Omunashipundi wokomitiye yopaliamente i na sha noipambele yehongo, ovanyasha, omakwatafano nomayambulepo oshiwana, Marlyn Mbakera okwa pula Oshikefa shOpashiwana shOmayambulepo Ovanyasha shi ete po omulandu wokuyandja oimaliwa inai pumbwa okushunifwa u wedwe kwaao wokuyandja omikuli nokutalulula oipumbiwa yasho opo ovanyasha vahapu va dule okukufa ombinga.
Eshi kwa li ta popi pefimbo okomitiye kwa li ya talela po kOmuthiya Etitano, Mbakera okwa ti ovanangeshefa vahapu nande ove na ehalo lokukufa ombinga mopolohalama ova dopa okuwanifa po oinima aishe ya pumbiwa.
“Ovaningi vomaindilo vahapu ove na ohokwe ashike inava wanifa po oinima aishe ya pumbiwa, ngaashi ondjokonona iwa yokufuta omikuli nokumbaanga.
Oshikefa nashi tale vali kokuyandja oimaliwa itai aluka pakuweda komikuli ndee tashi talulula omilandu dokuhoolola,” osho a ti ngaho.
Mbakera okwa ti omwaalu ushona womaindilo taa tambulwa ko otau holola kutya ovanyasha ova pumbwa okupewa eyambidido la wana ngee tava ningi omaindilo avo.
“Ohatu dulu okuninga nawa. Okwa li twa pumbwa okuyambidida ovanyasha.
Taleni kutya omolwashike vahapu hava ningi omaindilo ashike vashona ovo ashike hava di mo.
Ovanyasha itava mono omauwa ngaashi kwa li ve na okumona.” osho a ti ngaho.
Etalelepo eli oli li oshinakuwanifa shokomitiye shopafinamhango shokuwilika nokukonakona etulomoilonga lOshikefa shOpashiwana shOmayambulepo Ovanyasha nonghee oilonga yokutunga oupale vomaudano tai ende moikandjohoololo.
Ngoloneya woshikandjohoololo shaShikoto Sacky Kathindi okwa ti eepolohalama edi mbali odi li dimwe domeenghendabala depangelo dokuyambula po ovanyasha.
“Elelo loshitopolwahoololo shaShikoto ole lipaka mo lela moinima ei nola hala okumona etulomoilonga tali ende nawa. Ashike nee, oinima ei oya shakeneka omikundu detulomoilonga odo da pumbwa eenghendabala dopamuhanga dovakufimbinga aveshe opo di potokononwe,” osho a ti ngaho.
Kathindi okwa ti nande eenhele dokutunga oupale moikandjohoololo oda tofwa mo kOkankolo moshikandjohoololo shOnyuulaye nokoGuinas moshikandjohoololo shaTsintsabis, oilonga inai tameka nande kwa ningwa oivilo yokupatulula oilonga pambelewa muMaalisa.
-Nampa
