OMAKONAKONO oga koleke kutya oonyati mbali ndhoka dha dhipagwapo moshitopolwa Otjozondjupa odha li dha humbata uuvu wekondo nelaka.
Omundohotola gwiinamwenyo, Cleophas Bamhare okwa koleke kutya omakonakono ga ningwa moshilongo nopondje yoshilongo oga ulike kutya iinamwenyo mbyoka oya li ya humbata omukithi ngoka.Okwa ti iinamwenyo mbyoka oyi shiwike iihumbati yuuvu mboka onkene oonkatu ndhoka dha li dha katukwa mu August konima sho iinamwenyo mbyoka ya li ya monika , opwa li pewetike kutya otashi vulika mbika yikale yina omukithi ngoka. Oonyati ndhoka mbali odha li dha monika momasiku omulongo 16 ga Auguste pEkwenye momudhingoloko gwa Okakarara. Uuministeli wOmudhingoloko naamboka wUunamapya owa tulapo oongundu dhaanambelewa opo ya landule nokukonga iinamwenyo mbyoka oku yi dhipaga. Opwa ningwa woo etokolo kutya oshitopolwa shoka mwaadhika iinamwenyo mbika namu tulwe oondjindikila dhomainyengo giinamwenyo uule womasiku omilongo 21, nokonyala oofaalama omathele 200 dhopaipindi naandhoka dhomehala lyaayehe odha edhilwa. Opwa li wo pwa tulwa omainda gomoondjila nanafaalama oya lombwelwa ya kale yiilongekidha nawa. Aanambelewa yuukalinawa wiinamwenyo oya kala nokutalela, na sigo oompaka inapa monika oshinamwenyo shina uuvu wekondo nelaka.Omukuluntu gwehangano lyuunamapya lya Namibia, Sakkie Coetzee okwa ti oku na einekelo moshikondo shoondohotola dhiinamwenyo kutya otashi tulapo oonkatu dhegameno okugamena oshikondo shika shonyama opo onyama ya Namibia yi kale natango tayi landithwa pwaana ondjindikila yontumba. Oonkatu ndhoka dha katukwa koshikondo shika otadhi yambiidhidhwa woo ishewe kehangano lyonyama lya Namibia.
