyi na aanona 508, aalongisikola 22, ooHOD yaali, amushanga naaopaleki yaali.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.