Opolifi moshitopolwahoololo shaShikoto oya wedela omilandu deameno lomeendjila noikonga meedoolopa nomomikunda mokulilongekidila exuliloshivike lopaasha olo tali ka kala le lipyakidila.
Oitaashi yopolifi aishe i li 11 otai ke lihanena oshipopolwahoololo, tai ningi oikonga meenhele adishe opo i kwatele po oveta nelandulafano.
Eshi kwa li ta popi peinda lomondjila kOmuthiya Etivali, omukulunhu woshikondo shokukelela oimbuluma, omupedu komisina Wynand Neels, okwa londwela kutya oshitopolwahoololo osha teelela omwaalu uhapu wovatalelipo noyeendifo ihapu pefimbo lopaasha.
“Ondjila otai ka kala iha di neenghono omafiku tae ya.
Ovashingi vomatuwa nave lilongekidile okahanda peenhele da yooloka mondjila yoB1, nosho yo peenhele opo oyeendifo hai pitile ngee tai i ile tai di moshitopolwahoololo,” osho a ti ngaho.
Neels natango okwa fatulula kutya eengudu dopolifi otadi ka ninga yoo omainda meendjila domamanya dakula odo da yuka komikunda.
Elalakano okukwashilipaleka eameno lovalongifi veendjila aveshe, notaku ka talwa unene keameno lovaendi vokolupandi nounona.
Pakuweda kenghonopeko leameno lomeendjila, opolifi otai ka ninga oikonga peenhele opo hapa ningilwa unene oimbuluma.
Taku ka talwa unene kokukelela oinima ihe li paveta, mwa kwatelwa omahepeko opaukakwashikekookanhu nomahepeko taa etwa kelongifo lomalodu oo haa ningwa luhapu poundingosho pefimbo loivilo yoludi eli.
“Omivalu oda holola kutya ovaendi vokolupadi vahapu ova pumwa koihauto meendjila detu monakudiwa.
Onghee nee ohatu, kundafana noshiwana okupitila moikonga yokuyandja omauyelele opo tu va longe kombinga yoshiponga shokutauluka eendjila puhe na etonato nomilandu deameno di li xwepo,” Neels ta ti.
Okwa weda po kutya opolifi moshitopolwahoololo natango oye litula mo meenghendabala odo di li metifa dokukelela oimbuluma yoludi keshe nokutota omudingonoko wa amenwa wovakalimo novatalelipo.
Neels natango okwa yandja omayele kovakalimo ovo tava faneke okudja mo modoolopa: “Lombwela oshitaashi shopolifi shi li popepi ngee oto di po peumbo.
Eshi otashi tu pitike opo tu kale hatu tale po peumbo loye, shaashi oiningwanima youmbudi nomateyo omaumbo ohai ningi ihapu pefimbo lomafudo ngee omaumbo ahapu a fiwa ehe na ovanhu.”
Oikonga ei ya wedelwa oi li ombinga yomulandu wakula wopolifi wokuxwaxwameka eameno lomeendjila nokukelela oimbuluma pefimbo eendjila diha di pefimbo lomafudo.
– Nampa
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
