Opolifi yaNamibia oya holola onghumwe kombinga yoiponga yoihauto ya ya pombada, ya didilikwa mexuliloshivike moshilongo.
Oyo ya eta omafyo nomalemano ahapu. Inspekita Elifas Kuwinga molopota yoimbuluma yopolifi Oshoondaxa okwa ti onghalo ei otai kumwifa neenghono.
“Oiningwanima ihapu yoyeendifo okwa li ya didilikwa mexuliloshivike ndee otashi kumwifa. Moiningwanima imwe, eemwenyo okwa li da kanifwa novanhu ova lemana,” Kuwinga ta ti.
Okwa li kwe lituwa olutu lomukainhu ehe shiivike lwopotundi 02h00 Etitano konima vati kwa li a pumwa kotuwa ihe shiivike ndee omushingi ta faduka po.
Oshiningwanima eshi osha ningilwa komukunda Oshuushe mondjila yakula yoB1 pokati kOndangwa nOshikango.
KoSwakopmund, ounona vavali voumati vomido 13 no14 okwa li va lemanekwa kotuwa lwopotundi 07h00 Etitano popepi noCashbuild moTamariskia.
Omushingi okwa li a faduka po keemhadi ashike okwa ka mangwa po konima.
Onguloshi oyo tuu yo potundi 21h20, eetuwa mbali okwa li de lidenga omitwe mumwe mondjila yoB2 pokati koUsakos noArandis, novanhu okwa li va lemana.
Oshiningwanima shikwao okwa li sha lopotwa lwopotundi 19h30 Olomakaya popepi noFarm Sherwood pondje yOshivanda, omo osheendifo sha umbata ovanhu ve li vaheyali sha alangata konima omushingi a nyengwa oku shi wilika.
Ovatwaalelwa vavali ova xulifila poshiponga, omanga vakwao kwa li va twalwa koshipangelo va ka mone ouhauka.
Kombaye, omushingi womota (46) okwa xulifa eshi e lidenga mololi manga kwa li ta shineya mondjila yoB2 lwopotundi 21h00 Olomakaya.
Kuwinga okwa indila ovalongifi veendjila va fimaneke alushe eameno, ta popi kutya oiponga yomeendjila oya ninga unene ihapu.
“Opolifi oya hala okuindila ovalongifi veendjila va fimaneke alushe eeveta domeendjila.
Natu kale ovashingi ve na oshisho ndee hatu konakona oyeendifo yetu manga inatu ya molweendo,” Kuwinga ta ti.
Okwa weda po yoo vali kutya okushinga nouhasha natango oku li osheetifi shakula shoiponga.
“Okushinga u li koshi yodungo, nosho yo eloloko, aishe ohai etifa oiponga yoyeendifo shi fike pamwe,” Kuwinga ta londwele.
Omakonakono opolifi moiningwanima ei ya lopotwa otaa twikile.
–NAMPA
