Oosikola hetatu ndhoka inaadhi shangithwa dha patithwa

Omukuluntuwiliki gwelongo moshitopolwa shaKhomas, Paulus Nghikembua okwa katukile onkatu oosikola ndatu ndhoka dha kala tadhi longo shaali paveta moshikandjohogololo shaSamora Machel, notaku hokololwa dha kala tadhi gandja ootundi kaanona yondondo okuza pevi lela sigo opondondo 7, shoka ngashingeyi osha guma aanasikola ye li 800.

Nghikembua okwa popi kutya oosikola ndhoka dha ndhindhilikwa tadhi longo moshitopolwa shaKhomas shaa li papitikilo, odha lombwelwa dhi pate sigo opethimbo ndyoka tadhi kala dha shangithwa nuuministili welongo.

“Oosikola ndhoka ndatu tadhi longo shaa li paveta, inadhi shangithwa nande, nonkene elongo taya gandja poosikola ndhoka kali li paveta. Osha pumbwa okuyelekwa kutya opu na omilandu dhi na okulongithwa opo oosikola dhopaumwene dhi shangithwe ishewe opu na oonkatu dhontumba ndhoka dhi na okugwanithwa opo elongo li tamekwe okugandjelwa pehala lyontumba,” osho a popi ngaaka.

Okwa gwedha po kutya oosikola ndhoka tadhi totwa po nokutameka tadhi gandja omayakulo gelongo pwaana omukandapitikilo okuza kuuministili otadhi patithwa, noshikondo shelongo moshilongo itashi popile nande onkalo ndjoka.

Nghikembua okwa popi kutya mongashingeyi aanasikola 800 mboka ya kanitha elongo sho oosikola dhawo dha patwa, otaya ka tulwa moosikola ndhoka dhi li popepi ngaashi yOlof Palme Primary School, Hillside Primary School osho wo moMartti Ahtisaari Primary School.

“Ngoka omalongekidho owala gopakathimbo. Ethaneko lyetu okutunga po mbala osikola momudhingoloko ngoka uuna ehala lya nuninwa iinyangadhalwa yelongo lya gandjwa,” osho a popi ngaaka.

Nghikembua okwa popi kutya nonande kehe omuntu okuna uuthemba wokutameka po osikola ye yopaamwene onkene tashi pumbiwa osikola kehe yi kale ya shangithwa ngaashi tashi uthwa kohi yokatendo 42 kOveta yElongo, (Oveta 16 yo2001).

“Otuna omukumo kutya otapu ka kala ekandulopo lyomukundu ndyoka tali kalelele opo tu kale tu na oosikola odhindji dhi li po ko kuyapukilwe omwaalu gwaantu ngoka tagu indjipala moshitopolwa, unene tuu momudhingoloko gwaVenduka,” osho a popi ngaaka.
OMULANDU
GWOPAVETA

Omukuluntuwiliki guuministili welongo, Sanet Steenkamp okwa popi kutya moshitopolwa shaKavango Uuzilo omwa ndhindhilikwa oosikola ntano inaadhi shangithwa ndhoka kumwe dhi na aanasikola ye li 654.

Steenkamp okwa popi kutya olaata yekonakono lyopashigwana, ndjoka yu ulikwa kuminista, ohayi kuutumba lwiikando itatu komvula opo yi tale muule omaindilo goosikola dhopaumwene, nomulandu ngoka ohagu tala ngele iipumbiwa ayihe oya gwanithwa po.

“Ohatu gandja omalombwelo ga yaga kegonga kaawiliki yelongo miitopolwa opo ya shilipaleke kutya oosikola ndhoka inaadhi shangithwa odha patithwa. Shoka ohashi kala sha kwatela mo oonkundathana dhomuule, osho wo ekwatathano lyoonkundathana naakwashigwana,” osho a popi ngaaka.

Steenkamp okwa popi kutya kombinga yoosikola ndhoka inaadhi shangithwa, uuministili owu na omayele gopaveta ngoka haga gandjwa okuza kOmbelewa yaHahendendjayi.

“Otu na omulandu gwopaveta ngoka hagu landulwa kOmbelewa yaHahendendjayi kombinga yoosikola ndhoka inaadhi shangithwa. Minista okuna okutseyithila oosikola ndhoka dhi patwe naashoka osho nee twa kala tatu ningi opamwe noonkundathana opo aanasikola ya taambelwe moosikola ndhoka dhi li popepi. Ngele shoka inashi ningwa nena oshi na oku ka tokolwa kompangu,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.