Ongudumutima yoSwapo otai ka tokola mOlomakaya ngee otaku ka ningwa oshoongalele shokuhoolola pelesidente wongudu, omupedu hamushangandjai woSwapo Uahekua Herunga osho a lombwela oThe Namibian Omaandaxa.
Oshoongalele eshi okwa teelelika shi ka hoolole pelesidente wongudu nomupedu pelesident.
Herunga okwati ovanhu ovo tava pula opo ku ningwe oshoongalele nava teelele manga opo ongudumutima i tokole oshinima shi li ngaho mOlomakaya eli twa yuka. “Otai tokola ashike mexuliloshivike noshiwana otashi ka shiivifilwa kutya okwa tokolwa shike,” Herunga osho a ti ngaho.
Efyo lomupelesidente Geingob omwedi wa dja ko ola eta mo eemhito melelo loSwapo.
Ovaleli vamwe vongudu ova itavela kutya omupedu pelesidente Netumbo Nandi-Ndaitwah na ninge pelesidente wongudu nande ina hoololwa koshoongalele shongudu osho hashi hoolola pelesidente wongudu. Ashike nee, oilyo imwe yoSwapo otai ti oshi li ominge nekotamhango longudu.
Ongudumutima yoSwapo oi yadi ovanhu ovo tava popile Nandi-Ndaitwah a ninge pelesidente wongudu.
“Otashi li kundwa nale kongudumutima, novanhu ove na okutokola,” Amathila osho a ti ngaho.
Inashi yela kutya olye ta ka kufa ombinga meemhito odo di li moSwapo natango.
Ominista yetanga leameno noinima yoo nakulwa va kulu, Frans Kapofi, Oshoondaxa okwaanya okuya moshipale ehalo lapelesidente.
“Inandi lombwela nale nande oumwe, ile nda popya nande ehalo. Okwa li ashike nale eshi nda li omukufimbinga ndee handi likufa mo, oto ti ame omunhu ashike ou nena ota ti ngaha mongula ota ti ngaha?
Ame hasho ndi li ngaho,” Kapofi osho a ti ngaho.
Okwa ti ovo va hala naavo inava hala a kufe ombinga inave mu kwatela mo moinima
yavo.
Oilyo imwe yongudu otai ti oya hala omunhu iha popi Oshiwambo oye a ninge omupedu pelesidente.
Ovanhu ovo va talika ongaashi, oo a li nale hamushanga wevava lovanyasha voSwapo Elija Ngurare nomupedu pelesidente John Mutorwa.
Omuprima minister mu kulu Nahas Angula, okwa ti ovo inava hala oshoongalele shokuhoolola pelesidente wongudu otava teya ekotamhango longudu.
“Oshike va hala okuteya ekotamhango longudu yavo vene? Oshike tashi va kelele ngee ova findana okuteya ekotamhango laNamibia.
Angula osho a ti ngaho. Shifokundaneki shoThe Namibian Etitano osha kundaneka kutya onguduwiliki yoSwapo oya koleka Nandi-Ndaitwah opo a ninge pelesidente woSwapo momahoololoopashiwana aa e li ko muNovemba neudo.
Onguduwiliki natango oya hala opo oshoongalele osho hashi hoolola pelesidente wongudu shi ka ningwe momudo 2025 opo ku kelelwe omatopokafano mongudu omanga ashike ku na mwedi umwe ku ningwe omahoololo oupelesidente opashiwana.
Oilyo oyo yah ala okukufa ombinga momahoololo oupelesidente wongudu oya ningila nale ongudu omatilifo opaveta.
Konima yoivike ivali ominista i kulu yokabinete Jerry Ekandjo, okwa ti okwa itavela kutya omhito youpelesidente wongudu koshoongalele nai ningwe yovalumenhu, opo melelo longudu mu kale muna omwaalu ufike pamwe wootate noomeme.
“Oshitwa sha kula osheshi kutya ovalumenhu ashike nava ye momahoololo oupelesidente woSwapo koshoongalele osho tashi ka ningwa,” Ekandjo osho a ti ngaho.
Pefimbo kwa li ta ningilwa omapulaapulo koThe Namibian okwa pula Nandi-Ndaitwah opo a fiye po oionga ngee okwa hala okuya momahoololo oupelesidente wongudu.
Efyo laGeingob, ola eta eemata kombinga yomwaalu woomeme notate melelo loSwapo.
Omukalo oo Swapo ha longifa oyou woufikepamwe melelo 50/50, omo ngee omupelesidente wongudu omulumenhu, omupedu pelesidente okuna okukala omukulukadi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
