Oongundu dhaanyasha dha hangana mokukondjitha aakokele yoSwapo

OONGUNDU mbali dhaanyasha dhoka dha li tadhi kondjele ewiliko lyewawa lyaanyasha yongundu pokongelesa yahugunina ngashingeyi odhi imanga kumwe opo dhi taalele aakokele yongundu.

Mokati kaanyasha mbaka omwa kwatelwa omaume nale gomupresidente Hage Geingob nosho wo mboka ya li taya yambidhedha Jerry Ekandjo pethimbo lyokongelesa yomahogololo mo2012.

Oya li ya tsakanene mEtitatu lyoshiwike sha zi ko moshilandopangelo,Windhoek, taya ti oye shi ningi nelalakano lyuukumwe waayehe.

Ngoka a li nale amushangandjayi gwewawa lyaanyasha moSwapo, Elijah Ngurare, mEtine lyoshiwike sha zi ko okwa koleke oshigongi shawo, shoka omathano gasho ga pitithilwe kiikundaneki yoohungi dhanakanena ya yooloka okuza ongulohi yesiku ndyoka.

Ngurare okwa ti oongundu dhika mbali odha tokola okuhulitha po okwiifila okavi nodha hangana mokukondjitha omutondi.

Sho ta popi kombinga aakokele mboka taya lele ongundu Swapo, Ngurare okwa ti: “Oya nyanyukwa sho ye wete twa topoka, notayu uvu nayi ngele otwa hangana.”

Okuza sho ethana lyaDesmond Amunyela, Job Amupanda, Elijah Ngurare, Armas Amukwiyu nomunangeshefa Vaino Nghipondoka lya tameke okwiingagana miikundaneki mEtitatu lya zi ko, omihapo odha andjagana kutya aatondathani kwa li mbaka oya hangana opo ya tale nkene taya ndjungaandjunga elelo lyongundu.

Nando ongaaka, Ngurare okwa ti yo oya li ya tsakanene opo ya kundathane oompangela dhokuhanganitha aanyasha yongundu.

Gumwe gwomaawiliki yaanyasha moshitopolwa Oshikoto, Edward Gabriel, okwa ti aalumentu mbaka yatano oya gongalele opo ya kundathane kombinga yoshikumungu shokuthiga po AR kwiilyo yongundu Swapo nosho wo okuhanagula po AR.

Omuwiliki gwo-AR Job Amupanda, nando ongaaka, ndhika okwe dhi ikala, nokwa pula Gabriel opo kaa taandeleke omutoto kutya oya li taya kundathana kombinga yo-AR.

Kashi shi oshiholekwa kutya mboka ya gongalele ongulohi yEtitatu kaya li haya tsu ya thithe.

Sho Amunyela, Amukwiyu naNghipondoka ya li taya yambidhidha Hage Geingob pokongelesa yoSwapo ya piti, Ngurare okwa li ta yambidhidha Ekandjo.

Amupanda kali ha holeke okwaatsakumwe pokati ke naAmukwiyu, noshikando shimwe okwa shangele koTwitter kutya ota sikimine Amukwiyu oombwa dhe.

Ngurare okwa zimine kutya kaya li yu uvitathane nale, ihe molwombili, ngashingeyi oya hangana.

“Kapu na etompelo lyokukala tatu kondjo konima yomimvo 26 dhemanguluko.

Otwa tokola kutya oshihwepo tu fumvike uutondwe kehe e tatu hangana,” Ngurare ta ti.

Oonkambadhala dhokuuva kuAmunyela naNghipondoka odha hulile muunyengwi.

Ngurare okwa shanga wo koFacebook kutya aaleli yaanyasha oya kala ooyihontaali dhiita pokati kaakokele, mboka ya hangana shike konima yuulalelo kombala yaNamibia.

Sho a li tapopi kombinga yiipotha yeihumbatonayi mbyoka ye, Amupanda naGeorge Kambala ya tulilwa mo kongundu Swapo, Ngurare okwa ti oya pumbwa okwiimanga kumwe opo ya kondjithe aaleli mboka taya longitha oonkondo dhepangelo nodhongundu mokulwa iita yopaumwene.

“Omolwashike tu na okupatululilwa iipotha?

Opo shike?

Ohaya kala ya mwene ngele oyana.

Omu wete tuu kutya ndyoka elongitho nayi lyoonkondo dhuuleli,” Ngurare ta ti.

Ngurare okwa ti aanyasha oye na okuhangana e taya longitha oonkondo nomaliko gawo opo ya lundulule nokuhumitha komeho eliko nemanguluko lyoshili.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.