Opolisi yoshitopolwa shaZambezi otayi ningi omakonakono goshipotha shonkambadhala yedhipago sho taku hokololwa omupolisi a yaha kamatyona gwomimvo 17 ngoka taku hokololwa a li mongenga ndjoka ye mu yaka ongodhi yopeke noshimaliwa shooN$2 000, sha ningwa mOlyomakaya.
Omupopiliko gwopolisi yoshitopolwa shoka, inspekta Kisco Sitali okwa koleke oshiningwanima shoka nokwa popi kutya osha ningwa koongulasha lwopotundi 03h00, mondolopa yaKatima Mulilo.
Okwa popi kutya omupolisi ngoka naye okwa patululila omufekelwa oshipotha sheyako, notaku hokololwa kutya [omufekelwa ngoka] ngashingeyi okuli momake gopolisi moombete dhoshipangelo moKatima Mulilo.
“Otaku hokololwa kutya omupolisi okwa dhengwa nemanya mokugulu okuziilila konima sha ningwa kongundu yaalumentu mboka kwa li ye mu landula, nolwanima oye mu ponokele. Shoka oshe eta ye mu yuge ongodhi ye yopeke osho wo iimaliwa. Oye mu thigi po nokufadhukapo, ashike nando ongaaka omupolisi okwe shi pondola okukutha mo ombistoli ye nokwe ya umbu shoka she eta kamatyona ngoka e ehamekwe. Okwa falwa meendelelo koshipangelo a ka mone uuhaku,” osho Sitali a popi ngaaka.
Okwa popi kutya omakonakono gopolisi otaga pula komeho, nolukongo lwaafekelwa yalwe oluli metifa.
Pokati mpoka, aalumentu yaali oya yahwa pethimbo lyolugodhi ndoka lwa tukuka pehala lyomainyanyudho, ongulohi yOlyokamakaya, mOkahandja.
Oshiningwanima shoka otaku hokololwa sha ningilwa mehala lyomanwino tali adhika molukanda lwaNau-Aib, sho aalumentu mboka yaali ya yahwa nokwe ehamekwa.
Omulumentu gwomimvo 26 okwe ehamekwa mepunda kombinga yokolulyo, omanga omulumentu gwomimvo 19 okwa thigwa noshilalo mepunda. Pauyelele wolopota, oontamanana odha tukuka pokati koonakuyahwa, nomulumentu gwomimvo 30 ngoka ha longo pehala ndyoka ongosekuliti.
Oontamana ndhoka otaku hokololwa dha hulile mokugumathana kolutu, naashoka oshe eta sekuliti a kuthe mo ombistoli ye nokwa yaha aalumentu mboka yaali.
Oonakumonithwa oshipotha oya falwa koshipangelo mOkahandja, nolwanima oya tuminwa koshipangelo shaKatutura mOvenduka notaku hokololwa ye li monkalo ombwinayi.
Omufekelwa okwa tulwa nale miipandeko, nokwa holoka mOmpangu yaMangestrata gwaKahandja mOmaandaha, ta tamanekelwa iipotha iyali yonkambadhala yedhipago.
Monkundana yoluhodhi, omulumentu gwomimvo 29 okwa mana oondjenda ongulohi yOlyomakaya sho taku hokololwa a tsuwa sigo
omeso, komulumentu gwomimvo 23 mOshomeya, moshitopolwa shaShikoto.
Nakusa okwa hololwa kutya oye Albertus Domingo, noshiningwanima shoka osha ningilwa molukanda talu ithanwa Soweto.
Otaku hokololwa kutya omufekelwa okwa tukwa kunakusa naashoka oshe mu geyitha nokwe eta oontamanana ndhoka dha hulile mu nakusa a tsuwa nombele lwiikando ine noshilwitho sha honga.
Nakusa okwa tsuwa montulo naashoka oshe eta e ehamekwe noonkondo nokwiihatapo.
Domingo okwa falwa meendelelo koshipangelo shaTsumeb Lambart State Hospital ashike lwanima okwa kolekwa a hulitha.
Aapambele yanakusa oya tseyithilwa nale onkundana yoluhodhi, nomakonakono gopolisi otaga pula komeho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
