Opaliamente otai oya ya mefudo inai pitifa nande onotwaveta yasha i ninge oveta kakele komutengenekwafaneko wopashiwana, oshinima osho inashi monika nale mondjokonona yaNamibia konima yomido 35 demanguluko.
Nande eenotwaveta di li hamano okwa li da tulwa poshitaafula neudo, kapu nande oimwe kwa li ya pitifwa mopaliamente, kakele ashike komutengenekwafaneko wopashiwana muApilili.
Oshinima eshi sha nghundipala otashi piyaaneke elelo lapresidente Netumbo Nandi-Ndaitwah, oo kwa li a udaneka kutya opaliamente otai ka manifa eeveta da fimana di li 11 neudo.
Ashike natango opaliamente paife oya pata omivelo dayo inai pitifa nande oimwe yomudo.
Presidente okwa lundila eengudu domilameno kutya otadi kateke oinima owina nokutwala eemhata dokule.
“Opaliamente oya kala omutumba oule weemwedi hetatu ashike kapu na nande oveta ya pitifwa ndee ngee oto landula nawa, eemhata omapulo ashike, pamukalo wowina wokwiimba opaliamente i ye komesho noilonga yayo,” osho a ti ngaho Oshoondaxa pefimbo loshoongalele shevava lovanyasha voSwapo koMariental.
Presidente okwa pula ovanapalimente va xulife po oudano wavo ndee tava ningi oilonga yaye ipu, ta ti okwe lilongekida okuwanifa po omaudaneko oo a ninga kombinga yokupitifa eenotwaveta da fimana pefimbo puhe na nande ekateko.
Okwa hola ehandu eshi onotwaveta youndjolowele wopamadilaadilo naayo yedu inadi pitifwa nande okwa li da yambididwa komwaalu uhapu wovanapaliamente.
Omupopiliko womutumba wopashiwana Sacky Kadhikwa oshivike eshi okwa koleka koThe Namibian kutya eenotwaveta ashike mbali, omitengenekwafaneo, kwa li da pitifwa kopaliamente yoneudo.
Presidente wongudu yoSwanu of Namibia Evilastus Kaaronda okwa ti opaliamente inai dopa ashike okupitifa eenotwaveta dihapu, ashike natango oya ya mefudo nomapulo inaa nyamukulwa okudja keengudu domilameno a yuka keeminista.
Omapulo amwe aa okwa li a pulwa muApilili, osho a ti ngaho.
“Ovanapaliamente vamwe ohava kala eevili oonhatu tava kundafana ashike oinima ngaashi okupula omapulo, okutula oikundafanwa poshitaafula neeministili tadi yandje ouyelele.
“Ohatu kala ashike twa tala koinima ihe na oshilonga keshe efiku ile ovanhu tave likundu kutya olyelye a popya shike nonghee kwa li sha popiwa,” osho a ti ngaho.
Kaaronda okwa ti ngee oilonga yopaliamnete inai lundululwa, itai etela Namibia ouwa washa, ta weda po kutya opu na omumbwe yokulundulula nghee hai longo.
“Ihatu tameke po14h30 ngaashi eeveta tadi ti, ohatu tameke po14h45, sha yuka po15h00 ndee hatu dimbuka po17h45.
“Alushe ihatu tameke pefimbo olo twa pumbwa okutameka. Ondi wete kutya opu na oupyakadi nomukalo oo hatu longo,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
