Opolisi komunkulofuta ya tula miipandeko aahingi 57 omolwondhungo

Opolisi moondolopa mbali dhokomunkulofuta oya li nomaipyakidhilo moopate pethimbo lyomatango omanene sho ya tula miipandeko oyendji mboka ya adhika taya hingi ye li kohi yondhungo.

Pauyelele mboka wa monika konzonkundaneki ndjika, aahingi yiihauto ye li 57 oya tulwa miipandeko sho taku hokololwa ya adhika taya hingi ye li kohi yondhungo mondolopa yaMbaye noyaSwakopo muDesemba – ye li 28 oya kwatelwa moSwakopo omanga ye li 29 oya mangelwa mOmbaye.

Omukuluntuwiliki gwondolopa yaSwakopo, Alfeus Benjamin okwa popi tati: “Omanga twa taamba ko aayenda okuza moshilongo osho wo pondje yoshilongo moondolopa dhetu molwashoka ohaya kwathele nawa kehumokomeho lyomahupilo getu, onkene tatu indile aayenda naakalimo ya tyapule pamukalo gu li nawa,” osho a popi ngaaka.

Iiponga yomoopate yi li 89 oya ndhindhilikwa moSwakopo omanga aantu ye li 343 oya pewa omageelo gofuto sho ya yi pambambo ooveta dhomoopate.

Omilandu dhomoopate ndhoka oyendji inaaya iyutha kudho omwa kwatelwa okundopa okuthikama pomahala mpoka pu uthwa osho wo okuthikameka iihauto pomahala inaaga uthwa, okuhinga pwaana omukanda, okukala inaaya imangela mepaya osho wo elongitho lyongodhi yopeke omanga taya hingi.

MOmbaye aahingi 305 oya tulwa miipandeko omanga ye li 126 oya londodhwa. Miiningwanima mbyoka omwa kwatelwa ye li 166 mboka ya pewa omikanda dhokuya kwatitha po omanga aahingi 30 oya kuthwa omikanda dhawo dhokuhinga pakathimbo.

Oshikondo shopolisi yomoopate mondolopa ndjoka okwa li sha dhike po oomboloka 30 moka ya kala nokutala onkalo yiihauto pethimbo lyomatango omanene.

Okugwedha kwaashoka, aahingi ye li 103 oya pewa omageelo sho ya adhika taya hingi kaaye na omikanda dhokuhinga ye dhi thiga komagumbo, aahingi yane mboka taya ilongo okuhinga pwaana etonatelo osho wo yahamano mboka kaaye na nande omikanda dhokuhinga.

Aahingi yahamano naafaalelwa yane oya pewa omageelo sho ya adhika miihauto nomalutu gawo ga pita mo. Pokati mpoka opolisi yoshitopolwa shErongo oya ndhindhilike iipotha ine yomadhipago kaageshi goshiningilawina osho wo okuhinga nuuhasha pethimbo lyomatango omanene, omanga gumwe okwa manene oondjenda kOmaruru. Iiponga yilwe oya kwatelamo aayendi yokoompadhi mboka ya pumwa kiihauto moSwakopo nomOmbaye.

Miiningwanima ayihe, aahingi oya fadhukapo noya ndopa okutala onkalo yaantu mboka ya monitha oshiponga.