Oo-Seven-seater otadhi ka pewa omikanda dhokufelefula dhopakathimbo

Uuministili wIilonga nIiyenditho owa tula miilonga omulandu gwopakathimbo gwokugandja omukanda-pitikilo gwokufelefula gwopakathimbo kootuukala dhiinano iile ndhoka tseyika nawa ‘Seven Seater’, opo ku pupalekwe ompumbwe ndjoka ya kala po.

Aafelefuli oya kala taya nyenyeta omulandu gwokugandja omikanda dhokufelefula ngoka gwa kala tagu ya longitha nuudhigu nolundji ohaya iyadha taya pewa uutekete molwashoka otaya hingi kaaye dhi na.

Molwashoka mongashingeyi ohashi pula olule oku gu mona, uuministili owe eta po omulandu gwokugandja omikanda dhopakathimbo – omanga omuhingi a tegelela omukanda tagu kalelele.

Ootuukala ndhoka dhiiipundi iheyali mongashingeyi otadhi kala nokupewa omukanda-pitikilo gwokufelefula gwopakathimbo – gwomasiku 14.

Etseyitho lyomukanda-pitikilo gwokufelefula gwopakathimbo olya ningwa oshiwike shika poshigongi sha ningwa pokati kehanganokalelipo lyaahingi yooSeven Seater, uuministili osho wo aakuthimbinga okuyapukila omanyenyeto gaahingi kombinga yuutekete haya pewa uuna kaayena omikanda dhokufelefula.

Minista gwiilonga niiyenditho Veikko Nekundi okwa popi kutya omaindilo gomikanda dhokufelefula ngoka ga ningwa manga Auguste 2025 inaa pita, oga pwa nale noonakuninga omaindilo oya manguluka oku ka tala ko omikanda dhawo.

“Ashike nando ongaaka, aaningi yomaindilo oyendji onkene inaaya ila ko omikanda dhawo, naashoka oshi li uupyakadhi kutse,” osho minista a popi ngaaka.

Omolwuupyakadhi womikanda dhokufelefula ndhoka hadhi kala ko uuna omuntu a ningi eindilo, Nekundi okwa popi kutya aaningi yomaindilo gokufelefula mongashingeyi otaya kala taya pewa omukanda gwopakathimbo ngoka tagu kala hagu kwishi konima yomasiku 14, naashoka otashi ningwa omanga ya tegelela omikanda-pitikilo dhokufelefula ndhoka tadhi kalelele.

Konima yomasiku 14, omuhingi okuna oku ka ningululitha omukanda gulwe gwopakathimbo nonkene shoka otashi eta uuwanawa wokukala taya tsikile niilonga yawo yokufelefula omanga ya tega omikanda dhawo dhokufelefula ndhoka tadhi kalelele.

“Oveta oya gandja uuthemba wokugandja omikanda dhokufelefula dhopakathimbo dhomasiku 14, omanga omuntu a tegelela omukanda gokufelefula tagu kalelele, nonkene uuna omuhingi a ningi eindilo lyomukanda gwopakathimbo, otegu pewa pethimbo ndyoka,” osho a yelitha ngaaka.

Nekundi okwa popi kutya uuministili owiipyakidhila nokuninga omalunduluko moveta ndjoka yi li po opo ku shunithwe pevi uulethimbo wokutega omikanda-pitikilo dhokufelefula uuna omuhingi a ningi eindilo.

Mongashingeyi aahingi ohaya tege uule woomwedhi dhi li pokati kane nahamano opo ya mone eyamukulo komaindilo gomikanda dhawo dhokufelefula, ashike Nekundi okwa yelitha kutya okwa hala shi kale owala hashi kutha ethimbo lyi li pokati komasiku gaheyali no14.

“Otwa hala uulethimbo wokutegelela wu shunithwe pevi, nonkene uuna twa mana ontotwaveta ndjoka otatu yi fala komutumba gwopashigwana,” osho a popi ngaaka.

Ongoshitopolwa shomalunduluko momilandu dhomoombelewa, Nekundi okwa popi kutya aahingi yootaxi ngashingeyi otaya vulu okuninga omaindilo gomikanda dhokufelefula pukehe ombelewa yoNatis moshilongo.

“Uuna iwa potokonona omilandu dhomombelewa, otatu ka gandja etumwalaka moshigwana oku ya tseyithila nkene omilandu tadhi ka kala dhi li,” osho a popi ngaaka.

Nekundi okwa popi kutya aafelefuli oya nyenyeta kutya ohaya kala nokupewa uutekete uuna taya felefula kaayena omikanda nokwa gwedha po kutya omageelo ngoka inaga puka molwashoka oge li pamilandu dhoveta notashi pumbiwa.

“Uuna wa pewa okatekete sho to hingi waana omukanda gwokufelefula nena owuna okweetha po okufelefula,” osho a popi ngaaka.

Nekundi okwa gwedhapo nokukunkilila aahingi kutya okuhinga nuuhasha osho shimwe shomiinima tayi gumu iiyenditho yoludhi kehe, nonkene epangelo olye eta po omilandu dhokukeelela ondapo pakutula ookamela dhomeni lyiihauto, ookamela dhomewangandjo osho wo ookamela dha dhikwa pomahala ngoka ga nika oshiponga noonkondo moopate.

“Omilandu ndhoka odhe etwa po nelalakano lyokushunitha pevi iiponga yiihauto osho wo okuhwepopeka egameno moopate dhomoshilongo shetu,”osho a popi ngaaka.

OTWA PANDULA

Pablo Benjamin, oshilyo shehanganokalelipo lyaahingi yooSeven Seater, okwa popi kutya etokolo lya ningwa kepangelo kombinga yomikanda dhokufelefula ewanawa lela notali ka kwathela aagundjuka mboka taya ikongele shomboloto moshikondo shokufelefula.

Okwa popi kutya osha li lela oshiwanawa okukuutumba nuuministili, nosha simana noonkondo kaahingi yootaxi noombesa.

“Otwa ningi oshigongi oshiwanawa naminista opamwe naakuthimbinga ayehe, moka twa kundathana iikumungu mbyoka ya taalela aahingi esiku kehe ngaashi omikanda dhokufelefula osho wo egandjo lyuutekete,” osho a popi ngaaka.

Benjamin okwa popi kutya etokolo lya ningwa ewanawa moshikondo shawo notali gandja lela ekandulopo lyomukundu kombinga yuupyakadhi wokwaana iilonga.

Omalunduluko ngoka oga hala okutya aahingi yaagundjuka ngashingeyi otaya kala taya longo pwaana uumbanda wokukatukilwa onkatu omanga ya tegelela omikanda dhokufelefula ndhoka tadhi kalelele.

Otwa pupalelwa lela nompito ndjika otayi eta natse tu humithe komeho omahupilo goshilongo shetu,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.