Oshipotha shaafekelwa yaPhala Phala shu undulilwa komeho

Aafekelwa yAanamibia mboka taya tamanekelwa olunyala meyako lyoshimaliwa shooN$$580 000 [tashi tengenekelwa poomiliyona N$10 moshimaliwa shaNamibia] oya tegelelwa natango ya holoke mompangu ongula [10 Novemba] sha landula sho ya holoka lwotango mompangu yamangestrata gwaBela-Bela moSouth Africa, mEtiyali.

Aafekelwa Imanuwela David (39) naFroliana Joseph (31) oya holoka mompangu uunambo taya tamanekelwa olunyala meyako lyoshimaliwa mofaalama yomupresitente gwaSouth Africa, Cyril Ramaphosa, sha ningwa oomvula ndatu dha piti.

Ongula, aafekelwa mboka otaya ningi wo eindilo ya tale ngele genongo taga fe gongombe ya pewe oboloha. Ompangu oya handja wo ompito ndjoka kuDavid opo konge omukalelipo gwe gwopaveta.

Oshikondo shokumangithapo mboka taya tamanekelwa iimbuluma moSouth Africa, osha popi kutya David naJoseph otaya tamanekelwa iipotha ya kwatela mo ompangela yokuteya egumbo nelalakano lyokuyaka osho wo uufuthi, okuteya egumbo nelalakano lyokuyaka, okuteya egumbo nelalakano lyokuyaka osho wo uufuthi, osho wo elongitho lyoshimaliwa sha yakwa.

Omupopiliko gwoshikondo shoka moLimpopo, Mashudu Malabi-Dzhangi, okupitila momukunda ngoka gwa pititha mEtiyali okwa popi tati: “Oshimlaiwa shooUS$580 000 osha yakwa mofaalama yomupresitente Cyril Ramaphosa yedhina Phala Phala. Aafekelwa mboka oya tulwa miipandeko kokangundu komakonakono giimbuluma ya yaga kegonga kedhina Hawks mOsoondaha nomOmaandaha,” osho a popi ngaaka.

Okwa gwedha po kutya omakonakono ga ningwa ogu ulike kutya mesiku 1 Januali 2020, aafekelwa oya ningi ompangela yokuteya egumbo nelalakano lyokuteya ofaalama yaPhala Phala, nomomasiku 8 Januali 2020, David naafekelwa yalwe yaali oyi iteyele mofaalama yedhina Stokkiesdraai papuko molwashoka okwa li ye shi oyo Phala Phala. Otaku hokololwa kutya mofaalama ndjoka inaya kutha mo sha.

“Ongulohi yesiku lya landula oya mono mpoka pu na ofaalama yaPhala Phala noyi iteyele mo, nokuyaka mo oshimaliwa shooUS$580 000.”

Otaku hokololwa kutya pethimbo oshiningwanima shoka sha ningwa, Joseph okwa li omuniilonga mofaalama ndjoka, notaku fekelwa kutya oye a gandja uuyelele komupambele gwe David kutya omuna iimaliwa ya holekwa mofaalama moka.

Ngoka a li omuhona gwopolisi yoondaadhi moSouth Africa, Aurthur Fraser omumvo gwa zi ko okwa tumbula kutya mboka taya fekelwa meyako ndyoka oyo David, Erkki Shikongo, Petrus Muhekeni, Urbanus Shaumbwako osho wo Petrus Afrikaner.

Aafekelwa mboka otaku hokololwa ya adha ondumba yiimaliwa mbyoka ya holekwa momatyofa megumbo lyofaalama. Ashike nando ongaaka, Muhekeni okwi ikanyuna kutya keli nande oshitopolwa shongundu yaafekelwa mboka, nokwa popi kutya omukanda gwe gwokuhinga okwa li gwa longithwa kuShikongo okulanda oshihauto noshimaliwa shoka ya yaka naashoka oshe eta edhina lye li kwatelwe maafekelwa papuko.
ELONGITHO LYOSHIMALIWA

Ashike nande Muhekeni i ikanyuna ngaaka, Fraser okupitila momukandahokololo gwomompangu muFebuluali 2020, okwa popi kutya Shikongo okwa tumine oshimaliwa shooR715 000 kehangano lyokulanditha iihauto moCape Town nokwa landa oshihauto she shoVW Golf GTI kedhina lye ye mwene.

Onzonkundaneki yoNews24 omumvo gwa zi ko oya lopota kombinga yondjokonona yuumwene gwomaliko ndjoka yu ulike kutya Shikongo okwa landa olukalwa lwe koomiliyona N$1,7 moBlouberg, moCape Town, sha ningwa muMaalitsa 2021, nokwa landa wo ehala lilwe kooN$300 000 moWallacedene, momudhingoloko gwaKraaifontein, sha ningwa muJuli 2020.

Iikundaneki yomoSouth Africa oya lopota kutya mondjokonona yomandhindhiliko guumwene gwomaliko owu ulike kutya Shikongo kali nande e na egumbo omanga inaaya yaka oshimaliwa moPhala Phala.

Shikongo otaku hokololwa natango a longitha oshimaliwa shoka okulanda ehala lyomayakulo gokugandja omalukalwa kaayenda popepi nOutapi muMaalitsa 2020 kooN$800 000 osho wo oshihauto shoToyota Land Cruiser (sha longa nale) kooN$165 000.

Okwa kundanekwa wo kutya David otaku fekelwa a longitha oshimaliwa “sha yakwa” okwoopalekitha nokutungitha nawa egumbo lya yinakulu Mwaambange Shikunda tali adhika momukunda Olukekete moshitopolwa shaMusati.

David otaku hokololwa natango a landa otuukala yoVW Golf R ongoshitopolwa shiihauto yondilo mbyoka a li e na.

David okwa tulwa miipandeko kopolisi yaNamibia momasiku 14 Juni 2020 mOvenduka, sho taku hokololwa a taaguluka oongamba dhomulonga gwaLange okuza koSouth Africa okuya moNamibia.

Pethimbo ndyoka opolisi oya popi kutya oye mu adha nowili yoTAG Heuer yongushu yooN$28 000, owili yoRolex yongushu yooN$290 000, elyenge lyoshingoli lyongushu yooN$170 000 osho wo iimaliwa yomafo yi li 11 yaAmerika.

Iikundaneki okwa li ya popi kutya Ramaphosa okwa li a futu, David, Joseph osho wo aafekelwa yalwe oshimaliwa shooN$150 000 mu kehe gumwe opo kaaya popye eyako lyoshimaliwa shoka.

Omufekelwa gulwe oye Urbanus Shaumbwako, ngoka a kala e li mondholongo moSouth Africa okuza muKotoba 2020.

Otaku hokololwa a tulwa miipandeko sho a adhika noshako yi na oombistoli 12 dha dhimwa oonomola dhiikwatya, moka taku hokololwa kutya oondjembo dhimwe otashi vulika dha ndjondjwa moNamibia.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.