Oshilyo shoSwapo shi ithanwa kiihokolola

Amushanga gwoshimpungu shiipambele yopaliko moSwapo, Bernadette Jagger okwa gandja etumwalaka koshilyo shongundu Pedro Mwenyo opo a holoke kiihokolola yomapulapulo konima taku hokololwa a popi kutya amushangandjayi gwoSwapo, Sophia Shaningwa, okwa kutha oshimaliwa shoomiliyona N$2,5 moshiketha shehangano lyoSwapo lyedhina Guinas Investment.

Jagger okwa tumine Mwenyo ontumwafo mOmaandaha, opo a ka yelithe nokugandja uumbangi kombinga yaashoka a makuka.

Shoka osha landula sho etumwalaka ele lyi ingaana kiikundaneki yopankalathano komalungula tali popi kutya oshimaliwa shoomiliyona N$2,5 osha kuthwa koshiketha shehangano lya tumbulwa pombanda opo shi longithwe miikonga yoSwapo mbyoka ya ningwa omwedhi gwa zi ko.

Jagger natango okwi indile wo omunashipundi gwewilikongundu lyoGuinas Investment, Joseph Andreas a kuthwe ko koshipundi.

Jagger, ngoka e li mokomitiye yongundumutima osho wo mongundupitithi yoSwapo, okwa popi kutya Mwenyo ota ka indilwa a gandje uumbangi mboka tawu kalelepo shoka a popi.

“Otandi ku shangele ontumwafo ndjika shi ikwatelela ketokolo lya ningwa poshigongi shongundu yoSwapo momasiku 6 Novemba kombinga yomatamaneko ngoka ga ningilwa amushangandjayi okupitila kiikundaneki yopankalathano,” osho Jagger a popi ngaaka.

“Oto ithanwa mpaka wu holoke miihokolola yomapulapulo kombinga yoshinima shoka opo wu gandje uumbangi kombinga yomatamaneko opo ku gandjwe ekatukilonkatu lyi li mondjila.”

Iihokolola mbyoka oya thanekwa yi ningwe mEtiyali taliya poombelewa oonene dhehangano lyoSwapo, lyo-Namib Contract Haulage, mOvenduka.

Mwenyo okwa lombwele onzonkundaneki ndjika uunambo kutya oshe mu kumitha okuyakula ontumwafo okuza kuJagger.

Okwa popi natango kutya haye nande a shanga etumwalaka e le ndyoka tali ingaana komalungula, nokwa popi kutya ye okwe li andjaganeke owala okuza kongundu yokoWhatsApp yilwe nokuli tula kongundu yoWhatsApp yoSwapo.

“Onda kumwa kehangano enenene [oSwapo] otali ithana omuntu ngaashi ngame shi ikwatelela ketumwalaka ndyoka nda andjaganeke okuza kongundu yilwe okuya kongundu onkwawo. Itashi monika nande shi li pambelewa opo ongundu ndjoka ya kuutumba na amushangandjayi yi ithane ndje, ndi ka yelithe oshinima shoka ngame kaandishi shi,” osho a popi ngaaka.

Okwa popi kutya okwa tokola okwaandjaganeka etumwalaka ndyoka kongundu yokoWhatsApp yawo yoSwapo molwashoka okwa li e wete “tashi kumitha” nokwa li e wete Shaningwa a pumbwa okutseya kombinga yomatamaneko ngoka taga popiwa kutya okwa kutha oshimaliwa shoomiliyona N$2,5 okuza mehangano lyoSwapo shi longithwe miikonga.

“Yangapi tatu ki ithanwa tu hokololithwe?”
Onzonkundaneki mongundu oya popi kutya Mwenyo okwa kala gumwe yomwaamboka taya gandja ombedhi noonkondo kombinga yomahogololo gomuulikwahogololo gopaupresitente gwongundu yoSwapo, Netumbo Nandi-Ndaitwah, Shaningwa, osho wo omupevi gwe Uahekua Herunga, pethimbo lyomutumba gwomahogololo gongundu yoSwapo, omumvo gwa zi ko.

Sho a kwatathanwa konzonkundaneki ndjika uunambo, Jagger okwa koleke kutya okwa gandja etumwalaka kuMwenyo a ka hokolole koshigongi shoka tashi kala ko oshiwike tashi ya.