Orina okwa indilile a gamenwe kopolisi

KENNETH Orina ngoka ta tamanekelwa edhipago lyomukadhi mOshaanda mo 2007, okwa ti okwa li a indile opolisi pOshaanda yi mu gamene komukulakadhi gwe.

Sho a holoka esiku etiyali komeho gOmpangu yOpombanda mOshakati Orina omupangi omuKenya ngoka a li ta longo moshipangelo shepangelo sha Shaanda, okwa hokololwa kutya okwa indilile opolisi mu Juli 2007 opo yimu gamene komukadhi, ngoka a ka adhika a dhipagwa nokutetagulwapo konima yoomwedhi mbali sho Orina a li a indile a popilwe kopolisi.Pahapu dhomugandjimalombwelo nale gwosasiona yopolisi pOshaanda, Omukonakoni, Amon Ndilula, Orina okwa li a talelepo ombelewa ye momu 9 ga Juli 2007 ta pula ngele omukadhi ota vulu okweedhililwa uule womasiku gontumba omanga ye ta longekidha oku mutuma koshilongo.Ndilula okwa gandja uumbangi kutya Orina okwa nyenyeta kombinga yomukadhi ta ti aniwa okwe mu geela , nohe mu kondjitha, emu ponokela na aniwa okwa kambadhala oku mu tila omeya gafuluka omanga a kotha. Okwa li aniwa ati ita vulu oku kala naye megumbo limwe osho Ndilula a lombwele ompangu. Konyala oomwedhi mbali konima yetalelopo lya Orina kosasiona yopolisi, omukadhi, Rose Chepkemoi Kiplangat [33] aniwa okwa dhipagwa megumbo lyawo moshipangelo shaShaanda, momagumbo gaapangi. Orina ota tamanekelwa edhipago, eyoveta moshipala nenge a kambadhala oku ya oveta moshipala, noshowo okuyonagula omudhimba, ayihe mbika mekwatathano nedhipago lyomukadhi.Ompangu ota yi ti Orina okwa dhipaga Kiplangat mu Septemba pokati kesiku 14 nesiku 17 lya Septemba, nokuza mpoka okwa tetagula omudhimba gwe noku gweekelahi miintimbu pomahala ga yooloka mOshaanda. Orina okwa ti kena ondjo momatamaneko agehe ngoka, petameko lyoshipotha she metiyali.Pahokololo lya Ndilula, Orina okwa li natango mombelewa ye sho omukadhi Kiplangat eya po posasiona yopolisi. Okwa ti omolwashoka uupyakadhi pokati kaa ihokani mbaka yaali owo megumbo, Ndilula okwe ya tumu kompangu ya mengestrata yaShaanda opo mbuka wu ka longwe nawo kohi yoveta yokukondjitha elongitho lyoonkondo momagumbo.Omuniilonga pamwe na Ndilula, omukonakoni, Magdalena Garises okwa lombwele woo ompangu kutya Kiplangat sho eya pombelewa okwa li keena oongaku, inaazala nawa ye a fa a piyagana, nokwa li ta lili omalupita mesiku eti 9 lya Juli 2007.Kiplangat okwa popi uudhigu we kombinga yomulume ta ti ohe mu ningi onyanya, osho Garises a ti. Pamayele ga Ndilula Kiplangat nomulume Orina oya tumwa kombelewa ya mengestrata gwa Shaanda, osho Garises a hokolola. Okwa hokolola woo kutya Ndilula okwa lombwelwa ku Orina kutya omukadhi okwa kana nokutya okwa kambadhala okwiidhipaga.Ndilula okwa pataneke omupopyo gwa Garises mwaashika eta ti ye okwa hokolola kutya Orina okwe mu lombwele nokutya omukadhi okwa li ta kambadhala okwiidhipaga.Sigo oompaka iihokolola ota yi endelele oshoka omutamaneki Neville Wamambo okwa ithana nale oombangi omulongo na heyali dhi gandje uumbangi wadho moshipotha shika.Yahamano yo moombangi oya hokololele Ompangu nkene intimbu yolutu ya adhika moShaanda, ya ti tango omutse nomaako ogo giitsuwa, taku landula omatundji gaali, oombwetelo, pOshaanda pokati komasiku 17 sigo 25 ga Septemba 2007.Orina okwa kalelwa po kuhahende Inonge Mainga,Orina okuli mondholongo okuza esiku a kwatelwe momi 30 ga Kotoba 2007.