‘Oombola otadhi kwathele okushunitha pevi omaponokelo koongandu’

OMUNASHIPUNDI gwelelo lyoshitopolwa sha Kavango Uuzilo okwa popi kutya ngele epangelo olya dhike oomboola dha gwana momikunda dhopopepi nomulonga nena otashi ka kwathela mokushunitha pevi aakwashigwana mboka olundji haya ponokelwa pethimbo taya kongo omeya momulonga.

Omunashipundi, Damian Maghambayi, okwa popi kutya okuwete onkalo yaakwashigwana taya ponokelwa koongandu tayi kala nokutsikila unene tuu pethimbo ndika molwashoka oshishiindalongo Angola osha mona omuloka gwa kola nondjele yomeya oyi indjipala komeya ngoka taga zi hoka.

Sigo oompaka aantu yatatu oya kanitha nale oomwenyo numvo sho ya ponokelwa koongandu moshitopolwa shoka.

Miiningwanima ayihe itatu, oonakuninga iihakanwa oya adhika ya ka teka omeya komulonga gwaKavango.

Oshiningwanima shotango osha ningwa mesiku lyomumvo omupe momukunda Shikoro sho omukiintu gwedhina Mudi Muhembo a lika kongandu omanga a adhika ta teke omeya. Oshiningwanima oshitiyali osha ningwa momukunda Mutjiku momasiku 4 Januali sho kamatyona gwomimvo 17, Bunewero Peter Kuwananayo, a kanitha omwenyo gwe sho a ponokelwa kongandu omanga naye a li ta kambadhala okuteka omeya.

Momasiku 5 Januali, kamatyona gwomimvo omugoyi okwa mana oondjenda momulonga gwaKavango kombinga ya Angola, popepi nohotela yedhina N’Kwazi Lodge yi li omukaakena owala gwookilometa 20 okuza moRundu. Kamatyona ngoka otaku hokololwa a yi moAngola a ka talelepo yinakulu nopethimbo a lika kongandu okwa adhika a ka teka omeya nayakwawo yatatu. Maghambayi okwa pandula oonkambadhala dhUuministili wUunamapya nUuniimuna, Omeya nEtendululo lyEvi okutula po oomboola momikunda dhimwe ndhoka tadhi adhika popepi nomulonga.

Mo2022, elelo lyoshitopolwa olya kutha onkatu okwe eta po oopomba dhomboola osho wo eshina lyokudhinda omeya momukunda Thikanduko tagu adhika moshikandjohololo shaMukwe konima sho Ellen Diisho (15) a mana oondjenda sho a ponokelwa kongandu.

Maghambayi okwa popi kutya shoka osha kwathela molwashoka osha shunitha pevi ompito yaantu yokukala taya ponokelwa koongandu momukunda ngoka.

Mongashingeyi, Maghambayi okwi indile aakwashigwana ya longithe omukalo gwopamuthigululwakalo gokwiigamena ngaashi okukala ya thitika pomahala giihwa puupitilo wokuya mpoka haya teke.

Okwi indile wo aakwashigwana ya kale ya lungama sho taya takamitha iimuna yawo momudhingoloko gwomulonga omanga taku ningwa oonkambadhala dhokwe eta po egameno lyi li nawa.

Maghambayi okwa popi kutya elelo lyoshitopolwa otali longo neitulemo okwe eta po edhiladhilo lyofaalama yoongandu.

Shoka, okwa popi kutya otashi ningwa opo ku ngambekwe omwaalu gwoongandu ngoka tagu indjipala omanga wo taku kalekwa po iiyemo yaakwashigwana okupitila muunafaalama woongandu.

Otaku fekelwa kutya momulonga gwaKavango omuna oongandu dha konda po11 000.

“Sigo oompaka itashi kwatha sha. Aakwashigwana ihaya mono mo uuwanawa wa sha moongandu ndhoka, oomwenyo ashike dhaantu tadhi kana,” osho a popi ngaaka.

“Oomwenyo ndatu odha kana nale okuza petameko lyomvula ndjika.

Shoka otashi ulike kutya onkalo oya nayipala ishewe kapu na uuyuuki wa sha kombinga yomakanitho goomwenyo,” osho a gwedhapo ngaaka.

Omumvo gwa zi ko, Uuminsitili wOmidhingoloko, Omakuti nOmatalelopo owa landithapo oongandu 40 opo ku shunithwe pevi omaponokelo taga ningilwa aakwashigwana koongandu.

Omupopiliko guuministili wuunamapya nuuniimuna, Jona Musheko okwa popi kutya oomboola 21 odha ningwa nale moshitopolwa shaKavango Uuzilo momumvo pashimaliwa gwo2023/24.

Oomboola omulongo dha gwedhwa po odha tegelelwa wo dhi kale dha dhikwa po manga omumvo nguka pashimaliwa inaagu pwa ko.