Oshipangelo shaTondoro moKavango sha yelulwa

OSHIPANGELO SHA YELULWA … Oshipangelo shaTondoro moshitopolwa shaKavango Uuninginino osha yelulwa komvula yoshikungulu ndjoka ya loko koshitopolwa shoka mEtitatu. Ethano: Lya Gandjwa

Uuministili wUundjolowele nOmayakulo gOnkalonawa owa popi kutya ayihe oyi li pomahala sha landula oshipangelo shaTondoro moshitopolwa shaKavango Uuninginino shoka sha yelulwa koshikungulu shoka sha dhenge moshitopolwa shoka, mEtitatu lya zi ko.

Omukuluntuwiliki guuministili mboka, Ben Nangombe, okwa yelitha kutya oshipangelo shoka osha yelulwa omolwomeya ngoka kwa li ga talama molwaamba lwopate yongalama ndjoka yi li popepi, nolwanima oga taandele nokuhulila moshipangelo. “Omakonakono getu ogu ulike kutya omeya ngoka ga yelula oshipangelo oga zi molwaamba lwopate moka mwa li mwa talama omeya naashoka oshe etwa molwashoka popate ndjoka kapu na omikanka dhokupititha omeya,” osho a popi ngaaka. Omukuluntuwiliki okwa popi kutya omatungo unene tuu ngaashi lyokutaamba aavu, ompungulilo yomiti, okanyothi osho wo etala lyokukuutumba aavu okwa li ga yelulwa.

Opate yongalama oya pumbwa okuningwa nawa opo pu ningwe omikanka dhokupititha omeya ko kuyandwe onkalo yokapangelo hoka kaa ka yelulwe we, Nangombe okwa popi kutya oya kundathana noshikondo shetonatelo lyoopate shoRoads Authority opo olwaamba lwongalama ndjoka lu ningwe nawa. “Uuministili wUundjolowele nOmayakulo gOnkalonawa otawu longele pamwe naRoads Authority (RA) opo pu ningwe nawa pomudhingoloko gwoshipangelo,” osho a popi ngaaka.

Nangombe okwa popi kutya popepi nomweelo gwoshipangelo otapu ka tungwa wo ekuma lyokukwathela nokukandeka omeya kaaga mone uupitilo wokuya moshipangelo.

Omukuluntuwiliki okwa popi kutya aanambelewa yuuministili oya ninga omakonakono gokutala onkalo moshipangelo sha landula eyelu ndyoka, nonkundana ombwanawa oyo ndjoka kutya kapu na omuvu, omuniilonga nenge omukwashigwana e ehamekelwa mo pethimbo lyoshikungulu shoka.

Okugwedha kwaashoka, Nangombe okwa popi kutya kapu na naanaa iikwaniipangitho yopaunamiti ya gumwa noonkondo komeya, kakele owala kokila yokutalaleka iinima yomoshipangelo ndjoka kwa li ya dhimi molwashoka oongodhi dholusheno okwa li dha gumwa komeya.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!