Onda hala okumanguluka nde mu fa – Shanghala

Ngoka a li minista guuyuuki Sacky Shanghala okwi indile Ompangu yoPombanda yi mu mangulule mo mondholongo, pethimbo ya holoka naafekelwa pamwe okutameka niihokolola yoshipotha shoFishrot, mompangu yopombanda ndjoka tayi adhika mondholongo yezulonkalo yVenduka, mEtiyali. “Onda hala okukala nda manguluka nde mu fa,” osho a popi ngaaka. Shanghala opamwe noyendji yomaafekelwa yoshipotha shuulingilingi woombumbo moshikondo shoohi, oya tulwa miipandeko momasiku 27 Novemba 2019 shoka tashi ulike kutya oya kala mongali uule woomvula ne. Omufekelwa omukwawo, James Hatuikulipi, naye okwa zi mokalungu kutya okwa loloka mo mondjeedhililo.

“Onda hala okumangululwa mo. Ondi wete nda longela ko egeelo lyandje,” osho a popi ngaaka. Shanghala okwa lombwele omupanguli Moses Chinhengo kutya ngele okwa mangululwa mo, otashi ke mu pa opamwe naafekelwa ooyakwawo ethimbo ya vule okukonga oshimaliwa nenge okukonga aakalelipo yopaveta opo ya shilipaleke kutya oya kelelwa po opo iihokolola yawo ye ende pauyuuki.

Shanghala opamwe naafekelwa yalwe yatatu moshipotha shoFishrot ngaashi James Hatuikulipi, Ricardo Gustavo osho wo Pius Mwatelulo oya lombwele omupanguli kutya inaya pyakudhukwa okutameka niihokolola opo ya zimine nenge ya tinde omatamaneko ngoka ya taalela, molwashoka kaye na oohahende nenge aakalelipo yopaveta.

Peha lyaafekelwa ooyakwawo, Shanghala okwa popi ehokololo ele mompangu uunambo ta yelitha kutya itaya vulu okutameka niihokolola omanga kaaye na aakelelipo yopaveta naashoka otashi etwa unene koshimaliwa shoka kaaye na we.

Shanghala okwa gwedha po wo kutya otaya pumbwa ethimbo e ele opo yi ilongekidhile iihokolola yawo moshipotha shoka shoFishrot nokwa popi kutya pauyemwene okwa pumbwa ethimbo lya gwedhwa po lyi li pokati koomwedhi hamano nahetatu opo i ilongekidhe nawa molwashoka okwa pumbwa wo okulesha omapandja ge li po140 000 ge na sha nuuyelele wa pamba omatamaneko ya taalela. Okwa popi kutya ngele iihokolola oya tsikile omanga ye li monkalo ndjoka nena itashi kala pauyuuki, notashi eta ya kale inaaya kalelwa po nawa.

Okwa gwedha po wo kutya ngele oshipotha osha tameke ngashingeyi, otashi shekitha omulandu gwoveta molwashoka oshipotha ya taalela osha piyagana.

“Itashi kala pauyuuki, molwashoka onda lombwela omupanguli kutya oshipotha shika osha piyagana. Kutya nee okukale ohahende okwa pumbwa okukalelwa po paveta. Nokuli, opu na omupopyo tagu ti, okwiikalelapo ngoye mwene ongohahende osha nika uuthethe,” osho a popi ngaaka.

Monakuziwa Shanghala okwa li a kalelwa po kuhahende omuSouth Africa, ngoka a li he mu futitha ooN$60 000 oshikando kehe te mu kalelepo mompangu.