OOYENE yomapya omulongo ngoka ge li meni lyoongamba dhondolopa yaNdangwa oya geya omolwelombwelo lya zi kondolopa ndjoka kutya omagumbo gawo otaga ka pulwa ga kale taga futu oshimaliwa komwedhi.
Oshimaliwa shoka shooN$105 komwedhi anuwa otashi kala tashi futwa kooyene yomapya ngoka molwashoka ogeli meni lyoongamba nonkene ondolopa otayi pula oshimaliwa shokuthitha.
Omukalimo gwomomukunda Omakango ngoka gu li mooha dhondolopa, Anna Angula okwa lombwele onzonkundaneki ndjika omasiku ga zi ko kutya ondolopa inayi ya yelithila nawa kutya omolwashike aakwashigwana ye na okukala taya hiila(thitha) omapya gawo okuza kumuni.
“Evi ndika olyetu.
Opo twa kala mpaka omanga nokuli Ondangwa inaayi ningwa ondolopa. Iifuta yamuni oyi li pombanda noonkondo itatu yi vulu, ishewe ipula owala kutya itatu futwa sha(ngele omapya otwe ge etha),” osho a popi ngaaka.
Okwa popi kutya ye inaya lombwelwa sha kombinga yokuthitha omapya gawo kumuni.
Okwa gwedhapo kutya kakele kofuto taya pulwa yokuhiila, onkene wo haya pulwa ya gandje iifuta yomayakulo galwe gamuni ngaashi gookadhimamulilo osho wo geyuko po lyiiyagaya.
“Omayakulo hatu pewa okuza kumuni ogomeya ashike opuwa.
Omaloli gokuyuka iiyagaya komukunda gwetu ihaga thiki ko. Uuna twa adhika kiiponga yomulilo kuna esiku wu mone ololi yookadhimamulilo tayi ya ko kutse.
Omolwashike ano yena okukala taye tu futitha omayakulo giinima ihaatu yi mono?” meme Angula osho a pula ngaaka.
Omukwashigwana gulwe ngoka a yemata, meme Aune Shoombe, naye ota tsu kumwe naandhoka dha popiwa metetekelo.
Okwa popi kutya ke wete shu uka okukala taya futithwa iifuta yamuni omanga omukunda gwawo gu li kohi yelelo lyoshilongo shaNdonga.
“Otwa kala mpaka uule womimvo odhindji nohatu gandja iifuta yokomumvo kelelo lyopamuthigululwakalo gwaNdonga, ashike ngashingeyi otatu pulwa ishewe tu kale tatu hiila.
Ofuto yokuhiila oyashike ishewe ngele omapya getu otwe ga mona okupitila melelo lyopamuthigululwakalo?” osho a pula ngaaka.
Okwa popi kutya iifuta yamuni oyi li pombanda nonkene oya tulitha aanamikunda oyendji moondjo.
Ondolopa yaNdangwa ohayi pula iifuta yomagumbo gomiti, mboka taya thithwa evi mondolopa osho wo mboka taya hiila omahala pakathimbo.
Mayola gwondolopa yaNdangwa, Mweneni Auala, okwa popi kutya ooyene yomagumbo gomapya ngoka ge li meni lyoongamba dhondolopa oye na okufuta iifuta yokuthitha ngaashi shi li pamautho gepangelo.
“Aanamikunda oyendji oya lombwelwa kutya inaya pululitha we omapya gawo molwashoka evi olya ningilwa nale omathaneko gondolopa nonando sigo oompaka hamayakulo agehe ga thikithwa.
Ondolopa okwa li wo ya futu mo ooyene yomagumbo galwe ngoka gena omapya,” osho a popi ngaaka.
Auala okwa popi kutya opuna shili aakalimo yamwe unene yomomikunda dhomoongamba dhondolopa mboka kaaye na ontseyo ya nkene omapendulopo gondolopa taga tulwa miilonga.
“Otatu gandja ombili molwashoka itatu lalakanene okudhigupaleka oonkalo dhaantu yetu.
Ihe otatu lalakanene okuhwepopeka nokugandja omayakulo ge li nawa kaakallimo yetu,” osho a hokolola ngaaka.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
