Onkalo yoshikukuta tayi thiminike Aanamibia ya ka lande iilya koAngola

Aakwashigwana oyendji monooli yoshilongo mwa kwatelwa aalandithi, otaya mbombolokele koAngola ya ka lande iilya yomahangu osho wo iilikolomwa yilwe yomomapya ngaashi omakunde opo ye yeete moshilongo nelalakano lyokulanditha opo yi imonene mo sha shomoondjato.

Numvo ka kwali eteyo lya kola sha landula omuloka ngoka kwa li gwa nkundipala, nonkene iilikolomwa yomomapya otayi nyangwaanyangwa nongele oya monika otayi landwa noonkondo.

Aakwashigwana naalandithi okwa ndhindhilikwa taya pitile poongamba dhaShikango moshitopolwa shaHangwena okuya koAngola opo ya ka lande iilikolomwa yomomapya.

Theresia Ndilipunye, ngoka ha landithile pomatala gaNdangwa, okwa popi kutya iilya yomahangu ohayi kala tayi kongwa noonkondo pomatala nonkene onkalo okwa li ye ya thiminike opo ya ka lande iilya koAngola yo ye ye ya landithe meni lyoshilongo.

“Itatu vulu okuhupa kaatu na iilya yomahangu. Oyo iikulya hatu li esiku kehe notu na okukambadhala mpoka tatu vulu opo tu shilipaleke kutya opu na sha shokulya,” osho a popi ngaaka.

Omulandithi gulwe, Hilaria Shikongo, okwa popi kutya omolwiifuta niifendela yopoongamba yi li pombanda mbyoka haya pulwa uuna taya eta iinima moshilongo, omathimbo gamwe ohaya pititha iilikolomwa yawo yomomapya mbyoka taya landa moAngola, poothawelo dhoongamba.

“Omulandu gwokuninga eindilo lyomukandapitikilo gwokweeta iinima moshilongo ohagu pula olule omanga iifuta yopoongamba nayo oyi li pombanda noonkondo. Ihatu mono mo lela oshindji mongeshefa yetu, ashike nando ongaaka poongamba ohaye tu pula oshimaliwa shi li pombanda opo tu ete iilandithomwa yetu moshilongo nolundji ihatu vulu oku yi futa. Omathimbo gamwe ohatu pitile ngaa pomweelo gwoongamba ashike omathimbo gamwe moAngola ohatu iyakele mo opo kaatu fute sha,”osho a hokolola ngaaka.

Ngoloneya gwoshitopolwa shaHangwena Walde Ndevashiya okwa popi kutya oshitopolwa shawo osha dhengwa noonkondo koshikukuta.
“Ongoshizemo, kapu na we uulithilo wa gwana omolwomuloka gwa nkundipala osho wo efundja ndyoka kwa li lya dhenge omahala gamwe. Aaniimuna oya taalelwa konkalo ondhigu noyendji oya tameka nokuli okutembudhila iimuna yawo koAngola hoka ku na uulithilo wu li hwepo.

“Ombelewa ya ngoloneya oya kala tayi yakula omaindilo okuza kaaniimuna nokaaleli yopamuthigululwakalo opo ku ningwe oonkundathana pokati kaNamibia naAngola kombinga yuulithilo, ando ya pewe epitikilo lyopaveta oku ka litha moAngola,” osho ngoloneya a popi ngaaka.

Ndevashiya okwi indile epangelo li ninge onkambadhala yokutala ngele otali vulu okugandja uuthemba waaniimuna ya kale haya ka litha iimuna yawo moshitopolwa shaCunene noshaCuando Cubango moAngola.

“Shoka otashu ulike kutya opu na ompumbwe opo omapangelo gopaali, lyaNamibia nolyaAngola, ga ye moonkundathana kombinga yaaniimuna Aanamibia okukala taya litha moAngola,” osho Ndevashiya a popi ngaaka.

Ngoleneya okwa popi kutya kakele komuloka gwa nkundipala, efundja ndyoka kwa li lya zi koAngola petameko lyomvula nokuthiga oyendji pomutenya olye eta ya kale inaaya longa omapya gawo numvo, nonkene otaya pumbwa eyambidhidho lya kola okuza kepangelo.

Ngoloneya gwaShana Elia Irimari naye okwa popi kutya oshitopolwa shawo osha gumwa noonkondo koluteni osho wo kombuto yocorona ndjoka ya kala tayi tyakaleke omimvo dha piti. Okwa popi kutya omagumbo ngoka ga gumwa noonkondo koshikukuta otaga ka shangwa opo ga kale taga mono oshikukuta.

OMILANDU
Omukukuntuwiliki muuministili wuunamapya nuuniimuna Ndiyakupi Nghituwamata okwa popi kutya aalandithi mboka ya pewa omikandapitikilo okulanda nokwe eta moshilongo iinima ngaashi iikwamuma nosho tuu oya pumbwa oku shi ninga pethimbo lyoongamba dha patuluka.

Aalandithi mboka taya landa iikwamuma pondje yoshilongo nelalakano lyoku ka landitha oya pitikwa okwe eta moshilongo iikwamuma yoshiviha shi li pokati kookilohalama 250 no500 momuntu kehe momwedhi, omanga ngoka te eta moshilongo iikwamuma nelalakano lyokukalya naanegumbo, okwa pitikwa okwe eta moshilongo iikwamuma inaayi konda pookilohalama 200 momuntu kehe momwedhi.

“Nelombwelo ndyoka uuministili otawu tseyithile oshigwana kutya iilya yomahangu nomakunde ngoka haga landwa koAngola naga kale ga landwa meni lyomukaakena gwookilometa 60 [okuza poongamba] momwaalu gwa tumbulwa [metetekelo], unene tuu mboka taya landa momwaalu omushona gokukalya [naanegumbo], inayi pumbwa omukanda gwokushilipaleka kutya iinima mbyoka oya konakonwa,” osho a popi ngaaka.

Ashike nando ongaaka, okwi indile Aanamibia mboka taya eta iikwamuma moshilongo ya shilipaleke kutya oya yela kaayi na uupuka, iiyagaya, omavi, omikithi nosho tuu.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.