Oshivu shoCongo Fever sha faalele omwenyo gwomuntu mOvenduka

Omuvu gwomulumentu ngoka kwa li a tuminwa koshipangelo kOvenduka okuza koGobabis, oshiwike sha zi ko,okwa mana oondjenda koshivu shoCongo Fever mehala lyokwiikalekelwa moshipangelo shaWindhoek Central, mEtine lya zi ko.

Omukuluntuwiliki gUuministili wUundjolowele nOmayakulo gOnkalonawa Ben Nangombe, oye tseyitha kutya eso lyomuvu ngoka okupitila momukanda gwiikundaneki, mEtiyali.

Nangombe okwa popi kutya omuvu ngoka okwa taambelwa tango moombete dhoshipangelo shopaumwene moGobabis mEtiyali lyoshiwike sha zi ko, nolwanima okwa tuminwa koshipangelo shopaumwene shaLady Pohamba Private Hospital mOvenduka, esiku lya landula.

MEtine lya zi ko, okwa taambelwa mehala lyi ikalekelwa moshipangelo shaWindhoek Central, moka a manene oondjenda lwanima esiku ndyoka.

Nangombe okwa popi kutya oshizemo okuza kolabora mOsoondaha, oshu ulike kutya omuvu ngoka okwa hulitha kombuto yoCrimean-Congo haemorrhagic (ano oCongo Fever).

Oshivu shoka otaku hokololwa ya nika oshiponga nohayi taandele meendelelo, nohayi vulu okufaalela omuntu mbala.

Ombuto ndjoka ohayi taandele mekwatathano pokati komuvu nomuntu pashikunguluki nenge uuna omuntu a kwatathana noshinamwenyo sha kwatwa kombuto ndjoka.

Omuntu oha vulu wo okukwatwa koCongo Fever uuna a lika kongupa nenge a kwata oongupa inaa zala omanyala, osho Nangombe a gwedha po ngaaka.

Nangombe okwa popi kutya muule woomvula heyali dha piti, sigo oompaka ombuto yoCongo Fever oya monika maantu kumwe ye li yahamano, moka yatatu yomuyo ya faalelwa kombuto ndjoka.

Okwa gwedha po kutya aantu ye li 27 mboka ya tothwa mo ya li mekwatathano nomuvu ngoka a mana oondjenda oshiwike sha zi ko, oye li metonatelo lyuuhaku.

Maantu mboka ya li mekwatathano nomuvu, ye li 24 aaniilonga yuuhaku, gumwe omuniilonga pamwe nomuvu omanga yaali aanegumbo.

Omandhindhiliko gombuto yoCongo Fever oga kwatela mo uuwehame womutse, epupyalo lyi li pombanda, uuwahame mepunda nopomatsakaneno gomasipa, onkungo, uuwehame itaawu ti po hwepo, omukota – okutumbula po ashike yimwe.