Omunambelewa kulunhu woshitopolwahoololo shaKavango Uningino Matheus Singambwe okwa pula osystema yokutopolwa oshikuvila shovakulupe i lundululwe, mwa kwatelwa okukwatifa ashike efiku limwe.
Singambwe oshinima eshi okwe shi popya pefimbo leengundafana dopashitopolwahoololo naNamPost kombinga yetulomoilonga lokuyandja opendjela yopashiwana koNkurenkure Etitano.
Eshi kwa li ta popi omikundu odo di li mosystema yokuyandja opendjela, okwa ti omilandu da kindja dokukwatifa opendjela luhapu ohadi eta ovo hava kwata va kale nokulifola ko oikando ihapu ya yooloka va dule okutambula opendjela yavo, osho hashi eta vali ovo vaha file ovakulupe oshishisho va longife oshimaliwa shihapu.
Singambwe okwa fatulula kutya ovakulupe ovo hava tambula opendjela yavo voo natango ohava kwatela yoo ounona, osystema inai pitika va kwatela oshita omafimbo amwe ohai futu ko ashike oshimaliwa shomunhu umwe poshikando, osho hashi eta va shune ko vali va ka tambule oyo ya xupa ko.
“Eshi ohashi eta va longife oimaliwa ihapu moyeendifo noinima inai teelelwa yoonakumona omauwa,” osho a ti ngaho.
Okwa li yoo vali kwa hololwa omalimbililo kutya ovakulupe inava hala okulongifa eembaanga shaashi odi na oishoshela i li pombada voo inave di lineekela nawa.
Omupopiliko woNamPost Joseph Teofelus okwa ti oonakumona omauwa ovo va hanga okumona eependjela da yooloka otava ka dula okutambula oimaliwa yavo aishe poshikando paife.
Okwa weda po kutya oilonga oi li metifa yokutota osystema yombaanga yeependjela oyo itai kala hai nane sha nandenande, tai lalakanene okuningila ovo hava kwata opendjela shipu okumona oimaliwa yavo.
Teofelus okwa ti, osystema ei otai ka pitika ovo hava tambula opendjela va dule okutopola opendjela yomwedi umwe moule weemwedi nhatu opo shi va vatele okukwata oshimaliwa shavo nawa.
“Paife, ovo hava tambula opendjela otava dulu okukwatela kukeshe ombaanga mwa kwatelwa NamPost, neembaanga oda teelelika di kale itadi va nane oikando yonhumba,” osho a ti ngaho.
Omunashipundi woshitopolwahoololo shaKavango Uninginino noku li kamusela woshikandjohoololo shaNkurenkuru Fillipus Tenga okwa indila omahangano okuyandja omayakulo a longele kumwe mokuungaunga nomikundu doshiwana.
“Natu tambule ko omikundu odo ovanhu tava popi ndee hatu di wapaleke,” Tenga osho a ti ngaho, ta weda po kutya oshiwana inashi efwa shi kale tashi endaenda medina lopendjela.
–NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
