KONIMA sho oshiputudhilo shopombanda shoNUST sha tseyitha kutya itashi ka pitika nando omwiilongi e na oongunga dha konda N$1 430 a shange ekonaakono, elelo lyoNUST oli igaluluka.
Etokolo olya lundululwa molwethiminiko lyewilikongundu lyaanasikola moshiputudhilo koshiputudhilo shoka oshiwike sha zi ko.
Petameko lyomumvo nguka, NUST okwa pitika aailongi yi inyolithe oshali nando okwa li tango a tokola oku ya indika yi ishangithile moshipudhilo manga inaya futa oshimaliwa shokwiishangitha.
Omuprsidente gwongunduwiliki yaailongi moshiputudhilo, Oscar Mwandingi, okwa li a tseyitha oshiwike sha zi ko kutya aailongo otaya ka piyaganeka omakonaakono ngele mboka inaya futa oyi indikwa oku ga nyola.
Konima yehwahwameko ndika, omukuluntusikola gwoNUST, omusamane Tjama Tjivikua, okwa nyolele olutuwiliki lwaailongi moshiputudhilo omushangwauvathano, moka e ya tseyithile kutya omakemo gawo ogu uvika ko, onkene kehe ngoka e na uuthemba wokushanga ekonaakono ota vulu okushanga ekonaakono lyaMei/Juni nando ina futa.
Omukuluntuwiliki gwoshikondo shokwaandjaganeka uuyelele moshiputudhilo, Kaitira Kandjii okwa koleke etokolo lyoshiputudhilo shoka mOmaandaha.
Kandjii okwa tseyithile oshifonkundana shika kutya oshiputudhilo shawo oshi li mompumbwe onene yoshimaliwa moka sha kala ethimbo ele, molwashoka inashi kala hashi pewa oshimaliwa sha gwana kepangelo.
Okwa tseyitha kutya aawiliki yoshiputudhilo oya konaakona nokukundathana konyala iikumungu ayihe yoshiputudhilo.
Nando oshiputudhilo oshi li mompumbwe onene yoshimaliwa, Kandjii okwa ti aawiliki yasho oya tokola ya pitike aailongi mboka ye na oondjo ya shange ekonaakono, molwashoka oshi li muuwanawa wawo.
Nando aailongi moshiputudhilo shika oya pewa epitikilo ya shange ekonaakono ayehe mwa kwatelwa mboka inaya futa, aailongi mboka ye na oongunga itaya ka pewa iizemo yekonaakono, itaya ka pitikwa ya zale omaguwo, yo ishewe itaya ka pitikwa yi inyolithe oshikako oshitiyali.
Kandjii okwa tseyitha kutya elongekidho ndika olyoshikako shotango, ihe ina yelitha ngele shoka sha ningwa moshikako shotango osho wo tashi ka ningwa moshikako oshitiyali.
Kandjii okwa ndjike oonyala mevi kutya aailongi ayehe oye na okufuta oongunga dhawo, nando inaye shi ningi ngashingeyi oye na oku shi ninga monakuyiwa.
Okwa yelitha kutya ngele aantu oya hala ku gandjwe elongo lyoshali, naya tegelele pu ningwe omapekaapeko ga kwata miiti.
Petameko lyomumvo, oshiputudhilo shoNUST noshiketha shokukwathela aailongi pashimaliwa oya li ya tsu kumwe opo aailongi yi ishangithile moshiputudhilo nando kaye na oshimaliwa, ihe iya tsile wo kumwe kutya oshimaliwa shoka oshi na okufutwa opo aailongi ya pitikilwe momakonaakono manga oshikako inashi pwa ko.
Mwandingi okwa tseyitha kutya oya adha etsokumwe noshiputudhilo moshinima shomakonaakono, onkene ehololomadhilaadhilo olya kalekwa.
Okwa yelitha kutya aailongi otaya kala ye na omukumo mokufuta oongunga dhawo ngele oya pitikwa ya shange ekonaakono, molwashoka oye shi shi nawa kutya otaya humu komeho meilongo lyawo. Omakonaakono oga tameke ohela.
