Ondando yi li pombanda noonkondo ndjoka ya tameke okulonda muMaalitsa numvo oya dhigupaleka iilonga moshikondo shoomina moNamibia, molwashoka omahooli ogo oshinenenima miipumbiwa yoomina okulongithwa miiyenditho yokututa osho wo miinyangadhalwa yilwe.
Okupitila molopota ndjoka hayi pitithwa komwedhi kehanganokalelipo lyoomina moshilongo lyedhina Chamber of Mines kombinga yonkalo yoomina, oya popi kutya Namibia mongashingeyi okwa nkundipala pandondo yomalandithilo gopauyuni omolwonkalo yondando yomahooli yi li pombanda osho wo onkalo yomilandu dhomalandithilo.
Olopota ndjoka tayi popi ngaaka oya pitithwa mEtine lya zi ko noya gandja uuyelele wopethimbo kombinga yonkalo ya ndhindhilikwa pokati kaMaalitsa naMei kombinga yiikwamina.
“Oshikondo shoomina osha gumwa nayi komainyengo gondando yomahooli molwashoka omahooli ogo oshinima sha simana miilonga yoomina, okuza kokufula osho wo koondongelwa nokiiyenditho,”osho omukuluntuwiliki gwehanhanokalelipo lyoomina, Fabian Shaanika, a popi ngaaka.
Oondando dhiiyenditho odha londo okuya pombanda noopelesenda 11.5 okuyelekanitha nomumvo gwa zi ko, omanga oondando odha londo noopelesenda 4.1 muMei okuyelekanitha sho kwa li dha londo noopelesenda 2.1 muApilili.
Onkalo ndjoka oya thindila kongudhi iilonga yoomina dhuuwe, ndhoka tadhi nana nale nondatu omolwaalandi taya shongola, osho wo iilonga mbyoka itaayi etapo sha kola okufutila po oshimaliwa sha longithwa.
Ashike nando ongaaka, ehanganokalelipo olya popi kutya iilonga yoomina dhimwe onkene tayi pula komeho nawa monkalo ndjoka ompe yomahooli ga ninga ondilo.
“Oololi dhomina yaHusab ohadhi vulu okulonga komahooli godisela nenge okulonga kolusheno, nonkene egwedhelo lyomahooli godisela olye etitha omina ndjoka yi tameke okulongitha olusheno moololi dhawo.
Shoka otashi gandja ondunge komahangano goomina ga tameke okulongitha omikalo dhilwe uuna tadhi vulu okulongithwa notadhi opalele pamahupilo,”osho omukuluntu gwiipambele yopamahupilo mehanganokalelipo, Lauren Graham, a popi ngaaka.
Oondando dhoshingoli no-uranium onkene odho dhi li pombanda, omanga oondando dhokawe oyi li pevi.
Oondando dhokawe odha yi pombanda noopelesenda 39 muMei 2026 okuyelekanitha naMei 2025.
“Shoka otashi ulike kutya oshingoli onkene osho shi holike, ompumbwe yasho onkene yi li megameno li li nawa nonande onkalo yoyene kayi li nawa lela muuyuni omolwonkalo yiita yopapolitika, omangeshefelo ga nika oshiponga, osho wo aapunguli taya ningi omapungulilo nuukeka,”osho olopota ya popi ngaaka.
Oshikwamina sho-uranium osha yi pombanda noopelesenda 21 okuyelekanitha naMei 2025, omanga yilwe mbyoka hayi munwa ngaashi ongopolo, oTin noZinc nayo oya londo okuya pombanda noonkondo okuyelekanitha nomumvo gwa zi ko.
“Omutalelo goshikondo shoomina moNamibia onkene tagu monika gu li nawa, nogwa kwatelwa komeho kondando yi li pombanda muuyuni yo-uranium osho wo oshingoli, osho wo ooprojeka odhindji ndhoka tadhi pula komeho,”osho olopota ya popi ngaaka.
Oya gwedhapo tayi ti: “Nonande oshikondo shaNamibia shoomina onkene tashi tsikile nokumona uuwanawa omolwomudhingoloko gwa gandja ompito yiikwamina, onkene ongeshefa ombwanawa hayi ikwatelele kokushunitha pevi ondando yiipumbiwa yokulongithwa mokumina, osho wo omisindalandu dhoopalela oomina nokukwathela oomina oompe dhi ninge iiyemo ya kola.”
