‘Onkalo yokwaana iilonga otashi vulika yi hulile muukulo’

Omupevindjayi gwiikonga metanga lyopolisi, Elias Mutota okwa gandja elondodho kutya ngele onkalo yokwaana iilonga inayi yapukilwa mbala otashi vulika yi ke ete evundakano nenge uukulo moshilongo.

Ndhoka okwe dhi popi pethimbo lyoshipopwa she shoka a gandja kokomitiye yomutumba gwopashigwana ndjoka yi lile po omahupilo niilonga yepangelo, mOvenduka uunambo.

Mutota okwa tsakanene nokomitiye ndjoka okugandja omauyelele kombinga yomashongo ya taalela mopolisi okulonga noshigwana unene tuu ngele otashi ya konkalo tayi indjipala yaalandithi momapandaanda – shoka ku wetike kutya otashi etwa unene konkalo yokwaana iilonga moshilongo.

“Onkalo ndjoka ngashingeyi otayi etitha omalimbililo noonkondo moshilongo, oondjoka yokwaana iilonga maagundjuka. Aanamibia kayeshi nande aantu yokulonga uuhwapindi ishewe ihaya hala oku shi elekela, ashike limwe lyomomasiku [otashi vulika shi ka ningwe],” osho Mutota a londodha ngaaka.

Okwa popi kutya opolisi oyi na oshinakugwanithwa shokukwatelapo ooveta nomalandulathano, nokushilipaleka kutya okwi iyuthwa kudho.

Mutota okwi indile aaleli yomutumba gwopashigwana ya ninge omalunduluko mooveta ndhoka dhi li po, kwi ikwatelela komashongo ngoka ge li po mongashingeyi kombinga yiipindi yomomapandaanda.

komashongo ngoka ga pamba onkalo yomatala nenge okulanditha momapandaanda.

“Aakalekipo yoveta oye na oshinakugwanithwa shokutula ooveta miilonga kutya nee otashi pula shike. Uuna pwa holoka sha otuna okukaleka po elandulathano, nomathimbo gamwe shoka ohashi kala shi wetike twa fa twa gama ombinga,” osho a popi ngaaka.

Elondodho lyaMutota olya fathaana naashoka sha popilwe komupresitente Hage Geingob pethimbo lyoshipopiwa shopashigwana shoka a ningi muMaalitsa, moka a popi kutya okuna omalimbililo kombinga yonkalo yokwaana iilonga unene tuu maagundjuka nokuwete kutya tashi vulika ndjoka tashi vulika yi ka nayipale sho ye li molugodhi lwokukonga uuhupilo.

“Ngele aagundjuka ayehe oya thikama nena otashi ka piyagana, otaya vulu nokuli nokukutha oondjembo. Uukulo, owo tandi popi mpaka. Otashi vulika ya kutwe [koongundu dhopakwiita] nenge ya fundjalekwe koongundu dhilwe . . . nomolwashoka oyu uvite nayi, otashi vulika ye dhi waimine,” osho omupresitente a popi ngaaka.

Pauyelele wa pitithwa hugunina, onkalo yokwaana iilonga moshilongo oya yaga kegonga sho taku popiwa kutya oya thikama pondjele yoopelesenda 34, moka aagundjuka ya thikama po moopelesenda 48.

Pauyelele welelo lyoshitopolwa shaKhomas, oopelesenda 50 dhaagundjuka mOvenduka otaku hokololwa kaayena iilonga.
Numvo mEsiku lyEmanguluko, engungo lyaakwashigwana mboka kaaye na iilonga unene tuu aagundjuka, oya ningi ehololomadhiladhilo omolwongeyo yokwaana iilonga, ashike ehololomadhiladhilo ndyoka okwa li lya kalekwa – kopolisi.

Ehololomadhiladhilo ndyoka okwa li wo lye eta aakwatelikomeho yalyo, ngaashi Michael Amushelelo, Dimbulukeni Nauyoma, osho wo oshilyo shongundu yoPDM megumbo lyopashigwana Inna Hengari, ya kwatwe po.
IILONGA MOMPANDAANDA

Uuyelele kombinga yomapekaapeko gaaniilonga, otaku hokololwa etata lyaantu 725 742 mboka haya longo moshilongo, otaku hokololwa yi ikwatelela moshikondo shomalandithilo gopomatala nomomapandaanda.

Ashike nando ongaaka, onkene oshikondo shoka sha taalelwa komashongo ogendji, ngaashi etidho lyaalandithi mboka ye li momapandaanda.

Oshiholelwa, omasiku ga zi ko elelo lyoshilandopangelo olya tameke noshikonga shokutidha aalandithi yomomapandaanda, mboka t
aya landithile pomahala inaaga pitikwa.
Mboka ya kwatwa taya landithile pomahala ngoka, ohaya pewa egeelo lyofuto yooN$2 000, niilandithomwa yawo ohaye yi kuthwa kopolisi.

“Osha simana opo aalandithi yomomapandaanda ya tseye omilandu dhomalelo goondolopa, okukonga omikandapitikilo [dhokulanditha] osho wo okulandithila pomahala gu uthwa opo ashike ya yande okuya mumwe nopolisi,” osho omupopiliko gwoshilandopangelo Harold Akwenye a popi ngaaka.

Sualtjie Coetzee (24) okuli oshitopolwa shongundu yaalandithi yomomapandaanda mboka iilandithomwa yawo ya kwatwa po kopolisi yoshilandopangelo muAuguste molwaamba lwoshiputudhilo shaNamibia University of Science and Technology (Nust).

“Otwi ipyakidhila nokunyangadhala. Ngashingeyi natu ninge ngiini? Natu yuge aantu iinima yawo? Natu yake po iinima yaantu?” osho a popi ngaaka.

Tom Forbes (32) okwa hokolola kutya okwa li a dhike po okatala ke kokulandithila molwaamba nopate poshiputudhilo shoka opo a kale ta landitha iinima ye kaailongi mboka haya ende popate uuna yu uka kootundi. Ashike opolisi oye mu lombwele opamwe naalandithi ooyakwawo ya teye po uutala wawo mehuliloshiwike lya zi ko.

“Ngashingeyi sho nee twi ipyakidhila nokunyangadhala, oyo ishewe taye tu thiminike opo tu iyadhe tatu ningi iinima iiwinayi ngaashi okuyuga aantu iinima yawo.

Tse otwa sa ondjala,” osho Forbes a popi ngaaka.

Forbes okwa hokolola kutya oya kala haya longele poonto dhoshiputudhilo shoka uule woomvula hamano, ashike etokolo ndyoka lya ningwa kelelo lyondolopa opo ya tidhwe po olye ya kanithitha iiyemo.

Poonkundathana ndhoka dha li pokati kaMutota nokomitiye yomutumba gwopashigwana, opwa li wo aakuthimbinga ngaashi ehangano lyokupopila oongeshefa moshilongo lyedhina Namibian Chamber of Commerce and Industry (NCCI).

Omukuluntuwiliki gwo-NCCI, Charity Mwiya, okwa holola okwaauvanawa kombinga yoongeshefa dhomomapandaanda ndhoka dha talika ko ongoshimbuluma moshilongo.

Mwiya okwa popi kutya onkalo yomalelo goondolopa ge na ooveta dha yaga kegonga, oya thindila kongudhi oongeshefa nomapendulopo gomangeshefelo moshilongo oga yiwa moshipala.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.