Omuprima minista Saara Kuugongelwa – Amadhila, okwa lombwela ovaleli vopamufyuululwakalo vokoZambezi kutya epangelo oli shi shi kutya oshitopolwa osha kumwa nai konghalo yondjala molwodula nepangelo otali kava tela moshinima shi li ngaho.
Okwa lombwela vali omalelo opamufyuululwakalo opo a vatele eengudu odo kwa li da tumwa opo di kufe mo ovanhu ava ve li unene momumbwe momidingonoko.
Eshi oshe ya konima eshi omalelo opamufyuululwakalo koshitoplwa a pula epangelo opo li vatele ovanafaalama ovo va kumwa nai konghalo yodula oyo inai wana.
Oshinima eshi okwa li sha pulwa oshivike sha dja ko pefimbo loshoongalele osho kwa li ovaleli vopamufyuululwakalo ngaashi, Masubia, Mafwe, Mashi, noMayeyi kwa li a ninga nomupelesidente, Nangolo Mbumba, koKatima Mulilo. Omuprima minista pefimbo loshoongalele okwa ti: “ Otwa hala eepolohalama doshikukuta di kale handi ungaungwa nado koikandjo ihapu nokwa li twa hala okukala hatu yandje oukalata voshimaliwa opo ovo hava mono omauwa aa va kale hava ka landa oikulya yavo keefitola domoshitopolwa voovene.
“Ngaho, ohatu kala hatu yambidida eengeshefa domoshilongo nokushininga shi na ombilixa kombinga yoyeendifo oyo hai eta oinima oyo koitopolwahoololo.
“Otwa tameka nokuyandja ombelela ina sha neepolohalama donghalo yondjala okudja koutomenho vetu, naashi hatu ningi ngaho ohatu yambidida ovanafaalama vetu vomoshilongo.
“Otwa hala okudenga omufindo ongepangelo kutya otwa hala okukondjifa onghalo yondjala mokutula po omikalo dokutekela oimeno opo ngee odula inai loka nawa oimeno yetu otai mono ashike omeva.”
Omuleli wOvasubia, Albius Kamwi, okwa ti ovanafaalama moshitopolwa okwa li va pulula eehecta omafele, nelineekelo kutya otava kala ve na eteyo liwa, ashike nee, eshi va ka tala, omapya avo aa kukuta molwodula.
“Eshi ashike oimeno ya mena,odula oya mwena po ndee eshi hatu popi ngaha, oimeno yovanafaala oya ninga po ashike ondwi. Ovanhu vetu ova pumbwa lela eyambidido okupitila meepolohalama dokulwifa ondjala fiyo omoshikako vali tashi landula shokukuna.
“Ovanhu vetu otava longo nale noudjuu mokumona epungu shaashi ola pumba unene. Ondado yepungu oya londa shinene novanhu vetu itave ke i dula vali,” Osho a ti ngaho.
Kamwi okwa ti vali ovateelela opo oshitopolwahoololo shi kale shi na odjuu womeva ovanhu noinamwenyo medina loshikukuta.
Okwa pula epangelo opo li ninge eemboola dihapu moshitopolwahoololo.
“Ngee kapu na omavatelo atya ngaho, onghalamwenyo otai kala i djuu neenghono, shaashi omilonga dihapu oda pwiinina moshitopolwa,” Osho a ti ngaho.
Omupopiliko welelo laMafwe, Eustus Mbango, okwa ti ova tala ashike kepangelo opo li va vatele shaashi ovanafaalama inava dula okuteya neudo medina lodula oyo ya li inai wana.
“Okuna okukala ondjala. Kakuna omeva okulongifwa kovanhu nokoimuna.
“Onghee nee, ohatu dilaadila kutya epangelo loshiwana nali ninge eemboola dihapu moshitopolwa. Ehangano lokulandifa eembelela laNamibia nalo nali tameke okulanda eengobe kovanafaalama omanga inadi fya kondjala nokenota,” Osho a ti ngaho.
Elelo lopamufyuululwakalo laMayeyi, momushangwa oo wa leshwa kuEustus Mbanga, ola ti oshikukuta osha eta oupyakadi opo ovanhu va kale ve na omeva a yela.
Okwa ti moshitukulwa shaye kamu na eembola da wana naado di li mo nale ihadi longo vali.
“Ohandi pula epangelo opo li lidope mo moshinima shi li ngaha opo li wedele omunino womeva okudja koKapani fiyo Okongola opo pa kale pe na omeva a wana oshiwana moshitopolwahoololo – unene ngaa moshitukulwa shange,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
