Omukanda wa dja kupresidente Netumbo Nandi-Ndaitwah wa yuka kukomufalandjai wopolifi yaNamibia Joseph Shikongo owa ti oshiningwanima shomulumenhu oo a hangika mEumbo lEpangelo e li hamunghele oye etomeno loku mu pingena po.
Etivali konguloshi Nandi-Ndaitwah okwa shiivifa kutya okwa pingena po Shikongo nomupedu komufalandjai, Anne-Marie Nainda.
Eshiivifo ole ya konima yomafiku eshi kwa li omulumenhu e li hamunghele a hangika meumbo lapresidente.
Presidnte meshiivifo laye olo a yandja koshiwana ina popya nande omatomeno aye okutula Shikongo pedu.
Osho sha xwaxwameka omafeekelo ngee pamwe opa kala nale pu na eenamanana pokati kaye naShikongo.
Omunambelewa akula wepangelo e na eshiivo kombinga yomukanda ou okwa koleka koThe Namibian Etitatu kutya eameno la nghundipala lEumbo lEpangelo olo etomeno a tulwa pedu.
Omukanda okwa li wa andjakanekwa Etivali konima yoyoongalele yoshikondo sheameno sha shi ya ko novanapolitika ovo hava ningi omatokolo.
Omapulo natango ee li kombinga yovanambelewa voshikondo sheameno sha shi ya ko, mwa kwatelwa omapopyo kutya ongadjo yEumbo lEpangelo ohai kala nale ya kondekwa koilyo yetanga leameno.
Ovanambelewa vati okwa li va tukifwa va ye kOshakati koshoongalele osho konima sha ka talika sha fa oshoongalele shokomisi yomayakulo.
Koshoongalele, oministili imwe ya pamba eamenoo okwa li tai pula Shikongo aha taatawe, tai ti okwa li ta longo oilonga i shii okupandulwa, ashike nande ongaho, kakwa li vali pu na okutala konima.
Etomeno limwe olo la tulifa Shikongo pedu osheshi vati a nukila pomutenye kutya ita taataya omukulunhu weameno lapresidente mukulu komisina Andreas Nelumbu nomukulunhu woshikondo sheameno lovafimanekwa kEumbo lEpangelo Michael Abraham.
Shikongo otaku tiwa vati okwa nyamukula kutya eeveta doilonga inadi pitika omalundilo opaumwene, puhe na oumbangi.
Shikongo okwa li a tulwa pedu konima yomafiku anhe eshi Giano Seibeb, a hangika e li hamunghele meumbo lapresidente kEumbo lEpangelo.
Manga etulopedu laye inali shiivifwa moshiwana, Shikongo oo vati kwa li e li kondje yoodoolopa pefimbo oshiningwanima sha ningwa, okwa li a ya momutumba napresidente ongula yOmaandaxa.
Odjo i na ouyelele kombinga yomutumba ou oya lombwela oThe Namibian kutya presidente okwa holola kutya ina panda osho ta ti omalongekido eameno a nghundipala.
Omukulunhuwiliki wehangano ledina Namrights, Phil ya Nangoloh okwa ti omatomeno okukufa Shikongo moilonga itaa tu kumwe.
“Ongomundjadjukununi woipambele yeameno lopombada, ondi wete kutya kapu na omunhu ta dulu okuya mEumbo lEpangelo, unene ngaa nokuli meumbo lapresidente lopaumwene, ina ningilwa okahanda,” Ya Nangoloh ta ti.
“Oshitivali, opo u ye fiyo okeumbo lopaumwe lapresidente, omunhu oku na okupita peenhele dihapu deameno ile pomainda opolifi ile ongudu yeameno la shi ya ko.
Natango, omunhu ita dulu okupita omainda aeshe oo eameno, shapo ongeenge a ningilwa omakonakono eameno aeshe a pumbiwa.”
Okwa ti vali Shikongo omunhu ashike a tanwa.
Ashike nande ongaho, omuleli wongudu yoPopular Democratic Movement (PDM), McHenry Venaani okwa ti presidente ina teelelika a yandje omatomeno kutya omolwashike a kufa Shikongo moilonga.
Eshi kwa li ta popi noThe Namibian Etitatu, Venaani okwa ti presidente oku na oufemba wefinamhango wokuulika nokukufa moilonga ovanambelewa vakula vepangelo.
“Oo omaufemba opafinamhango. Keshe omunapolitika ta ti presidente na fatulule etokolo laye ke udite ko oukwatya wouyelele oo u li kupresidente eshi ta ningi omatokolo a tya ngaho,” osho a ti ngaho.
Venaani okwa ti presidente ota dulu okuninga omatokolo a tya ngaho a kelele omikundu donhumba ndee itashi ti na yandje omatomeno koshiwana.
Omuleli wongudu yoAffirmaive Repositioning (AR), Job Amupanda komalungula okwa ti kutya etokolo eli kali li mondjila.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
