… ovandjandjukununi otava ti omapopyo aa okuyadi outondwe
Omupedu minista woilonga noyeendifo Veikko Nekundi okwa ti okwa hala okumona efudiko lopaudemokoli lapelesidente wongudu yoIndependent Patriots for Change (IPC) nalapelesidente wongudu yoPopular Democratic Movement (PDM).
Nekundi okwa li ta popi Panduleni Itula naMcHenry Venaani koshoongalele shoSwapo osho sha li kEmono kOshakati Oshoondaxa.
Okwa ti eshi ta ka alukila kEmono momafiku 28 Novemba, okwa hala okumona ombila yaItula naVenaani pokapale opo kwa li tava ningile oshoongalele shavo Oshoondaxa.
“Eshi handi ka alukila oku momafiku 28 Novemba, ngee oidjemo yomahoololo ya shiivifwa, onda hala okumona ombila yaItula naVenaani apa,” Nekundi osho a ti ngaho.
Okwa pula ovakalimo vomEmono opo va ifane omunanghono umwe opo a tule ko emanya olo puhe na nande omunhu ta dulu okulikufa ko keendo lovaleli veengudu domilameno ovo vavali.
“Nava fudikwe fiyo alushe,” Nekundi osho a ti ngaho.
Okwa ti keshe eshi tashi fuda ndee oshi li keengudu domilameno mEmono nashi fudikwe .
Nekundi okwa ti Swapo oku na okudenga mo IPC.
“Otu na okuvadenga mo aveshe. Efimbo lokulonga naJudas Iscariot. Judas na tulwe ponhele yaye,” Osho a ti ngaho.
Pelesidente mukulu woSwapo Hifikepunye Pohamba momudo 2008 okwa li a yeleka oilyo yoSwapo oyo kwa li ya waimina ongudu yoRally for Democracy and Progress naJudas oo kwa li a kengelela Jesus.
‘KALUNGA NOSWAPO’
Nekundi okwa lundila oPDM kutya otai longo i li ominge nemanguluko loshilongo.
“Kalunga noSwapo ohava longele pamwe, omanga DTA/PDM naSatan ohava longele pamwe. Inatu ngwangwanekenwi kedina eli la shendja.
Ongudu yoPDM oyo ngaa oDTA inamu i landula,” Osho a ti ngaho.
Nekundi okwa sheka elitulemo laItula kuNamibia,ta ti kutya eshi Ovanamibia kwa li tava fiye po oshilongo va ye kombada opo va ka lwile ekondjelo manguluko, Itula okwa li a fanduka po aya koBritain, ndee ta aluka ashike eshi a udu moNamibia mwa monika omahooli.
“Paife okwa aluka ta ti Namibia oye ashike tu na. Okudja naini? Paife shaashi owa uda kutya moNamibia omwa monika omahooli owa aluka. Owa kala peni? Paife oku li keshe pamwe – Okongo, Uuvudhiya, keshe pamwe,” Osho a ti ngaho.
“Ongudu yoCongress of Democrats okwa li ya tumwa okudja koEngland.
Otwe i denga mo. Natango natu shi ningileni oIPC.
“Opu na nee oPDM. Ongudu ei oya kala ongudu yomilameno okudja ashike eshi ya totwa – natu i ulikeni komutwe wondjaba. Nai fude po.
Inai kala po vali keedula dokomesho. Omwenyo wayo nau tumukwe naSatan.”
Omuunganeki woSwapo koshitopolwa Werner Iita eshi a popya poshoongalele opo tuu opo okwa ti ovanhu ve li 17 ova waimina ongudu va dja koIPC, omanga Nekundi a ti oilyo imwe yoIPC oya waimina ongudu natango koshitopolwahoololo shaKavango.
Okwa ti oilyo ei ipe okwa li ashike ya waimina oIPC konima eshi kwa li ya udanekelwa oikulya yoshikukuta.
“OHANDI KA NINGA PELESIDENTE WAYE’
Veenani eshi a nyamukula omapopyo a Nekundi, okwa ti okwa tilifa Swapo paife eshi Ovanamibia vahapu va ulika ohokwe muye.
“Ovanamibia paife ovaputuka nonghee nee kave na ko vali na sha nomapopyo a nyika oipupulu eli ngaho,” Osho a ti ngaho Omaandaxa.
“Eendo lange otali kala la dingonokwa kovanhu ongondi li omukondjifi wokuxwepopaleka onghalo yavo.
Ame omulumenhu wombili oshinima osho kashi na fiku shi kufwe ko kwaame nokomaliumbato ange mopolotika,” Osho a ti ngaho.
Venaani oku na ondunge yokukatalela po Emono nokwatwa ovakalimo vokEmono omukumo opo vaha shololifwe komatilifo a Nekundi.
“Ondi na okuninga pelesidente waye nomuleli waavo ve yele nge naavo ve hole nge. Oshinakuwanifa shange osha kula unene nokukala nde lipyakidila naavo ve yele nge, nande nee ovakandjifi vange.”
Omupopiliko wongudu yoIPC Immanuel Nashinge Omaandaxa okwa ti omapopyo a Nekundi otaa piyaaneke nai.
“Nekundi okwa hoolola okuninga omaponokelo opaumwene nokutandavelifa osho hatu ti ouyelele uhe li mondjila,” Nashinge osho a ti ngaho.Ovandjadjukununi vamwe voikwapolotika Omaandaxa ova ti omapopyo a Nekundi okwa nyika outondwe nokwa pumbwa kukalekwa omutumba koSwapo ndee ta pukululwa ndee ta yandje ombili koshiwana noho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
