Onkalo yoluhepo otayi etitha aavali ‘ya landithe po aanona’

Ondjayi yetanga lyopolisi Joseph Shikongo okwa popi kutya onkalo yi li pombanda yokwaana iilonga osho wo oluhepo, oyo yimwe yomwaambyoka tayi etitha oonkalo dhekwatombambyona lyaanona ya longithwe iilonga yaali pauyuuki moNamibia, naashoka poompito dhimwe ohashi holoka sho aavali oyo taya landitha po aanona yawo – nelalakano lyokupewa oshimaliwa shokwiikwathela.

Shikongo okwa popi kutya shoka olundji ohashi eta aanona ya gwile momake omawinayi gokulongithwa okuya momilalo, osho wo okulongithwa iilonga pathiminiko.

Ndhoka okwe dhi popi mOvenduka mOmaandaha pethimbo lye egululo pambelewa lyoshigongiilonga kombinga yomakwatombambyona gokulongitha aantu iilonga inaa yu uka, mwa kwatelwa wo aanona mboka haya kuthwa komikunda dhawo osho wo mboka haya ndjondjelwa moshilongo. Ekwatombambyona ndyoka olya kwatelamo aantu nenge aanona mboka haya ndjondjelwa moshilongo okuza piishiindalongo osho wo mboka haya kuthwa komikunda dhawo nokufalwa pomahala galwe ngaashi moondolopa nokukala taya longithwa iilonga yaali paveta.

Olya kwatelamo wo Aanamibia mboka haya zi mo moshilongo nokundjondjelwa kiilongo yilwe hoka ye li ko taya mono iihuna nokulongithwa iilonga yaafele kaashi li pahalo lyawo.

Shikongo okwa popi kutya moNamibia omwa ndhindhilikwa nokuningilwa omakonakono kombinga yiipotha 102 yendjondjo lyaantu, niipotha 27 yomwaambyoka, oya kala momake gompangu okuza mo2010.

“Omiyalu ndhoka otashi vulika itaadhi ulike lela omwaalu gwogwene ngoka gu li mokati ketu. Ashike nando ongaaka, uumbangi opo wu li kutya Namibia olya ninga eyana lyokundjondjelwa nenge lyokundjondja mo aantu moshilongo,” osho Shikongo a popi ngaaka.

Okwa popi kutya onkalo ndjoka unene oya kwatelwa komeho kaantu mboka ye li moondolopa haya heke aanona okuza komikunda nenge puushiindalongo opo ya ye koondolopa neuvaneko kutya otaya ka pewa elongo nenge iilonga yi li hwepo, osho wo yilwe yi li nawa ashike lwanima aanona mboka ohaye ki iyadha ya ningwa aapika.

Shikongo okwa popi kutya monakuziwa, iipotha yekwatombambyona lyaantu mboka haya ndjondjelwa moNamibia okupitila poongamba osha kala tashi ningilwa okukuta aakuluntu naanona mboka kaaye na omikanda dhopashigwana, nokwa konekiwa oyendji ya kala taya kuthwa koAngola, koZambia nokoZimbabwe, okulongithwa iilonga ngaashi yuusita wiimuna, okulanditha momapandaanda osho wo okulonga momagumbo.

Ongoshitopolwa shoonkambadhala dhopolisi okuyapukila onkalo ndjoka yomakwatombambyona moshilongo, epangelo lyaNamibia olye eta po oonkatu dhopaveta dhokukugamenenapo uuthemba woonakuninga iihakanwa okupitila moonkatu dhopaveta ngaashi ndjoka yOkukeelela Endjondjo lyAantu yo2018 (Oveta yOnomola 2 yo2018) osho wo Oveta yEkeelelo lyIimbuluma yaLongekidhwa yo2023 (Oveta yonomola 2 yo2023), osho Shikongo a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.