Oshitopolahoolo shaKhomas osho sha lopotwa shi na oimbula yopaukakwashikekookanhu i li pombada, otaku ti wa oibofa yoludi eli i li 3 302 okwa li ya lopotwa pokati kaJanuali 2020 naDesemba 2023.
Oshitopolwa eshi osha landulwa koshitopolwahoololo shaHangwena osho sha lopotwa shi na oibofa ei i li 1 807, oHardap i na oibofa i li 1 746 nOshana i na oibofa i li 1 459.
Omwaalu ou owa ya djwa molopota oyo kwa li ya yandjwa kopolifi yaNamibia Etitatu.
Oshilongo ashishe osha didilika oibofa yopaukakakwashikekookanhu i li 17 669 meedula nhee twa dja, ashike oibofa oyo i li 14 349 okwa li ovakainhu va ningilwa ominyonena.
Momudo 2023, okwa li mu na oibofa i li 4 731, 4 516 momudo 2023, noibofa i li 4 078 momudo 2020.
Opolifi natango oya holola kutya eepelesenda 81,2 doibofa ei kwa li ya lopotwa okwa li ovakainhu va ningilwa ominyonena, omanga eepelesenda 18,78 okwa li dovalumenhu.
Oitopolwahoololo oyo ya lopotwa i na omwaalu woimbuluma yoludi eli u li pedu ongaashi Kavango Uninginino (408), Kunene (476), Omaheke (502), noZambezi (730).
Ouyelele ou u li po otau ti oibofa ihapu oyo mahepeko opalutu, omahepeko nelalakano lokweehameka olutu shi nyanyalifa noshoyo okuteyaalula po omaliko.
‘OUPYAKADI WA KULA’
Omuxungimwenyo a kula kehangano ledina #BeFree Youth Campus, Pefimbo Shipunda, Etitatu okwa ti omahepeko opaukakwashikekookanhu okuli oupyakadi wa kula wopashiwa oo tau etwa kokuhefikepamwe, sha kwa tela mo omunhu umwe oo e na etaitavelo kutya okuna eenghono e dule mukwao.
“Atushe otwa pumbwa okulundulula onghalo ei ndee hatu xulifa po okukala twe likolele momaitavelo a yooloka oo haa longifwa ongomatomeno okuninga omahepeko oludi eli, sho osho tashi twala oimbuluma ei i twikile momidingonoko detu,” Osho a ti ngaho.
Shipunda okwa yandja oshiholelwa shovanhu ovo ve li momakwatafano e na omahepeko, ngaashi eehombo, ovo ve wete kutya itava teya eehombo shaashi oshi li ominge nomufyuululwakalo noinima ikwao yopanghalafano, ngaashi okukala wa tala momunhu pamaxupilo nomaitavelo okutya ovanhu ava ve li meehombo ove na oshilonga moshiwana. Omunandjungu woinima ya pamba onghalafano Rosa Namises Etitatu okwa ti omahepeko aa kala nokuya pombada neenghono eedula dihapu, ashike kapu na nande osho tashi ningwa po opo kuxulifwepo onghalo yatya ngaha. Okwa denga omufindo komumbwe yeeveta nomilandu, ngaashi odo do kukelela oimbuluma naado doilonga, opo di tulwe moilonga nelitulemo.
“Eeno, eeveta oda tulwa moilonga, ashike oda pumbwa okulongifwa, shaashi otadi monika da fa dihe na eshi tadi longa.” Osho a ti ngaho. Namises okwa lombwela epangelo opo li tule moilonga oveta i na sha nomahepeko ovanhu ndee tali tameke okuninga omalunduluko meeveta odo inadi pumbiwa vali. “Okatendo opo ka kala, ashike natango oibofa yomahepeko oya kala nokuya komesho, omhangu ohai kwata efimbo, opapeko otaa kana, ovanhu otava kufa mo oibofa molwoumbada noshiwana itashi yambulwa po,” Osho a ti ngaho.
Namises natango okwa denga omufindo kefimano nokutota omahongo oshiwana opo shi kale shi na oshinakuwanifa nokukala shi shi eeveta odo tadi shi amene.
“Ovanhu ohave shi popi ashike, ashike kave na eshi tava ningi po kombinga yasho. Ngee onde shi pondola ongokandidate youpelesidente, ohadi ningi omahepeko opaukakwashikekookanhu oshinima shopashiwana, osho tashi ifana Ovanamibia opo va kufe ko eenghaku kombinga yomahepeko,” Osho a ti ngaho.
Namises okwa ti eshi kashi shi ashike oshitwa shopolotika, ashike okwa kala nale nokushininga omanga ina tameka okukufa ombinga momahoololo oupelesidente.
Namises okwa twa ovanhu omukumo opo va kale hava kongo omavatelo, ponhele yokutana ovakwashiwana ovo vehe na eenghono momudingonoko.
Oo a li nale omukulunhuwiliki welelodoolopa laKaribib Lydia Kandetu Etitau okwa ti iha kofa vali molwomahepeko oludi eli.
Naye okwa shiivifa Etitatu kutya ota ka kufa ombinga momahoololo oupelesidente.
“Ongomudalakadi, keshe efiku ohandi lipula ngee ounona vange ovo tava shikula ko koihakanwa yomahepeko opaukakwashikekookanhu,” Osho a ti ngaho.
Kandetu okwa ti oshinima eshi osha pumbwa okuungaungwa nasho kovakainhu, shaashi oshe va kuma unene.
“Opu na omumbwe yokukwatela mo ovaleli vopamufyuululwakalo, ovanyasha, omahangano omomidingonoko noshiwana shaNamibia ashishe.
“Omumbwe yomalukalwa opo ovakainhu tava dulu okukonga omakwafo ndee tava amenwa ngee ve li moshiponga oyo tai eta omwaalu uye pombada,” Osho ati ngaho.Natango Kandetu okwa pula ovakainhu opo va kale ve shi ongushu yavo, omanga natango va pumbwa okukala ve shi kutya Kalunga oteva amene, unene ngaa ngee epangelo la dopa okushininga.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
