‘Onda hala owalaomulungu gwandje’

“ONDA hala owala omulungu gwandje.”

Mbyoka oyo iitya nomatumbulo okuza kuBenoni !Oxurus gwomimvo 12, ngoka onkalamwenyo ye ya lunduluka sha landula sho a mono etando lyomulungu lwiikando itano mo2019, noshe mu thigi noshipala sha lunduluka.

Nomahodhi taga pononoka moshipala, Benoni okwa hokololele oThe Namibian mOmaandaha kutya ye okwa hala onkalamwenyo ye ya shuna koshito ngaashi a li manga inaa mona etando.

Pethimbo lyoonkundathana nonzonkundaneki ndjika, Benoni ngoka a yambukile koKalkrand, okwa li ta nyengwa okupopya nawa omolwonkalo ye ndjoka yomulungu gwa tetwa ko.

Mongashingeyi, oshi li owala momake gepango ndyoka ta vulu okumona koSouth Africa opo omulungu gwe gu ukililithwe.

Benoni okwa lombwelwa kutya koSouth Africa oko owala ta vulu oku ka pangwa a galukile kondjila, sha landula sho omatando ngoka a ningilwa moNamibia ga nyengwa oku mwe eta kondjila.

Momasiku 17 Desemba 2019, pethimbo e na omimvo omugoyi, onkalamwenyo yaBenoni aiyhe oya lunduluka. Benoni, ngoka hali owala iikunguluki okupitila mokamunino, okwa li a penduka e na onzindo komulungu gwopombanda.
Shoka lwanima oshe eta omilungu adhihe nogopevi dhi tetwe ko.

Moonkundathana noThe Namibian uunambo, yina yaBenoni, Delina !Oxurus okwa holola okwaauvanawa konkalo yomwana ta mono omatando ngoka itaaga hulu noshe eta nokuli omwana a kale ihaayi we manga kosikola.

“Onda hala ya mana okupanga omumwandje. Omumwandje okuna okukala hayi kootundi dhomutenya ashike okwa sa ohoni,” osho !Oxurus a popi ngaaka.

Benoni ngashingeyi okwa ningi oomvula mbali inaaya kosikola.

!Oxurus okwa hokolola nkene she ende pethimbo a kala ta fala omwana koshipangelo.

Okwa popi kutya oshikando shotango ya ya koshipangelo, omwana okwa pewa omutihokukondjitha ombulwa ndjoka.

“Okuza mpoka okwa ningi eyankadhi komulungu gwopombanda. Otwayi kokapangelo notwa pewa omuti. Otwa galukile kegumbo. Otwa shuna kokapangelo natango konima yiiwike iyali notwa tuminwa koshipangelo shaMariental,” osho !Oxurus a popi ngaaka.

“KoMariental, oondohotola oye tu tumine koshipangelo shaKatutura. Hoka okanona oka tetwa oshipa. Shoka osha thigi okanona nomulungu gwopombanda gwa tetwa ko,” osho a hokolola ngaaka.

!Oxurus okwa popi kutya okuza mpoka oondohotola odha kutha oshipa okuza keyulu lye [lyokanona] opo a tule oshiyando shoka komulungu ngoka gwopombanda. Okwa popi kutya etando ndyoka okwa li lya ningwa koondohotola yaali gumwe omuCuba nomukwawo omuChina moshipangelo shaKatutura, muJuni 2020.

“Oya popi kutya oshinima shi na omumwandje kasha li nande eyankadhi, ashike oshilalo she etithwa sho a lika kewiiwili,” osho yina a gwedhapo ngaaka.

Manga inaapu pita ethimbo ele, oshilalo sha faathana osha tukuka komulungu gwopevi.

“Etando etiyali olya ungaungiwa nalyo komundohotola [Rikotamenee] Hange. Oshilalo osha kwata omulungu gwopevi naashoka oshe eta omundohotola Hange a tete ko omulungu ngoka gwopevi,” osho a popi ngaaka.

Pompito ndjoka, !Oxurus okwa lombwelwa kutya Benoni uupyakadhi mboka owe etwa sho a lika kewiiwili.

Konima yetando etitatu ndyoka kwa li lya nuninwa okupukulula omulungu gwe, Benoni okwa hulitha po okuya kosikola sho a lombwelwa kaalongi.

Etando lya hugunina lyaBenoni olya ningwa muApilili omumvo gwa zi ko, nokuza mpoka oondohotola Aanamibia oya popi kutya [Benoni] ota vulu owala oku ka mona epango moSouth Africa ndyoka tali mu eta kondjila.