Onghendabala yokupitika elongifo lepangwe moNamibia oya dopa mOmhangu yOpombada mOvenduka.
Epangelo otali talulula oveta yengabeko lelongifo lepangwe manga, nghee nee okuyela unene omhangu i tokole paveta kombinga yengabeko lelongifo lepangwe moshilongo, omupanguli Claudia Claasen metokolo laye la yandjwa momhangu yOpombada onghela ta ti.
Claasen natango okwa ti okutota oveta kombinga yepangwe ngee nali pitikwe ile nali twikile nokula inali pitikwa oilonga yepangelo nomalutu okutota oveta epangelo.
“Oshinima eshi osha pumbwa omakonakono kombinga yoinima ngaashi omaupyakadi oo tali dulu okweeta, omaitavelo neenghedi doshiwana, okupika ovanhu, noilanduli yalo panghalafano nopaliko nosho yo enghonopeko loveta,” Claasen ta ti.
Okwa twikila: “Pakutala koumbangi noikumungu yopaveta ya yandjwa, omhangu ei oya mona kutya oshikumungu eshi shepangwe osha kilikita, tashi teya omulandu woundjolowele woshiwana, noveta yokukelela oimbuluma, nomilandu dihapu dopanghalafano.”
Claasen okwa popila eindilo lowina lepangelo, omutamanekindjai, minista wouyuki, minista woundjolowele nomayakulo opanghalafano nakomufalandjai wopolifi yaNamibia mokunyamukula enyenyeto la yandjwa kupresidente wehangano loGanja Users of Namibia (GUN) napresidente woRastafari United Front, Brian Jaftha nahamushangandjai woGUN Borro Ndungula muAuguste 2021.
Jaftha naNdungula okwa li va hala Omhangu yOpombada i tokole kutya okukelela elongifo lepangwe kovakulunhu moNamibia kaku li pafinamhango.
Menyenyeto lavo, Jaftha naNdungula ova ti engabeko lelongifo lepangwe moNamibia “ola dja nale, la etwa komaitavelo a puka paife taa popilwa koinima yopapolitika i li ominge neitavelo neenghedi deeRasta”.
Ova ti vali engabeko lokulongifa epangwe itali imbi omikundu odo taku tiwa ohali eta, “ashike ponhele yaasho otali eta nee unene omikundu inadi pumbiwa moshiwana okupitila momatamaneko oimbuluma ngee ovanhu ve li longifa paumwe nopaunamiti”.
Jaftha naNdungula natango ova ti: “Ekelelo lepangwe itali dulu okukala paunongononi ile li popilwe kutya oli li mondjila.”
Ovaningi veindilo ava vavali ova ti, engabeko lepangwe oli li efininiko loufemba wavo nemanguluko onghee nee itali dulu okupopilwa notali ngabeke oufemba wavo womufyuululwakalo nokuwanifa po eitavelo lavo leeRastafarian.
