Omuleli wongudu yoAffirmative Repositioning (AR) Job Amupanda okwa hala efudo lokukamona ounona li wedelwe nomwedi umwe.
Eshi kwa li ta popi noDesert Radio Etitatu, Amupanda okwa ti okulundulula omulandu wefudo lokukamona ounona otaku vatele ovakainhu opo va tye po xwepo nawa konima va mona ounona omanga inava shuna koilonga.
“Osho ongee nee twa itavela kutya ounona omaano a dja kuKalunga nonghee nee ovakainhu inava pewa ehandukilo medina eshi va mona ounona,” Osho a ti ngaho.
Amupanda natango okwa ti vali onotwaveta yefudo lokukamona ounona otai dulu ashike okukundafanwa ngee oshiwana otashi fininike.
“Ngee a tushe otwa itavela kutya eshi oshinima sha yuka okuningwa, otu na okufininika, otu na okuyandja omaliudo etu notu na yoo okuhoolola mondjila opo omalunduluko aa e uye.”
Amupanda okwa ti omulandu wopaife otau ti omukainhu ngee oku li mefudo lokukamona okaana na mone ashike oshimaliwa shi fike poN$13 000 komwedi.
“Omauwa ape okwa kwatela mo okupewa ondjabi ya wana po, noshimaliwa shi fike poN$15 000 keshe omwedi nomauwa efudo eli otaa kala haa futwa oule woivike 12,” Osho a weda po ngaho.
Omunandjungu wouyuki wopanghalafano Lucy Edward-Jauch okwa ti ovakainhu nava pewe efimbo la wana opo va tye po xwepo konima va mona ounona nosho yo okuxwaxwameka okunyamifa.
“Ovakainhu koilongo imwe ohava pewa efimbo lokukala nokaana la wana konima va mona ounona,” Osho a ti ngaho.
Edward-Jauch okwa ti okulundulula omulandu wefudo lokukamona okaana naku kwatele mo okufuta omafiku okafudo oko osho ihashi ningilwa ovakainhu vamwe ovo hava mono oshimaliwa shonumba.
“Ovakainhu ovo ve udite va pewa ehandukilo ngee tava i mokafudo kavo kokukamona ounona ova pumbwa okukufa odula ve li pedu ashike inava pewa nande ehandukilo la sha lopashimaliwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
