Oondjima dhaGoreangab dha galukile momudhingoloko

OONDJIMA ndhoka dha kala tadhi tyakaleke olukanda lwoombashu lwaGoreangab mOvenduka otaku hokololwa dha galukile natango momudhingoloko ngoka, nonande uuministili womidhingoloko okwa li wa ningi onkambadhala omasiku ga zi ko oku dhi tidhila kokule.
Oshiwike sha zi ko, Uumistili wOmidhingoloko nOmatalelopo owa ningi etokolo okuyaha nokudhipaga po oondjima ndatu, sha landula omanyenyeto gaakalimo mboka ya lulilwa koondjima tadhi iteyele moombashu dhawo nokuyaka mo iikulya.
MOlyomakaya, iinamwenyo mbyoka otaku hokololwa ya galukile momudhingoloko nokuhanagula iikunino yimwe.
Omukalimo Lahya Shifa okwa lombwele onzonkundaneki ndjika uunambo kutya okwa adhika a tutika iilya yomahangu mbyoka kwa li ta longekidha yi ka tsuwe, ashike oondjima odhi iteyele momudhingoloko nokulya po iilya mbyoka.
“Ngaaka okoombinga owala dhetu. Kandishi nee kutya koombinga dhilwe oya yonenwa shike, ashike oondjima ndhoka odha kala tadhi tu talelepo,” osho a popi ngaaka. Otaku hokololwa kutya oondjima odha kala tadhi piyaganeke olukanda ndoka ethimbo nuule nongashingeyi aakalimo ohaya kambadhala oku dhi mbandameka taya dhenge koondoloma nenge koombashu opo dhi shune kokule. Omukalimo gulwe, Jonas Paulus, okwa hokolola kutya aanambelewa yuuministili oya talelepo omudhingoloko gwawo mOlyomakaya noyu umbu mombanda opo ya fadhukithepo oondjima.
Ashike nando ongaaka, okwa popi kutya inashi kwathela sha shomupondo molwashoka onkene oondjima tadhi galuka oku ya piyaganeka, nokwiindile opo uupyakadhi mboka wu monenwe ekandulopo lyomukundu tali kalelele. “Aanambelewa oko ya li huka noyu umbu ko owala lwoshikando shimwe etaya shuna. Inaya hala nande ye tu kwathele lela. Oya pumbwa andola okukala haye ya ko olundji opo ye dhi mbandameke dhi hedhe kokule, molwashoka mongashingeyi ohadhi kala owala nokugaluka,”osho Paulus a popi ngaaka. Omunambelewa omukuluntu muuministili okwa koleke kutya okwa li ya shuna ko komudhingoloko ngoka konima sho ya yakula oolopota kutya oondjima odha galuka. Ashike nando ongaaka, omunambelewa ngoka okwa popi kutya kapuna ondjima ya yahwa oshikando shika molwashoka odha fadhukapo sho dha mono omainyengo gaantu.
Aakwashigwana yomoGoreangab, oshiwike sha zi ko oya hokololele onzonkundaneki ndjika kutya otaya hepekwa koondjima ndhoka tadhi iteyele momagumbo gawo nokwiikuthila
Oondjima ndhoka oohahu nonkene ohaya tila oku dhi umpila, nokuli mo2022 okwa li dha dhipaga okanona komimvo ntano, omanga okanona kalwe okwa li ka taambelwa moombete.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.