Omunailonga wokutalela mukulu woministili yoilonga noyeendifo koSwakopmund okwa mangwa po eshi vati a yandja otendela yepangelo kehangano laye mwene.
Omupopiliko wokomisi yokulwifa oulingilingi yaNamibia Marina Matundu momukanda okwa koleka ekwatepo laAnthony Dreyer Etitano.
“Otwa hala okulombwela oshiwana kutya omunambelewa mukulu woministili yoilonga noyeendifo koSwakopmund moshitopolwahoololo shErongo okwa mangwa po nota tamanekwa sha landula omakonakono oulingilingi,” osho a ti ngaho.
Otendela inai yuka ei tai popiwa oya kwatela mo okuwapaleka oilongifo yokudima omundilo koministili yeeshi needjo domefuta koSwakopmund koshimaliwa shi fike poN$84 132 momudo 2020.
Matundu momukanda okwa ti omakonakono okwa holola kutya Dreyer vati okwa yandja oilonga kehangano hali ifanwa Camel Thorn Investment CC, laye mwene, ina landula omilandu dokukonga oipumbiwa yepangelo.
Dreyer okwa li a holoka momangu yamangestrata yaSwakopmund Etitano nokwa li a pewa obooloha yoshimaliwa shi fike poN$20 000.
Oshipofa shaye okwa li sha undulilwa komafiku 25 Febuluali 2026.
Matundu okwa ti Dreyer okwa patululilwa oshibofa shokuteya okatendo kokulwifa oulingilingi eshi a longifa ombelewa yaye ile oilonga yaye e lipe ouwa mwene.
Ota tamanekelwa vali okuteya okatedno kokukonga oipumbwa yepangelo nosho yo kokukelela oimbuluma ya longekidwa.
“Oulingilingi otau teya po elineekelo loshiwana,epangelo liwa neyandjo lomayakulo liwa,” Matundu osho a ti ngaho.
