“Inandi hafa; omutima wange otau pi,” tate womutamaneki wokOndangwa Justine Shiweda, oo a xulifa Olomakaya sha landula eponokelo laye linyanyalifa eshi vati aanyena okuyandja obooloha komutamanekwa moshipofa shakula.
Shiweda okwa xulifa konima yeemwedi nhee ta kondjo e li moshipangelo, a fiya ko ovakwapata tava lili noshikandjo shoveta tashi pula ouyuki.
Tate waye, Severus Shiweda (73), okwa ti Jusitine kakwa li ta dulu okulya nokunyamukula ongodi yaye, ashike natango okwa li e na elineekelo kutya ota xupu.
“Onde mu talela po oikando ihapu moshipangelo. Okwa li e li monghalo ii fiyo efyo laye,” osho a ti ngaho.
Jusitine okwa xulifila mOvenduka Olomakaya pepupi lomido 31.
Okwa fiya ko ounona vaye vavali.
Shiweda okwa li a ponokelwa kongudu yovafufi odula ya dja ko muOktoba.
Ove mu yasha ndee tave mu tile oudiyo wa nyika oshiponga.
Oshipofa osho vati sha eta oshiningwanima eshi osha kwatela mo omunambelewa wopolifi mukulu oo a ninga omulongi woikulumuna Abner Mateus.
Mateus, oo e li modolongo, otaku tiwa vati okwa tuma ongudu yovalongi voimbuluma i ponokele Shiweda. Ohauto oyo ya longifwa vati meponokelo oya hangika meumbo landokotola wopaunamiti mOndangwa Fillemon Nakanduungile.
Opolifi otai ti Nakanduungile okwa popya naMateus konima yominute 30 mangha Jusitine ina ponokelwa.
Eshi a popya noThe Namibian Oshoondaxa, Severus okwa holola ehandu laye nokwa pula ouyuki meendelelo.
“Onda hala ouyuki u wanifwe po. Nava pangulwe meendelelo ndee tava mono ehandukilo la mana mo.
Olo eindilo lange kepangelo olo,” osho a ti ngaho.
Okwa ti okwa li a kumwa unene eshi a uda kutya omona okwa ponokelwa.
Severus okwa ti kutya okwa putuda Justine okudja ngaa pehongo lopetameko mOndangwa Prof School fiyo a mana elihongo laye moipambele yoveta momudo 2015.
“Okwa li omulihongi dingi kOshigambo High School ndee ta mono epapa mOshiingilisha. Okwa ya nee koUniversity of Namibia ndee te lihongo oikwaveta.
“Okwa ninga omunailonga woministili youyuki nokwa li a tuminwa kOndangwa, oko a kala ta longele fiyo efyo laye,” osho a ti ngaho.
Severus okwa ti ‘Kapandu’ (Justine) okwa li omunambili “nokwa li ta yolo keshe efimbo, nande osheshi e li moshipangelo”.
Okwa ti omonakadona okwa fya koudu wa etwa keponokelo nokwa kala ita dulu okulya kuye mwene omafiku aye a xuuninwa.
“Okwa li ashike ta lile kokamunino shaashi okwa li a kanifa ehalo lokulya,” osho a ti ngaho.
Omatamanekindjai Martha Imalwa eshi kwa li ta yandje efimaneko keumbo looJustine kOnambango moshitopolwahoololo shaShana Oshoondaxa okwa ti Justine ependafule moshikondo shomayakulo okutamaneka.
“Osho wa ulikila nge pefimbo linya, onda shiiva kutya ove omulineekelwa nomunandjungu.
Owa yandja onghalamwenyo yoye u yakule ovo itava dulu oku lipopila vene, oonakuningwa oihakanwa yoimbuluma.
“Eeno, kaadona kange, efyo loye itali hepa.
Ovo va fyaala ko, owe va nghonopeka. Ohatu ku lili. Kalunga na kale naave,” osho a ti ngaho.
Imalwa okwa ti Justine okwa pumbwa okwiifanwa ependafule.
“Okaana aka kapu na efiku ka handukifile nge. Osho osho nde mu ulika a ninge omutamaneki akula momhangu yamangestrata mOndangwa,” osho a ti ngaho.
Imalwa okwa ti Justine okwa xulifa neeholo nhatu molutu laye.
“Olutu laye okwa li la ehamekwa neenghono.
Oto itavela kutya oshinima osho okwe shi ningilwa komunhu,” osho a ti ngaho.
Okwa ti Justine okwa li a kotoka, e na omikalo noku na ondjungu.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
