… Ovaneumbo 14 va tala moshimaliwa shopendjela shoN$1 400
Omukwati wopendjela Alfred Matomola (67) okwa ti oshimaliwa shaye shopendjela yovakulupe osha pwa po moule ashike wovili imwe eshi e shi kwata.
Matomola oshimaliwa eshi oheshi longifa okufila oshisho ovaneumbo vaye ve li 14.
Oheshi longifa okufuta eumbo omo hava di, okufuta olusheno, nokulandela ovaneumbo vaye oikulya noipumbiwa imwe ya wedwa po.
Etivali eshi kwa li ta popi noThe Namibian peumbo laye olo ta hiila moKatima Mulilo konhele hai ifanwa Cowboy, Matomola okwa ti oipumbiwa yaye oi hapu neenghono.
Oha tonatele omukulukadi waye,ovanakadona ve li vatanho novatekulu ve li vaheyali, osho a ti ngaho.
“N$800 ookufuta onduda.”
Eshi ohashi mu fiye ashike noN$600 yokulanda oikulya yovanhu ve li 14 omwedi aushe.
“Omafiku aa, oikulya oi na ondilo neenghono, ndee to tale kutya ovanhu vangapi ndi na okupa va lye. Omafele avali oo a wedwa ko itaa ningi elunduluko la sha meenghalamwenyo detu.
“Nakufya pelesidente Hage Geingob, medina longhenda nelineekelo laye mu she, okwa li a hala opendjela i wedelwe fiyo N$3000, ashike inashi ningwa.
“Ngeno ove tu pa nee nande oN$2000, nande natango inai wana. Paife ova hala okuninga pelesidente Geingob a monike a fa omunaipupulu kovakulupe,” Osho a ti ngaho.
Ominista yoimaliwa Iipumbu Shiimi, okwa li ya shiivifa ewedelo lomafele avali kopendjela yovakulupe eshi kwa li tai shiivifa omutengenekwafaneko.
Matomola okwa ti ounona vaye aveshe kave na oilonga Okatekulu kaye kamwe ohaka kwata opendjela youfiye yoN$350.
Ohai vatele kashona, osho a ti ngaho. “Lipula ashike kutya ounona vamwe ava ohava i kofikola ndee ova pumbwa oikulya keshe fiku. Ohatu xupu ashike konghenda yaKalunga,” Osho a ti ngaho.
Matotela haye auke. Monghalo omu eli omu na ovakulupe vahapu ovaNamibia.
KOUMBUWANHU
Liezel Koopman (25) Ohadi nameme waye Katrina Koopman (79) koKeetmanshoop. Ohava di mokambashu ke na eenduda mbali dokunangala muhe na olusheno nomeva ve li omulongo.
Liezel okwa kala ehe na oilonga oule weedula hamano, yee oku na ounona vavali, ovo hava filwa oshisho kumeme waye. Katrina natango okuna ovanamati vatatu ovo aveshe ihava longo.
“Konima yeedula mbali di yadi andi kongo oilonga, natango inandi mona. Opendjela yameme oyo hai futu eumbo letu noikulya,” Liezel osho a ti.
Okwa ti kapu na oshimaliwa sha shaala po shoinima ya endelela.
Efimbo limwe ihava kala tava dulu okufuta eumbo omo hava di, ndee tava tewa mo.
‘ONDI NA OVALUMENHU VA KULA MOLUUMBO LANGE’
Petrus Sheehama (72) okwa hala okushiiva kutya oshike epangelo inali fimaneka ehalo laGeingob.
“Omafele avali aa a wedwa ko ohatu a longifa shike? Epangelo ola dopa nale okuyandja oilonga kounona aveshe ava. Ondi na ovalumenhu va kula moluumbo lange, hava di novakulukadi nounona vavo.
“Efiku lekwato, ondi na nale omusholondodo woipumbiwa okudja kovanamati vange, ovatekulu nomeumbo lange,” Osho a ti ngaho.
Sheehama ohadi meumbo leenduda mbali lekuma koTseiblaagte.
Ashike nee, komina yeumbo laye okuna eebashu mbali hamu di ovanamati vaye neefamili davo.
‘KALUNGA OKWA KUFA PO
OMUNHU OU E TU PA ELINEEKELO’
Julia Maemeko (70) wokoKhorixas okwa ti oha file oshisho ounona vaye vatatu novatekulu vatano noimaliwa yaye yopendjela, inamu kwatelwa omayakulo elelo lodoolopa. Okwa ti okwa li e lineekela kutya epangelo otali wedele opendjela.
“Okwa li ndi na elineekelo la kola kutya ohatu mono N$3000, okwa li nale ndi na ondunge nghee handi ka longifa oshimaliwa osho.
“Ashike nee onda udifwa nai neenghono. Omunhu ota longifa omafele avali shike?
“Onghenda inene shili kutya Kalunga okwa kufa po omulumenhu oo e tu pa elineekelo. Ngeno eshi hasho shi li ngaha, ngeno okwa li e li momwenyo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
