Opolisi ya tegelela omunawino okuza koSouth Africa

Joseph Shikongo

Opolosi yaNamibia otayi kongo ekwatho koSouth Africa lyomunawino gwomakonakono gomuule kombinga yiiponga yiihauto opo e ye a ninge omakonakono momudhingoloko gwIindangungu moshitopolwa shaShana, pehala mpoka pwa ningilwa oshiponga kondjayi yetanga lyopolisi Joseph Shikongo, pehulilo lyo2022.

Uuyelele mboka owu li mombapila ndjoka ya shangwa komupevindjayi gwopolisi moshilongo, Elias Mutota.

Ombapila ndjoka oyomasiku 10 Januali.

Ombapila ndjoka Mutota okwe yi shanga okuyamukula komukandanyenyeto ngoka gwa zi kaakwanezimo yaamboka ya hulithile poshiponga shoka.

Omukandanyenyeto ngoka tagu popiwa ogwa gandjwa koshitaasi shopolisi yaNdangwa momasiku 30 Desemba.

Aakwanezimo mboka ya shanga omukandanyenyeto ngoka oya nakusa Frans Ndengu naStephanus Lukas.

Oshiponga shoka shoshihauto taku hokololwa kutya oshe etwa kuJoseph, osha faalele Sofia Ananias, Ndengu osho wo Lukas.

Aakwanezimo okwa li ya ningi ehololomadhiladhilo pehulilo lyomumvo gwa zi ko, taya indile Shikongo a kuthwe onkatu ye yuukuluntu wopolisi moshilongo, nokwa li wo ya pula ofuto yoomiliyona N$15.

“Natango, opolisi yaNamibia otayi kongo ekwatho lyomukonakoni a pyokoka miiponga yiihauto okuza koSouth Africa opo e ye koNamibia a ninge omakonakono pehala lyoshiningwanima shoshiponga shoka, ye a gandje wo omaiyuvo ge ngoka gowino,” osho Mutota a popi ngaaka.

Okwa popi kutya uuna ya pewa eyamukulo komunawino kombinga yomakonakono ngoka gomuule, nena uuyelele mboka otawu ka gwandjwa kOmbalewa yOmutamanekindjayi opo a ninge etokolo lya hugunina.

Okwa popi kutya omakonakono kombinga yoshiponga shoka oga pwa nepeko olya tuminwa nale kombelewa yomutamanekindjayi.

“Omuntu ngoka oteya uunake?” osho Ester Ndengu, mumwayina gwa nakusa Frans, a pula ngaaka sho a pulwa konzonkundaneki ndjika a tye ko sha.

Okwa popi kutya ngele omakonakono ngoka inaga eta oshizemo she ya mbilipalela, nena aakwanezimo yoonakusa mboka yaali otaya ka ninga ehololomadhiladhilo pegumbo lyokomukunda lyaShikongo.

Okwa popi kutya molwashoka Shikongo okwa li a popi kutya oshipotha shoka oshi li momake gompangu yopamuthigululwakalo, nena okwa tegwa a tseyithile aakwanezimo yoonakusa kutya okompangu yini yopamuthigululwakalo taku ungaungiwa oshipotha shoka.

Mutota uunambo okwa koleke kutya ombapila ndjoka oya zi kOmbelewa yOndjayi yetanga lyopolisi, ashike ina popya kutya uunake omunawinokonakoni ngoka teya moshilongo okuza koSouth Africa.

Okwa popi kutya opolisi oyi ipyakidhila nomalongekidho gokumanitha omukandapitikilo guuthemba wokulongela moNamibia opo omukonakoni ngoka i ithanwe.

“Iinima mbyoka yokutya ondjayi yetanga lyopolisi na kuthwe miilonga osho wo kombinga yofuto, itatu vulu oku yi yamukula. Tse otuli owala petindi lyoshiningwanima shoshene (shoshiponga),” osho Mutota a popi ngaaka.

Aakwanezimo yoonakusa (Ndengu naLukas) oya popi kutya oya kala taya ningi onkambadhala okumona Shikongo opo ya popye, ashike ompito ndjoka inaye yi pewa.

Pethimbo ta popi poshigongi shaakwashigwana mOshakati numvo, Shikongo okwa popi kutya ke wete pu na omuntu ta vulu okwe eta oshiponga shoshihauto owina nelalakano lyokudhipaga aantu.

“Kandiwete pu na omuntu ta vulu okwe eta oshiponga owina opo oshihauto she shi idhenge moshikwawo,” osho a popi ngaaka.

Okwi indile aakwashigwana ye ethele oshikumungu shoka momake goveta.

Shikongo pethimbo ndyoka okwa popi wo kutya oshipotha shoka osha falwa kompangu yopamuthigululwakalo.

Omumvo gwa zi ko opolisi oya koleke kutya Shikongo ota ningilwa omakonakono ge na sha noshipotha shedhipago lyaashi lyoshiningilawina, nokuhinga nuuhasha sha landula sho oshihauto shoka a li ta hingi sha mono oshiponga sho shi idhenge omutse nomutse notuukala, sha ningilwa mopate, pwIindangungu, moshikandjohogololo shaKaku [moshitopolwa shaShana], momasiku 30 Desemba 2022.

Pauyelele wolopota yopolisi konima yoshiningwanima shoka, Shikongo ngoka a li ta hingi oshihauto she shopaumwene shoToyota Hilux shoondunda mbali, okwi idhenge omutse nomutse notuukala yoHyundai ndjoka ya li oonakusa mboka yatatu.

MuDesemba omumvo gwa zi ko opolisi okwa li ya popi kutya inayi manitha natango omakonakono goshipotha shaShikongo.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!