EPANGELO lya thigwa noshinakugwanithwa oshinene shokutala kutya oolye taya pingenepo Oohamushanga Aakuluntu mOmauministeli gi ili nogi ili mboka ya thika okupenzelwa nokwa tegelelwa taya ka thiga po iilonga yawo mbika muule womumvo tagu ya.
Oshinima otashi tameke ngaa pu Amushanga gwOkabinete tate Frans Kapofi ngoka a tseyitha kutya ota thigi po oshilonga she shika shUuhamushanga wOkabinete molwashoka otaka ndjoina Opolotika ongOshilyo shOshigongi shOpashigwana, sha zi mpoka sho a ningi gumwe gwomiilyo yOswapo mbyoka ya hogololwa iilyo yOshigongi sdhOpashigwana momahogololo gOpaupresidende nogIilyo yOshigongi shopashigwana ngoka ga li ko meti 28 Novemba 2014.
The Namibian pokati mpoka okwa kundana kutya opu na Oohamushanga taya Kalelele yatano mboka omauvathano giilonga yawo itaga ka lepekwa we molwashoka oomvula dhawo odha thika pokupenzelwa.
Oonzo odha lombwela The Namibian kutya, oshi li tashi limbilike, molwashoka etokolo lyokutya omauvathano giilonga yawo itaga ka lepekwa we, olya ningwa aniwa inaye shi lombwelwa. Onzo yi shi kwiinekelwa lela yopopepi nEgumbo lyEpangelo, oya ti kutya oshinima shokukala inaya tseyithilwa sha moshinima shika, otashi vulika pu na ngaa sha sha tulwa momadhilaadhilo kAakuluntu.
Onzo yEpangelo tayi yakele ko The Namibian kutya Oohamushanga taya Kalelele mboka kwa tegelelwa ya ye mopenzela ongashi nee Amushanga ta Kalelele mUuministeli wUukashikekookantu nOnkalonawa yaanona tate Erastus Negonga, Amushanga ta kalelele mUuministeli wEgameno nEpopilo lyOshigwana Neutala Angolo, Amushanga ta kalelele mUuministeli wUunamapya, Omeya nIihwa Joseph Iita, na Amushanga ta kalelele mUuministeli wOohi nIikwafuta Ulitala Hiveluah. Gumwe wo ngoka tayi moshipundi shevululuko oye Hanni Rumpf, Omukalelipo gwa Namibia kiilongo yo Benelux yaBelgium, Hollanda na Luxembourg. Omusamane Rumpf nguka okwa kala Amushanga ta kalelele mOmauministeli ngashi mboka wOmidhingoloko nOmatalelopo, wIipindi nIikwafaabulika noshowo mOkommissi yOmathaneko gOpashigwana.
Oohamushanga taya kalelele ohaya kutwa miilonga mbika uule woomvula ntano, nange okwa halika euvathano tali lepekwa. Omusamane Negonga sho a pulwa ina hala kwali okutya ko sha, nokwa ti shapo nakupulwe omusamane Kapofi. Momuvo 2010, Negonga okwa li a hala okufutitha Epangelo sho lya li lye mu kutha iilonga ye, omanga a li Amushanga omukuluntu mUuministeli wOmapangelo gOpaitopolwa, Omagumbo noshowo Ehumithokomeho lyIitopolwa yokomikunda. Ompangu oya tokola nokulombwela Epangelo kutya Negonga na shunwe miilonga ye, nokwa ningwa nee Amushanga ta kalelele gwUuministeli wUukashikekookantu. Oonakutalakonawa pethimbo ndyoka oya li ye shi tala ko kutya elundululo lye olya li lye mu uvitha nayi ngaa.
Negonga ye mwene mEpangelo okwa tameka mo onga Amushanga gwOpevi ta kalelele gwUuministeli wEgameno nokonima okwa ka ningwa Amushanga lela ta kalelele gwUuministeli wEgameno. Me Angolo okwa kala ethimbo ele Amushanga ta kalele mOmbelewa yOmupresidende nokwa ka lundululilwa inashi tegelelwa kUuministeli wEgameno nEpopilo lyoshigwana momumvo 2012.
Oshinima shoka sha li sha talika ko koyendji ongekululo miilonga. Ohela Angolo okwa ti kutya ye mwene ethimbo lye lyeuvathano lyiilonga otali pu ko mu Septemba omumvo tagu ya na ina lombwelwa natango kutya euvathano lye nEpangelo ndika itali kalepekwa we. “Ondi ilongekidhas okuya moshipundi shevululuko ngaye ndi ka tsakaneke omashongo galwe monkalamwenyo,” Angolo a ti ngawo.
Nonando Iita a koleka kutya ethimbo lyiilonga lye otali hulu mu Maalitsa omumvo tagu ya, okwa ti natango ina pewa ombapila yoku mu tseyithila kutya euvathano lye lyiilonga pokati kEpangelo naye otali ka lepekwa nenge ahawe.
Ta lombwele The Namibian kutya okwa shangela Kapofi kutya ye oku shi shi kutya ethimbo lye lyiilonga olya adha pehulilo nokuwete kutya itaka pula we elepeko lyiilonga. Iita ta ti sigo oompaka Kapofi ina yamukula ombapila ye noku li ashike a tegelela eyamukulo okuza kuye (Kapopfi).
Hiveluah naye okwa koleka ko The Namibian kutya ota yi moshipundi shevululuko mu Apilili omumvo tagu ya, ashike ina pulwa natango kutya a tsikile niilonga , ye naye ke wete ta kapula a gwedhelwe ko natango ethimbo a longe moshilonga shoka. Ashike oonzo otadhi ti kutya Hiveluah okwa fa a yakelwa ko kutya otaka pewa iilonga yUukalelipo wa Namibia penipeni. Opu na wo omapopyo taga ti kutya otashi vulika a ka ningwe Komufala mOkommissi yAaniilonga yEpangelo. Kapofi okwa ti kashi shi we oshinakugwanithwa she shokukomenda kiinima yEpangelo. Epangelo otali ka kondja okumona mboka taya yi pomahala omanene mEpangelo molwashoka yamwe ya li po, oya ya kOpolotika, ano kOparliamende momumvo tagu ya.
Omusamane Kapofi noshowo Amushanga ta kalelele mUuministeli wOmavi nOmatulululo Lidwina Shapwa, Amushnaga ta kalele gwOpevi mUuministeli wUunamapya, Omeya nIihwa me Anna Shiweda noshowo Omunambelewa Omukuluntupitithi mElelo lyOshitopolwa sha Hangwena Daniel Kashikola, oyo yamwe yomaanambelewa Aakuluntupitithi mboka ya tokola okuya kOpolotika.
