Eefamily dihapu moshitopolwahoololo shaShikoto otadi mono oixuna komumbwe yomeva, onghalo otai naipala keshe efiku eshi okwenye kwa yuka mokati, osho tashi ningi omumbwe yomeva oupyakadi wakeshe efiku, unene ngaa momikunda ngaashi Onalukula.
Omunambelewa wepangelo Stephenson Tuukondjele okwa ti omumbwe yomeva kai li ashike kOnalukula, ashike oi li moshitopolwahoololo ashishe, ta weda po kutya oupyakadi ou neudo owa lunda nee unene woo owa tameka vali unene diva shi dulife shito.
“Shito ohatu mono omumbwe yomeva lwopuOktoba naNovemba, ashike neudo, eenhele dimwe oda kukuta petameko laJuli.
Omeva oo haa di koAngola, okupitila mominino da yooloka, aa dopa okushakeneka omumbwe yomomaumbo noyoimuna molwomumbwe tai i pombada.
Mupya munene, otu li koxulo yosystema yakula, ndee omeva inaa wanena ashike nandenande eemumbwe detu,” osho a ti ngaho.
Ovakalimo noshilyo shokomitiye yomeva yOnalukula, ova ti oshiwana osha kala shi na oupyakadi ou omido dihapu ndee ohau naipala ngee odula ya sheka.
“Odula ei okwa li sha piyaana unene. Okudja muJuni, inatu mona omeva. Omunino womoEben-Ezer owa kukuta filufilu, ndee oupomba vetu ihava ende vali,” osho a ti ngaho.
Monghendabala yokuwanifa po eemumbwe da keshe efiku, Haimbodi novakalimo vakwao ova fininikwa va lande omeva momaumbo opoushiinda omo mu na omeva taa ende. Ashike nee, otaa ningi ondilo paife, osho a ti ngaho.
“Omukundu wakeshe efiku. Ovanhu otava pula oshimaliwa shi fike poN$5 noN$20 mokandini keelita 5 ndee ngee kapu na oiyemo kakele kopendjela, oshidjuu okuwanifa,” osho a ti ngaho.
Haimbodi (50) okwa weda po kutya ovanhu vahapu ova taalela omukundu ou ndee oshidjuu shaashi ove na okulanda omeva keshe efiku.
Shaashi iha dulu okweenda Haimbodi oku na okufuta vakwao ve ke mu talele omeva, luhapu tava longifa oyeendifo ile outemba veendongi, koshimaliwa sha wedwa po okudja poN$10 fiyo oN$20 keshe molweefo.
Haimbodi noilyo ikwao yokomitiye ova kendabala okuya keembelewa depangelo da yooloka va ka mone omakwafo, ashike okwa ti eenghendabala davo kadi na eshi da pondola.
“Onda dengela ombelewa yomeva moshitopolwa, ombelewa yakamusela nombelewa yangoloneya.
Okwa li hava nyamukula, ashike paife, kapu na vali omunhu ha kufa po,” Haimbodi osho a ti ngaho, ta ti vali oshiwana inashi etelwa nande omeva kepangelo eemwedi dihapu.
“Ondi na oumbapila vomafutilo omeva tava holola kutya onda futila omeva kokapomba ketu koshiwana, ndee natango inandi mona ololi tai ya okuhandeka otenga yetu oule weemwedi dihapu.
Omumbwe yomeva inai denga ashike omaumbo etu, ashike noimuna yetu yoo.
Oikombo yetu neengobe oda fya enota,” osho a ti ngaho.
Onghalo ei natango oya kuma oprima fikola yaEben-Ezer, i li momukunda, ovadali ohava lande omeva ndee tave a twala kofikola opo ounona vavo va mone omauwa opolohalama yokutelekela ounona kofikola.
“Noundjuwo kofikola kave na omeva. Oshilengifa neenghono,” osho a weda po ngaho.
Haimbodi okwa pula epangelo li wapaleke ominino odo da kulupa meendelelo koEben-Ezer.
Mokunyamukula, Tuukondjela okwa ti ominino otadi longwa, ashike oilonga otai ende kashona molwoinima ngaashi omumbwe yolusheno olo hali dimi nokuya moshipala oilonga yokudinda omeva nokwaapomba.
Epangelo ola kala nokutuma eeloli domeva keenhele edi da kumwa omalweefo a yooloka, ashike kapu na naana oipumbiwa ya wana; onghee otava dulu ashike okutwala omeva keenhele dimwe po keshe mefiku.
“Ohatu ningi keshe osho hatu dulu noikwatifo ei i li po, ashike omukundu wakula okutwala omeva komikunda di dulife po150 neeloli ashike dishona,” Tukondjele osho a ti ngaho.
Eenghendabala daalushe, ngaashi oproyeka yomeva yokOshivelo nokufula eemboola, di li mondjila ku kandulwe po omukundu ou, osho a weda po ngaho. – NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
