Oombesa dho-Intercape dhapewa egeelo lyooN$36 000

Oombesa omugoyi dhonomola yaSouth Africa dhehangano lyo-Intercape otashi vulika dhi ka kwatwe po kopolisi ngele odha ndopa okugwanitha po egeelo lyofuto yooN$36 000.

Shoka osha landula sho opolisi yaNamibia ya tula oveta miilonga molwashoka anuwa oombesa dhehangano ndyoka odha longo shaali paveta okututa aantu meni lyoshilongo pwaana epitikilo lyopaveta.

Momukanda ngoka gwa pitithwa mEtitatu, Uuministili wIilonga nIiyenditho owa popi kutya ehangano lyaIntercape oli ikuthile onkatu okulonga meni lyoshilongo tali fala aantu pomahala ga yooloka pwaana omukanda-pitikilo.

Uuministili owa popi kutya paveta yiiyenditho moNamibia, iihauto yonomola yopondje yoshilongo inayi pitikwa okugandja omayakulo gomoshilongo pwaana omukandapitikilo.

Oveta yIihauto nOopate oyi indika oshinima shoka, shila oongele pwa gandjwa epitiko lyopamukanda okuza koRoads Authority.

Uuministili owa popi kutya muDesemba Intercape, okwa gandja eindilo opo a gandje omayakulo gosheenditho kaakuthimbinga momaudhano gekopi lyuuyuni lyokiliketa yaamboka ye li kohi yomimvo 19.

Momasiku 15 gaDesemba, ehangano ndyoka olya pulwa li gandje uumbangi kutya moNamibia kamuna iiyenditho nenge oombesa tadhi vulu okugandja omayakulo ngoka taya ka gandja.

Ashike nando eyamukulo ndyoka inaye li gandja kuuministili, onkene ya tsikile okugandja omayakulo gosheenditho kaakuthimbinga yomaudhano, shoka shayi pambambo oveta nomilandu noshe eta uuministili wu katuke onkatu.

Oveta ndjoka ya pogolwa, otayi popi kutya egeelo lyooN$4 000 olina okugandjwa kukehe ombesa(omambesa omugoyi), osho uuministili wa popi ngaaka.

Oveta ndjoka oya pitika iihauto mbyoka ya pogola yi futithwe nongele oya ndopa oyi na okukwatwa po.

Uuministili owa gandja elondodho lya yaga kegonga opo oombesa ndhoka dhopondje yoshilongo kaadhi longe we iilonga mbyoka tayi vulu okulongwa kiiyenditho yomoshilongo pwaana epitikilo lyopaveta.

Epangelo olya popi kutya nonande Namibia okwa taamba ko iinyangadhalwa yopaigwana yi dhanenwe moshilongo, onkene ooveta nomilandu dhoshilongo dhina okwiiyuthwa kudho ethimbo kehe.

Namibia naZimbabwe otamu dhanenwa uudhano wekopi lyuuyuni lyokiliketa yaamboka ye li kohi yomimvo 19, wa tameke momasiku 15 notawu hulu momasiku 6 Febuluali.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.