‘Onda loloka okwiilanditha’

Onda loloka okulanditha olutu lwandje, nonda pumbwa iilonga.
Mbyoka oyo iitya yomukiintu gwomimvo 31 *Elmarie Beukes, ngoka e na aanona yatano, nohazi molukanda lwoombashu lwaHavana mOvenduka.

Beukes okwa popi kutya nonande ohi ilanditha opo i imonene iiyemo, onkene sha nika oshiponga noonkondo.
Okwa popi kutya okwa hala okwiimonena iiyemo opo a vule okuyambidhidha oyana yatano, gumwe oku na omimvo 13, 12, 4, 2 osho wo gwonkelo ngoka e na oomwedhi ne.

Beukes okwa hokolola kutya okwa kala hi ilanditha okuza mo2010, konima owala sho yina a mana oondjenda.
“Konima sho meme a mana oondjenda, onkalo oya thiminike ndje opo ndi kale handi ilanditha opo ndi yambidhidhe omumwamememati e na omimvo 24 osho wo omumwamemekadhona ngoka e na omimvo19, mboka ya li mosikola natango pethimbo ndyoka.

Ongame awike nda li handi vulu okwe eta omboloto megumbo, molwashoka kapwa li ngoka ta vulu oku tu kwatha,” osho a popi ngaaka.

Shoka okwa li she eta a ninge etegelelo lyomwana gwosheeli nokwa li a thigi po osikola mondondo 9 sho he a ndopa okufuta osikola.

Sho a pulwa ngele iha kala ngaa a tila okukwatwa komikithi dhopaihulo, Beukes okwa yamukula tati: “Hasho nda hala ndi kale handi ningi, ashike kandi nkene, ohashi uvitha ndje nayi okutala aanona yandje taya si ondjala, sho osho nee kutya kehe ethimbo taya pula oshinima itaandi vulu oku shi landa ohandi tokola ndi ki ilandithe.

Okwa li nda popi moshigwana okupitila kiikundaneki yopankalathano komalungula molwashoka onda loloka okukala tandi nana nondatu, kandi shi nokuli kutya oolye ootate yaanona yandje molwashoka okwa li handi lala naalumentu ya yooloka kutya nee otaya futu ndje ooN$150. Aanona yandje oyeshi kutya openi handi kutha iimaliwa molwashoka yaali yomuyo mboka aakuluntu onde shi ya tseyithila.”

Omukiintu ngoka ohazi mombashu noyana, nombashu ndjoka oyi na owala ondunda yimwe yokulala, ishewe kayi na olusheno.
Ohaya longitha esiga lyokohaasa okuteleka nohaya teleke owala lumwe mesiku omanga omasiku gamwe uuna kaapu na sha, ohaya ka lala nondjala.

“Mwene gwehala okwa li a pe aanona yandje oshimbombo nomboloto ongula onene. Inatu lya omwiha ishewe kandi shi kutya oshike tatu li kongulohi, molwashoka kapu na sha. Otandi mono iihuna naamwandje, mboka kaaye na oohe,”osho a popi ngaaka.
Beukes okwa lombwele onzonkundaneki ndjika kutya ndohotola gwe okwa li e mu lombwele kutya ina yamitha we omwana kontulo pethimbo omwana e na oomwedhi ndatu molwashoka [Beukeus] okwa li a monika uupyakadhi mboka kwa li tashi vulika we etele okanona uupyakadhi.

“Otandi nyengwa okulanda omahini gokanona, ohandi mu pe omeya gosuuka uuna kaapu na omahini,” osho Beukes a popi ngaaka.
Kakele komahini gokanona okwa popi kutya ota nyengwa okulanda iinima ngaashi iikulya yomegumbo, iikutu, osho wo iipumbiwa yesiku kehe.

Okwa popi kutya ohaya hupile moshimaliwa shooN$500 shaanona ye shoka hashi zi kepangelo omwedhi kehe, ashike nando ongaaka ooN$400 ohedhi futu po ehala moka haya zi, taya thitha.

*Edhina lye lyoshili halyo lya longithwa omolwuumbanda wokushundulwa

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.