Oshipotha sha Amushelelo inashi ekelwahi – opolisi

Michael Amushelelo

KOMANDA gwopolisi yoshitopolwa shaShana, Naftal Sakaria okwa popi kutya oshipotha shoka sha patululilwa omunandjungu ngoka wo e li oshilyo shongundu yoNamibia Economic Freedom Fighters (NEFF) Michael Amushelelo osha shunithwa kopolisi opo shi ningilwe omakonakono, ashike inashi ekelwahi kompangu.

Sakaria okwa popi kutya opolisi oya tokola okumangulula Amushelelo, ashike nando ongaaka onkene taya ningi omakonakono ga gwedhwapo sha landula oshiningwanima moka a yi moshipala elombwelo lyoveta okuza kompangu opo kaa hedhe oometa 200 popepi noositola dhoRani moshilongo ashihe.

“Okwa mangululwa nokwa pewa elondodho opo a ye kegumbo ye a holoke esiku lya landula mompangu,” osho Sakaria a popi ngaaka.

Oshipotha shoka Amushelelo a taalela osha kwatela mo omatamaneko ngaashi gokuthawela mehala lyaantu, okuyonagula omaliko osho wo edhengo okupitila momatilitho ngoka a ningi.

“Omolwuumbangi mboka inaawu gwana, oshipotha shoka osha galulilwa kutse opo tu gongele uuyelele wa gwana tse tushi shune kompangu, nokuza mpoka Amushelelo opo ti ithanwa koshipala shoveta,” osho Sakaria a popi ngaaka.

Amushelelo okwa tulwa miipandeko mOmaandaha goshiwike sha zi ko mOshakati sho
Amushelelo okwa li a monika popepi noRani mEkuku mOshakati ongula yOmaandaha, naashoka oshe eta a tulwe miipandeko naashoka otaku hokololwa shi li ompinge nelombwelo ndyoka a pewa kompangu yopombanda yaVenduka momasiku 22 Desemba 2023 opo kaa hedhe poongeshefa dhoRani. Ashike nando ongaaka okwa mangululwa kopolisi ongulohi yesiku ndyoka.

MEtiyali, okwa holoka mompangu yamangestrata gwaShakati, nokwa lombwelwa kutya oshipotha she otashi shunithwa kopolisi opo ku ningwe omakonakono ga gwedhwa po. Shoka osha landula sho Amushelelo a ningi omatilitho nonkambadhala yokupatitha oositola adhihe moshilongo dhoRani Group of Companies konima sho oshitayi shositola yomOshakati sha kutha miilonga pakathimbo aaniilonga 84 sho ya ningi ehololomadhiladhilo pehulilo lyomumvo gwa zi ko taya indile oonkalo dhi li nawa miilonga.

Pauyelele wahahende gwa Amushelelo, Kadhila Amoomo, kapu na uumbangi wa sha mboka tawu ulike kutya omuyakulwa gwe okwa pogola oveta ya sha nonkene oshipotha shoka oshe ekelwahi kompangu.

“Ohela, otwa londodha elelo lyopolisi mOshana opo li iyagake okukala lya homata osho wo okulongithwa kopolitika okwiisindilila po aantu,” osho Amoomo a popi ngaaka mEtiyali lya zi ko.

Amoomo okwa popi kutya Amushelelo okwa tulwa miipandeko mOmaandaha omolwopolitika yokwiisindilila po [Amushelelo], nonande keshi nande omuntu ngoka ha fadhukapo.

“Ngele okwa yona elombwelo lyasha lyompangu, ando oti ithanwa owala a ye kompangu. Oya hala okuhepeka oonzo dhepangelo sho taya longo ya fa aagameni yoongeshefa dhaakwiilongo mboka oyo taya hepeke aantu yetu miilonga,” osho a popi ngaaka. Konima sho Amushelelo a ningi omatilitho noonkambadhala dhokupatitha oositola dhoRani, mwene gwoositola dhoRani moshilongo, Ali Dharani okwa yapukile Ompangu yoPombanda nokwi indila aaleli yongundu yoNEFF, mwa ketelwa Amushelelo yi ikale kokule noositola dhe.

Nomomasiku 22 Desemba ompangu oya gandja elombwelo opo aaleli yoNEFF mwa kwatelwa Amushelelo, Epaphras Mukwiilongo, osho wo Longinus ‘Kalimbo’ Iipumbu kaaya hedhe popepi noositola dhoRani.

Dharani okwa lombwele ompangu kutya oongeshefa dhe odha pumbwa okugamenenwapo nongele hasho ota kanitha iiyemo oyndji noonkondo.

Okwa popi kutya pethimbo lyookastoma odhindji ngaashi pomatango omanene oha ningi oshimaliwa shi li poomiliyona N$8 mesiku.

Dharani okuna oositila dha konda po40 moshilongo ashihe nokwa gandja iilonga kaaniilonga ya konda po3 000.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!