Opolisi yaShana yi li mompumbwe onene yiihauto

Opolisi yoshitopolwa shaShana oya popi kutya otayi nana nondatu okugandja omayakulo koshigwana meendelelo molwashoka kaye na iihauto ya gwana.

Omathimbo ogendji ohaya vulu okudhengelwa oongodhi kaakwashigwana mboka ya pumbwa ekwatho lyopolisi ashike uunkundi wawo ohawu kala piihauto mbyoka oyindji yomuyo ya kulupa noya pumbwa okusilwa oshimpwiyu ethimbo alihe.

Ndhoka odha popiwa kukomanda gwopolisi yoshitopolwa shaShana, komufala Sakaria Lungameni, pethimbo a ningi oshigongi naakwashigwana molukanda talu ithanwa Okadolopa popepi nOndangwa, omasiku ga zi ko. “Onkalo ndjoka twa taalela oye eta aantu ya kale inaaya mbilipalelwa komayakulo ngoka hatu gandja, molwashoka olundji opolisi ohayi thiki kwatokelwa uuna yi ithanwa.

Omanga tatu lalakanene okugandja omayakulo getu ngoka taga pumbiwa, onkene twa taalelwa komashongo,” osho a popi ngaaka.

Lungameni okwa popi kutya opolisi otayi kondjo mpoka tayi vulu opo yi shilipaleke kutya iihauto yawo ayihe oya pangelwa nokumona wo iihauto yilwe ngele otashi vulika opo ya vule okugandja omayakulo gondjungu uuna taga pumbiwa koshigwana. Okwa gwedha po kutya ngele iihauto ye na oya pangelwa, opolisi otayi ka longa nuupu okukondjitha iimbuluma nokuthika mbala pomahala taya pumbiwa.

Komanda okwa shilipaleke oshigwana kutya epangelo olya thaneka okukuta aapolisi aape mboka monakuyiwa taya ka kwathela momayakulo gegameno netulo miilonga lyooveta opo ku shilipalekwe onkalathano yi na egameno moshilongo.

“Ekuto lyaapolisi 750 okuza miitopolwa ya yooloka moshilongo olye ya pethimbo lyoopala, molwashoka oyendji yomaapolisi oya thika poomvula dhokuya moshipundi shevululuko,” osho a popi ngaaka. Omasiku ga zi ko opolisi oya tseyitha kutya okwa li ya yakula omaindilo ge li 42 967 gaamboka ye na ohokwe yokutaambwa mekuto lyoopoosa 1 000 dhopolisi.

Momwaalu ngoka, omwa kuthwa aantu ye li 2 398 (aalumentu 1 664, aakiintu 734) mboka yi ipyakidhilwa nokuningilwa okakonakono opo mu tothwe mo mboka taya kutwa yo ya ka ningilwe omadheulo guupolisi.

Ekuto lyaapolisi 1 000 otali ningwa miitopolwa ya yooloka pokati komasiku 31 Mei nomasiku 18 Juni, nolya thikama po maantu ye li 750 mboka taya zi moshigwana ano miitopolwa ayihe moshilongo, omanga ye li 250 otaya zi koshikondo shomayakulo gaagundjuka o-National Youth Service.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.